កំពង់ធំ ៖ ឯកឧត្តម ងួន រតនៈ អភិបាលខេត្ត បានចូលរួមពិនិត្យនិងបើកវិញ្ញាសារប្រលងសញ្ញាប័ត្រមធ្យមសិក្សាទុតិយភូមិ (BacII) នៅមណ្ឌលប្រលងវិទ្យាល័យវិទ្យាល័យកំពង់ធំនិងបានលើកឡើងថាមណ្ឌលប្រឡងចំនួន១០មណ្ឌលបើកឲ្យដំណើរការប្រឡងជាធម្មតាអភិបាលខេត្តលើកទឹកចិត្តនិងបានផ្តាំផ្ញើដល់បេក្ខជនប្រឡងទាំងអស់ត្រូវខិតខំបញ្ចេញឱ្យអស់សមត្ថភាពដើម្បីទទួលបានលទ្ធផលល្អគ្រប់ៗគ្នា ។

ព្រឹកថ្ងៃទី២៧ ខែធ្នូ ឆ្នាំ២០២១ ដែលជាព្រឹកថ្ងៃទី១នៃដំណើរការប្រឡងដើម្បីពិនិត្យភាពបិទជិតដើម្បីធានាបានថា ការប្រឡងប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌តម្លាភាពនិងលទ្ធផលទទួលយកបាន។ ឯកឧត្តមបានបន្តថា ចំពោះប្អូនៗជាបេក្ខជនបេក្ខនារីទាំងអស់ដែលត្រូវចូលប្រឡងសញ្ញាបត្រមធ្យមសិក្សាទុតិយភូមិនាពេលនេះត្រូវតែយកចិត្តទុកដាក់ខ្ពស់និងខិតខំសរសេរឱ្យល្អត្រឹមត្រូវទៅលើក្រដាសវិញ្ញាសារ មុននឹងឆ្លើយត្រូវគិតត្រិះរិះពិចារណាឱ្យបានគ្រប់ជ្រុងជ្រោយនិងត្រូវខិតខំប្រឹងប្រែងឱ្យអស់ពីសមត្ថភាព ដោយត្រូវគោរពឱ្យបានខ្ជាប់ខ្ជួន នូវបទប្បញ្ញត្តិ និងបទបញ្ជាផ្ទៃក្នុងនៃការប្រឡងនិងប្រកាន់យកនូវគោលការណ៍ “ចេះជាប់” ។

តាមការបញ្ជាក់របស់បេក្ខជនបេក្ខនារីខ្លះបានលើកឡើងថាពួកគេមានសង្ឃឹមក្នុងការប្រឡងដោយសារការសិក្សាររៀនសូត្របានច្រើនជាងឆ្នាំមុនហើយតំបន់គ្មានហានិភ័យបានចូលរៀនជាបន្តបន្ទាប់និងរៀនតាមប្រព័ន្ធអនឡាញផង ។

តាមការបញ្ជាក់របស់លោក តាន់ ប៊ុនហុង ប្រធានមន្ទីរអប់រំយុវជននិងកីឡាខេត្តកំពង់ធំមណ្ឌលប្រឡងចំនួន ១០មណ្ឌលបើកឲ្យដំណើរការប្រឡងជាធម្មតាមិនមានអ្នកឆ្លងជម្ងឺកូវីដ១៩ទេ ហើយមាន១៩៥បន្ទប់ ក្នុងនោះមានមណ្ឌលប្រឡង ផ្នែកវិទ្យាសាស្រ្ត ចំនួនពីរមណ្ឌល ស្មើរ៥១បន្ទប់ មានបេក្ខជនប្រឡងសរុបចំនួន១,២៤១នាក់ និងមណ្ឌលផ្នែកសង្គម មានចំនួន ៨មណ្ឌល ស្មើរ១៤៤បន្ទប់ មានបេក្ខជនប្រឡងសរុប៣,៥៩៥នាក់ ៕ដោយ ប៊ុន រដ្ឋា