ព្រឹត្តិការណ៍ប្រកួតកីឡាវាយកូនគោលអាស៊ានណាប៉ូលើកទី៤០ នាព្រឹកថ្ងៃទី៣ ខែមិនា ឆ្នាំ២០២២នេះ បានដំណើរការប្រកួតផ្លូវការហើយ នៅលើទីលានកីឡាវាយកូនគោល វឌ្ឍន:រីស៊ត ដោយមានការចូលរួមពីបណ្តាប្រទេសក្នុងតំបន់អាស៊ាន ដែលមកចូលរួមក្នុងកិច្ចប្រជុំអាស៊ានណាប៉ូ លើកទី៤០ ។

ការប្រកួតនេះ បានរៀបចំឡើងក្នុងគោលបំណង ដើម្បីចូលរួមអបអរសាទរ កិច្ចប្រជុំអាស៊ានណាប៉ូ ដែលកម្ពុជាធ្វើជាម្ចាស់ផ្ទះ និងជួយលើកកម្ពស់ផ្សព្វផ្សាយអំពីកីឡាវាយកូនគោលកម្ពុជា ទៅកាន់បណ្តាប្រទេសដែលជាសមាជិកអាស៊ាន។

ចំពោះការប្រកួតបែងចែកជា២ក្រុម .ក្រុមទី១ ការប្រកួតសម្រាប់ថ្នាក់ដឹកនាំVIP ដោយកីឡាករវាយចេញពីទី ពណ៌ស ។ ក្រុមទី២ . ការប្រកួតសម្រាប់អ្នកតំណាងប្រទេសនីមួយៗដោយក្នុង១ប្រទេសមានកីឡាករ៤រូប ដោយការវាយចេញរបស់កីឡាករ គឺវាយចេញពីទី ពណ៌មាស ។

សម្រាប់ប្រព័ន្ធការប្រកួត គឺត្រូវយកពិន្ទុសុទ្ធមកគិត (Gross Score) ការប្រកួតជាក្រុមត្រូវគិតយកពិន្ទដែលល្អជាងគេ ៣រូប ក្នុងចំណោមកីឡាករ៤នាក់ យកមកបូកបញ្ចូលគ្នា។

ចំពោះពានរង្វាន់ជ័យលាភី នឹងប្រកាសលទ្ធផលនាល្ងាច ថ្ងៃទី៤ ខែមិនា ឆ្នាំ២០២២ នៅសណ្ឋាគារ សុខា មានជ័យលាភីសម្រាប់ថ្នាក់ដឹកនាំ VIP និង ជ័យលាភីសម្រាប់អ្នកតំណាងប្រទេស ជ័យលាភីទី១ និងជើងឯករងទី២ មានពាន៤ដូចគ្នា និងពានសម្រាប់ ឯកត្តជន រួមជ័យលាភីផ្សេងៗ ដូចជាអ្នកវាយជិតបំផុត និងវាយបានឆ្ងាយជាងគេ ៕អត្ថបទ៖ ជាវ ចន្ធូ