កៀវ៖ នៅក្នុងសារវីដេអូថ្មីមួយដែលបានបង្ហោះនៅលើហ្វេសប៊ុក ប្រធានាធិបតីអ៊ុយក្រែនលោក Volodymyr Zelensky បានអំពាវនាវឱ្យសមភាគីរុស្ស៊ីលោក វ្ល៉ាឌីមៀ ពូទីន ចូលតុដើម្បីចរចាគ្នា។ នេះបើតាមសារព័ត៌មាន RT នៅថ្ងៃសុក្រនេះ។

បើតាមសារព័ត៌មាន The Straits Times លោក Zelenskiy បាននិយាយនៅក្នុងសុន្ទរកថា នៅព្រឹកថ្ងៃសុក្រនេះថា រុស្ស៊ីនឹងត្រូវនិយាយជាមួយយើងឆាប់ៗ ឬក្រោយមក និយាយអំពីរបៀបបញ្ចប់ការប្រយុទ្ធគ្នា និងបញ្ឈប់ការឈ្លានពាននេះ។ ការសន្ទនានេះចាប់ផ្ដើមកាន់តែឆាប់ ការខាតបង់របស់រុស្ស៊ីកាន់តែតិច។

មុននេះ លោក Zelenskiy បានព្រមានថា អ្នកបំផ្លិចបំផ្លាញជនជាតិរុស្ស៊ីបានចូលមកក្នុងទីក្រុងកៀវ ហើយថា ជីវិតរបស់លោក ក៏ដូចជាជីវិតគ្រួសាររបស់លោកកំពុងស្ថិតនៅក្រោមការគំរាមកំហែង។

លោក Zelenskiy បាននិយាយនៅក្នុងសន្ទរកថា តាមវីដេអូខ្លីមួយថា យោងទៅតាមការស៊ើបការណ៍សម្ងាត់ដែលមានសត្រូវបានសម្គាល់ខ្ញុំជាគោលដៅទី១ និងគ្រួសាររបស់ខ្ញុំជាគោលដៅទី២ ពួកគេចង់បំផ្លាញអ៊ុយក្រែនតាមបែបនយោបាយដោយបំផ្លាញប្រមុខរដ្ឋ៕ ប្រភព៖ RT និង The Straits Times ដោយ៖ ឈឹម ទីណា