ជនអន្តោប្រវេសន៍ជាង១០នាក់កកស្លាប់នៅ ព្រំដែនក្រិច
ជនអន្តោប្រវេសន៍ចំនួន ១២នាក់ត្រូវបានប្រទះឃើញកកស្លា.ប់នៅក្នុងក្រុងដ៏តូចមួយរបស់ប្រទេសតួកគី ស្ថិតនៅក្បែរព្រំដែនប្រទេសក្រិច។ សោកនាដកម្មនេះកើតឡើងតែមួយសប្តាហ៍ប៉ុណ្ណោះក្រោយពេលព្យុះរដូវរងារបានគ្រប់ដណ្តប់ប្រទេសទាំងពីរដោយព្រិលទឹកកក។ នេះជាការបញ្ជាក់របស់មន្ត្រីតួកគីនៅថ្ងៃពុធ ទី២ កុម្ភៈ ម្សិលមិញនេះ។
លោក Suleyman Soylu រដ្ឋមន្ត្រីមហាផ្ទៃតួកគីនិយាយថា ជនអន្តោប្រវេសន៍ទាំងនោះកកស្លា.ប់នៅក្នុងទីក្រុង Ipsala ដែលជាទីក្រុងដ៏តូចមួយស្ថិតនៅក្បែរព្រំដែន។ ជនអន្តោប្រវេសន៍តែងប្រើប្រាស់ទីតាំងនេះដើម្បីធ្វើការចំណាកស្រុកចូលសហភាពអ៊ឺរ៉ុប។
មូលហេតុដែលពួកគេគាំងស្លា.ប់ និងទីកន្លែងដែលពួកគេមក មិនទាន់ត្រូវបានដឹងច្បាស់នៅឡើយទេ ប៉ុន្តែប្រទេសតួកគី និងក្រិចបន្ទោសគ្នាទៅវិញទៅមកចំពោះសោកនាដកម្មនេះ។
រដ្ឋមន្ត្រីមហាផ្ទៃតួកគី បានបង្ហោះនៅលើបណ្តាញសង្គម Twitter ដោយចោទប្រកាន់ថា ក្រុមជនអន្តោប្រវេសន៍ទាំងនោះត្រូវបានបណ្តេញដោយមន្ត្រីព្រំដែនគ្រិច ដោយធ្វើការដោះស្បែកជើង និងសំលៀកបំពាក់របស់ពួកគេ។
លោកបានហៅក្រុមល្បាតព្រំដែន និងអង្គភាពគ្រិចថាជាក្រុមឧក្រិ.ដជន និងបាននិយាយទៀតថា សហភាពអ៊ឺរ៉ុបមានភាពខ្សោយ និងគ្មានអារម្មណ៍មនុស្សធម៌។
ប៉ុន្តែរដ្ឋមន្ត្រីអន្តោប្រវេសន៍គ្រិចលោក Notis Mitarachi បានបដិសេធន៍ការចោទប្រកាន់នោះ។
លោកថ្លែងថា «ការស្លា.ប់របស់ជនអន្តោប្រវេសន៍ ១២នាក់នៅព្រំដែនតួកគីក្បែរទីក្រុង Ipsala គឺជាសោកនាដកម្ម។ ប៉ុន្តែការពិតនៅពីក្រោយឧប្បត្តិហេតុនេះមិនដូចនឹងការលើកឡើងមិនពិតរបស់ភាគីតួកគីឡើយ»។
សូមបញ្ជាក់ថា ជនរងគ្រោះ ១២នាក់នោះស្ថិតក្នុងចំណោមជនអន្តោប្រវេសន៍ ២២នាក់។ អាជ្ញាធរក្នុងតំបន់និយាយថា ពួកគេកំពុងបន្តស្វែងរកអ្នកនៅសេសសល់ ១០នាក់ទៀត និងធ្វើការស៊ើបអង្កេតលើឧប្បត្តិហេតុនោះ៕
