ប្រព័ន្ធផ្សព្វផ្សាយរដ្ឋកូរ៉េខាងជើង៖ កូរ៉េខាងជើងបានប្រឈមមុខនឹងបញ្ហាដ៏អាក្រក់បំផុតមិនធ្លាប់មាននៅក្នុងឆ្នាំមុន
ព្យុងយ៉ាង៖ ប្រព័ន្ធផ្សព្វផ្សាយរដ្ឋកូរ៉េខាងជើងបានលើកឡើងពីសមិទ្ធិផលរបស់មេដឹកនាំកំពូលលោក គីម ជុងអ៊ុន សម្រាប់ការធ្វើឱ្យប្រសើរឡើងនូវជីវភាពរស់នៅរបស់ប្រជាពលរដ្ឋ ហើយក៏បានចុះផ្សាយផងដែរថា ប្រទេសនេះបានប្រឈមមុខនឹងបញ្ហាដ៏អាក្រក់បំផុតមិនធ្លាប់មានកាលពីឆ្នាំមុន។
នៅថ្ងៃទី៣០ ខែធ្នូខាងមុខនេះ ត្រូវនឹងថ្ងៃប្រារព្ធខួបលើកទី១០ ដែលលោក គីម ជុងអ៊ុន ក្លាយជាមេបញ្ជាការយោធាកំពូលរបស់ប្រទេសកូរ៉េខាងជើង។ កាសែតគណបក្សពលករដែលកំពុងកាន់អំណាចគឺ រ៉ូដុង ស៊ីនមុន បានរាយការណ៍ជារៀងរាល់ថ្ងៃអំពីទសវត្សរ៍នៃការគ្រប់គ្រងរបស់លោក គីម។ កាសែតនេះបានសរសេរចុះផ្សាយនៅថ្ងៃពុធសប្តាហ៍នេះថា កូរ៉េខាងជើងបានប្រឈមមុខនឹងបញ្ហាដ៏អាក្រក់បំផុតរបស់ខ្លួនចាប់តាំងពីការបង្កើតគណបក្សពលកររបស់ខ្លួន។ ទីភ្នាក់ងារសារព័ត៌មាន រ៉េឌីយ៉ូប្រេស ដែលមានមូលដ្ឋាននៅទីក្រុងតូក្យូ ដែលវិភាគរបាយការណ៍របស់កូរ៉េខាងជើង បានកត់សម្គាល់ថា នេះគឺជាលើកដំបូងហើយសម្រាប់កាសែតរបស់គណបក្សកាន់អំណាច ឬប្រព័ន្ធផ្សព្វផ្សាយរដ្ឋកូរ៉េខាងជើង ដែលបានធ្វើការពិពណ៌នាអំពីស្ថានភាពនេះថា ជាបញ្ហាប្រឈមបំផុតមិនធ្លាប់មាន។ ទន្ទឹមនឹងនេះដែរ កាសែត រ៉ូដុង ស៊ីនមុន បានសរសើរទសវត្សរ៍នៃការគ្រប់គ្រងរបស់លោក គីម ថា ជាការលះបង់ដ៏កំពូលចំពោះប្រជាជន។
កាសែតនេះក៏បានគូសបញ្ជាក់ផងដែរ អំពីសមិទ្ធផលរបស់លោក គីម រួមទាំងការរីកចំរើននៃគម្រោងសាងសង់លំនៅឋានខ្នាតធំ។ សេដ្ឋកិច្ចកូរ៉េខាងជើងបានរងផលប៉ះពាល់យ៉ាងខ្លាំង ដោយសារការរាតត្បាតនៃជំងឺកូវីដ១៩ និងទណ្ឌកម្មសេដ្ឋកិច្ច។ ប្រទេសកូរ៉េខាងជើងក៏ទំនងជាកំពុងព្យាយាមបង្កើតសាមគ្គីភាព ដោយបង្ហាញថា លោក គីម ជុងអ៊ុន កំពុងឈរក្បែរប្រជាជនជានិច្ច៕ ប្រភព៖ NHK


