វ៉ាស៊ីនតោន៖ រដ្ឋបាលមហាសមុទ្រ និងបរិយាកាសជាតិ (NOAA) បានព្យាករណ៍នៅក្នុងរបាយការណ៍មួយនាពេលថ្មីៗនេះថា កម្រិតទឹកសមុទ្រនៅជុំវិញសហរដ្ឋអាមេរិកនឹងកើនឡើងដល់កម្រិតខ្ពស់មួយនៅក្នុងរយៈពេល ៣០ឆ្នាំខាងមុខ ដោយសារការប្រែប្រួលអាកាសធាតុ។ ការសិក្សាព្យាករណ៍ថា កម្រិតទឹកសមុទ្រនៅតាមបណ្តោយច្រាំងទន្លេសហរដ្ឋអាមេរិកនឹងកើនឡើងជាមធ្យម២៥ ទៅ ៣០សង់ទីម៉ែត្រនៅឆ្នាំ២០៥០ ។ កម្រិតទឹកសមុទ្រនឹងមានទំនោរកើនឡើងខ្ពស់ នៅតាមឆ្នេរសមុទ្រអាត្លង់ទិក និងឈូងសមុទ្រ ដោយសារតែមានការបាក់ដីខ្លាំងជាងនៅតាមបណ្តោយឆ្នេរសមុទ្រប៉ាស៊ីហ្វិក។

នាយកសេវាមហាសមុទ្រជាតិរបស់ NOAA លោក Nicole LeBoeuf បាននិយាយនៅក្នុងសេចក្តីសង្ខេបនៃរបាយការណ៍ថា ការបំផ្លាញទឹកជំនន់តាមឆ្នេរសមុទ្រធម្មតានៃកម្រិតទឹកសមុទ្រនាពេលបច្ចុប្បន្ននេះ, លក្ខ ខណ្ឌអាកាសធាតុ និងហេដ្ឋារចនាសម្ព័ន្ធ ត្រូវបានគេរំពឹងថា នឹងកើតឡើងច្រើនជាង ១០ដងក្នុងរយៈពេល ៣០ឆ្នាំខាងមុខ។ មន្ត្រី NOAA បាននិយាយថា ការសិក្សានេះត្រូវបានរចនាឡើងជាឧបករណ៍រៀបចំផែនការ ដើម្បីកាត់បន្ថយ និងសម្របខ្លួនទៅនឹងការកើនឡើងកម្ពស់ទឹកសមុទ្រដែលបានព្យាករណ៍ មានភាពប្រាកដប្រជាខ្ពស់ក្នុងរយៈពេលបីទសវត្សរ៍ខាងមុខនេះ ដោយមិនគិតពីកិច្ចខិតខំប្រឹងប្រែងណាមួយ ដើម្បីទប់ស្កាត់ការបំភាយឧស្ម័នផ្ទះកញ្ចក់ដែលកំពុងឡើងកំដៅផែនដី។

ទីប្រឹក្សាអាកាសធាតុជាតិ នៃសេតវិមានរបស់ប្រធានាធិបតីអាមេរិក គឺលោក Gina McCarthy បាននិយាយនៅក្នុងការសិក្សាស្រាវជ្រាវថា ទិន្នន័យថ្មីស្តីពីការកើនឡើងនៃទឹកសមុទ្រ គឺជាការបញ្ជាក់ឡើងវិញចុងក្រោយបង្អស់ ដែលថា វិបត្តិអាកាសធាតុរបស់យើង ដូចដែលលោក ចូ បៃដិន បាននិយាយ កំពុងតែឡើងក្រហម ៕ ប្រភព៖ CGTN ប្រែសម្រួលដោយ៖ ឈឹម ទីណា