ប្រមុខការទូតប៉ូឡូញព្រមានថា អឺរ៉ុបកាន់តែជិតកើតមានសង្គ្រាមហើយក្នុងរយៈពេល៣០ឆ្នាំចុងក្រោយនេះ
វីយែ្យន៖ រដ្ឋមន្ត្រីការបរទេសប៉ូឡូញលោក Zbigniew Rau ថ្លែងថា អឺរ៉ុបកាន់តែជិតកើតមានសង្គ្រាមហើយក្នុងរយៈពេល៣០ឆ្នាំចុងក្រោយនេះ ខណៈការព្រមាននេះធ្វើឡើងបន្ទាប់ពីជុំទី៣ នៃកិច្ចចរចាផ្នែកការទូតក្នុងសប្តាហ៍នេះ ក្នុងគោលបំណងលុបបំបាត់ភាពតានតឹងជុំវិញការទាមទាររបស់រុស្ស៊ី ដែលថា អ៊ុយក្រែនមិនអាចអនុញ្ញាតឱ្យចូលរួមជាមួយអង្គការណាតូនោះទេ។
នៅរដ្ឋធានីវ៉ាស៊ីនតោន សេតវិមានបានលើកឡើងថា ការគំរាមកំហែងនៃការឈ្លានពានរបស់រុស្ស៊ីលើអ៊ុយក្រែន នៅតែមានកម្រិតខ្ពស់ជាមួយនឹងទាហានរុស្ស៊ីប្រហែល ១០ម៉ឺននាក់ត្រូវបានដាក់ពង្រាយ។ ទីប្រឹក្សាសន្តិសុខជាតិរបស់សេតវិមានលោក Jake Sullivan បានប្រាប់អ្នកយកព័ត៌មានថា ការគំរាមកំហែងនៃការឈ្លានពានយោធាគឺខ្ពស់ ហើយថា មិនមានកាលបរិច្ឆេទកំណត់សម្រាប់កិច្ចពិភាក្សាទៀតទេ… យើងត្រូវពិគ្រោះជាមួយសម្ព័ន្ធមិត្ត និងដៃគូជាមុនសិន។ ដោយឡែករុស្ស៊ីបាននិយាយថា ខ្លួនកំពុងឈានដល់ទីបញ្ចប់ នៅពេលបានព្យាយាមបញ្ចុះបញ្ចូលប្រទេសលោកខាងលិចអោយរារាំងអ៊ុយក្រែនពីការចូលរួមជាមួយអង្គការណាតូ និងវិលត្រឡប់មកវិញនូវការពង្រីកសម្ព័ន្ធភាពច្រើនទសវត្សរ៍នៅអឺរ៉ុប។
ទន្ទឹមនេះ អនុរដ្ឋមន្ត្រីការបទេសរុស្ស៊ីលោក Sergei Ryabkov ក៏បាននិយាយដែរថា អ្នកជំនាញយោធារុស្ស៊ីបានកំពុងផ្តល់ជម្រើសទៅលោកប្រធានាធិបតី វ្ល៉ាឌីមៀ ពូទីន អំពីស្ថានភាពជុំវិញអ៊ុយក្រែនកាន់តែអាក្រក់ខ្លាំង ប៉ុន្តែដំណោះស្រាយការទូតត្រូវតែផ្តល់ឱកាស។ ទោះបីជាយ៉ាងណា លោកបានលើកឡើងថា កិច្ចពិភាក្សាជាមួយសហរដ្ឋអាមេរិកនៅទីក្រុងហ្សឺណែវ កាលពីថ្ងៃចន្ទ និងជាមួយអង្គការណាតូនៅទីព្រុចសែល កាលពីថ្ងៃពុធ បានបង្ហាញថា មានផ្លូវចុងបញ្ចប់មួយ ឬភាពខុសគ្នានៃវិធីសាស្ត្រ ហើយលោកមើលឃើញថា គ្មានហេតុផលណាដើម្បីអង្គុយតុចរចាទៀតទេនាប៉ុន្មានថ្ងៃខាងមុខ ដើម្បីចាប់ផ្តើមកិច្ចពិភាក្សាដដែល៕ ប្រភព៖ Reuters




