រដ្ឋមន្រ្តីការបរទេសម៉ាឡេស៊ីមានគម្រោងធ្វើទស្សនកិច្ចនៅក្នុងក្រុងអង្គរខេត្តសៀមរាប ក្នុងឱកាសអញ្ជើញចូល រួមកិច្ចប្រជុំរដ្ឋមន្ត្រីការបរទេសអាស៊ាននៅក្នុងខែមករានេះ។ ឯកអគ្គរាជទូតម៉ាឡេស៊ីប្រចាំកម្ពុជា លោកអែលឌីន ហ៊ូសៃនី ហាស៊្ហីម បង្ហើបជុំវិញគម្រោងដំណើរទស្សនកិច្ចនៅតំបន់អង្គរនេះ ក្នុងឱកាសជួបពិភាក្សាជាមួយអគ្គនា យករងអាជ្ញាធរជាតិអប្សរា លោក​ ឡុង កុសល កាលពីថ្ងៃទី៥មករា។

ឯកអគ្គរាជទូតម៉ាឡេស៊ីបញ្ជាក់ថាគោល បំណងនៃដំណើរទស្សនកិច្ចរបស់រដ្ឋមន្ត្រីការបរទេសម៉ាឡេស៊ីលោកសាអ៊ីហ៊្វូឌីន អាប់ឌូឡាហ៍ ក្នុងតំបន់អង្គរខេត្ត សៀមរាបគឺដើម្បីការស្វែងយល់ ការអភិរក្ស និងអភិវឌ្ឍន៍នៅរមណីយដ្ឋានអង្គរ។

លោកឯកអគ្គរាជទូតដដែល បានថ្លែងថា ការគ្រប់គ្រងរមណីយដ្ឋានអង្គរដោយអាជ្ញាធរជាតិអប្សរា ទទួលបានការកោតសរសើរ និងល្បី ល្បាញជាខ្លាំង ដែលធ្វើឱ្យប្រទេសដទៃទៀត រួមមានប្រទេសម៉ាឡេស៊ីផងដែលចង់ស្វែងយល់ និងរៀនសូត្រ។