ប្រមុខការទូតអាមេរិក និងអាល្លឺម៉ង់ព្រមានរុស្ស៊ីអំពីផលវិបាកផ្នែកសេដ្ឋកិច្ចដ៏ធ្ងន់ធ្ងរ ប្រសិនបើឈ្លានពានអ៊ុយក្រែន
វ៉ាស៊ីនតោន៖ អ្នកការទូតកំពូលរបស់សហរដ្ឋអាមេរិក និងអាល្លឺម៉ង់បានព្រមានរុស្ស៊ីថា ការឈ្លានពានអ៊ុយក្រែននឹងមានផលវិបាកផ្នែកសេដ្ឋកិច្ចយ៉ាងធ្ងន់ធ្ងរ។
រដ្ឋមន្ត្រីការបរទេសអាមេរិកលោក អាន់តូនី ប្លីងខិន និងសមភាគីអាល្លឺម៉ង់លោកស្រី អាណាលីណា បាអឺបុក បាននិយាយទៅកាន់អ្នកសារព័ត៌មានបែបនេះ បន្ទាប់ពីកិច្ចពិភាក្សារបស់ពួកលោកនៅទីក្រុងវ៉ាស៊ីនតោន នៅថ្ងៃពុធម្សិលមិញ។ ទន្ទឹមនេះ ពលរដ្ឋអាមេរិក និងអឺរ៉ុបបានថ្កោលទោសការបង្កើនយោធារបស់រុស្ស៊ីនៅព្រំដែនអ៊ុយក្រែន ហើយកំពុងស្វែងរកការដកទ័ព ខណៈដែលទីក្រុងម៉ូស្គូកំពុងទាមទារអោយមានការធានាថា អង្គការណាតូនឹងមិនពង្រីកខ្លួនបន្ថែមទៀត។ លោក ប្លីងខិន និយាយថា ប្រសិនបើរុស្សីជ្រើសរើសបង្កើនភាពតានតឹងខ្លាំងឡើងនោះ សហរដ្ឋអាមេរិក និងសម្ព័ន្ធមិត្ត នឹងឆ្លើយតបយ៉ាងឆាប់រហ័ស។ លោក ប្លីងខិន បានបញ្ជាក់ដូច្នេះថា “រុស្ស៊ីនឹងប្រឈមមុខនូវផលវិបាកដ៏ធំសម្រាប់ការឈ្លានពានជាថ្មីប្រឆាំងនឹងអ៊ុយក្រែន” ដោយលោកក៏បានសំដៅទៅលើគម្រោង Nord Stream 2 ដែលជាបំពង់បង្ហូរឧស្ម័នធម្មជាតិថ្មីសម្រាប់ដឹកឧស្ម័នធម្មជាតិពី រុស្ស៊ីទៅកាន់អាល្លឺម៉ង់ ដែលមិនទាន់ដំណើរការនៅឡើយ។
ដោយឡែកលោកស្រី បាអឺបុក ក៏បាននិយាយដែរថា អាល្លឺម៉ង់ និងអាមេរិកមានជំហររួមគ្នា។ កិច្ចប្រជុំជាបន្តបន្ទាប់ត្រូវបានកំណត់ពេលនៅសប្តាហ៍ក្រោយ ដែលមានការចូលរួមពីមន្ត្រីអាមេរិក អឺរ៉ុប និងរុស្ស៊ី៕ ប្រភព៖ NHK



