ប្រទេសស៊ីបរកឃើញវ៉ារ្យ៉ង់កូវីដ-១៩ ដែលរួមបញ្ចូលគ្នារវាងអូមីក្រុង និងដែលតា
អ្នកស្រាវជ្រាវម្នាក់របស់ប្រទេសស៊ីបរកឃើញវ៉ារ្យ៉ង់នៃជំងឺកូវីដ១៩ថ្មី ដែលរួមបញ្ចូលគ្នារវាងវ៉ារ្យ៉ង់អូមីក្រុង និងដែលតា។ នេះបើតាមការចុះផ្សាយរបស់សារព័ត៌មាន Bloomberg កាលពីថ្ងៃសៅរ៍។
លោក Leondios Kostrikis សាស្ត្រាចារ្យផ្នែកវិទ្យាសាស្ត្រជីវសាស្រ្តនៅសាកលវិទ្យាល័យស៊ីប ហៅវ៉ារ្យ៉ង់ប្រភេទនេះថា «ដែលតាក្រុង» ឬ Deltacron ជាភាសាអង់គ្លេស ដោយសារតែហ្សែនរបស់វាស្រដៀងនឹងហ្សែននៃវ៉ារ្យ៉ង់អូមីក្រុង និងដែលតា។
រហូតមកដល់ពេលនេះ លោក Kostrikis និងក្រុមរបស់លោករកឃើញករណីនៃវីរុសប្រភេទថ្មីនេះចំនួន ២៥ ករណី។ នេះបើយោងតាមរបាយការណ៍របស់ Bloomberg ដដែល។ គេនៅមិនទាន់ដឹងនៅឡើយទេ ថាតើវ៉ារ្យ៉ង់នេះ អាចបង្កឱ្យមានគ្រោះថ្នាក់ ឬលទ្ធភាពនៃការឆ្លងបានកម្រិតណា ប៉ុន្តែអ្នកស្រាវជ្រាវបានបញ្ជូនការរកឃើញរបស់ខ្លួនទៅកាន់អង្គការ GISAID ដែលជាមូលដ្ឋានទិន្នន័យអន្តរជាតិតាមដានមេរោគរួចហើយ។
លោក Kostrikis រៀបរាប់ក្នុងបទសម្ភាសន៍មួយកាលពីថ្ងៃសុក្រថា គេនឹងឃើញនៅពេលអនាគតប្រសិនបើជំងឺនេះមានរោគសាស្ត្រកាន់តែច្រើន ឬមានការឆ្លងកាន់តែច្រើន ឬប្រសិនបើវានឹងវ៉ាដាច់វ៉ារ្យ៉ង់ដែលតា និងអូមីក្រុង។
ដែលតាក្រុង រកឃើញខណៈដែលវ៉ារ្យ៉ង់អូមីក្រុងបន្តរីករាលដាលយ៉ាងឆាប់រហ័សនៅទូទាំងពិភពលោក ដែលបណ្តាលឱ្យករណីនៃជំងឺកូវីដ-១៩ថ្មី កើនឡើងខ្លាំង។
យ៉ាងណាមិញ អ្នកជំនាញខាងវីរុសលោក Tom Peacock និយាយនៅលើបណ្ដាញសង្គមថា ដែលតាក្រុងប្រហែលជាមិនមែនជាវ៉ារ្យ៉ង់ពិតប្រាកដនោះទេ ប៉ុន្តែអាចជាលទ្ធផលនៃការចម្លងរោគ។ លោកនិយាយថា៖ «នៅពេលដែលវ៉ារ្យ៉ង់ថ្មីចេញតាមរយៈមន្ទីរពិសោធន៍បន្តបន្ទាប់គ្នា ការរួមបញ្ជូលគ្នាមិនមែនជារឿងចម្លែកទេ (បរិមាណដ៏តូចនៃអង្គធាតុរាវអាចបង្កឱ្យមានបញ្ហានេះ) ហើយជាធម្មតា រឿងទាំងនេះមិនត្រូវបានរាយការណ៍ដោយប្រព័ន្ធផ្សព្វផ្សាយធំៗនោះទេ»។
ទោះជាយ៉ាងណាក៏ដោយ លោក Kostrikis ការពារការរកឃើញនេះ។ ក្នុងសេចក្តីថ្លែងការណ៍តាមអ៊ីមែលទៅកាន់ Bloomberg លោកនិយាយថា ករណីដែលលោកបានកំណត់អត្តសញ្ញាណបង្ហាញពីសម្ពាធនៃការវិវត្តចំពោះខ្សែស្រឡាយ[នៃវីរុស]ដែលជាលទ្ធផលនៃការផ្លាស់ប្តូរទាំងនេះ ហើយមិនមែនជាលទ្ធផលនៃការរួមបញ្ចូលគ្នាតែមួយនោះទេ»។
ប្រភព៖ BET
