កំពង់ស្ពឺ ៖ នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង បានថ្លែងថា សមិទ្ធផលនានាដែលកើតមាននៅទូទាំងប្រទេសសព្វថ្ងៃនេះដោយការដឹកនាំដ៏ត្រឹមត្រូវរបស់គណបក្សប្រជាជនកម្ពុជា។ ជាក់ស្ដែងព្រះវិហារ រួមនិងសមិទ្ធផល នៅក្នុងវត្តក្រាំងតារ័ត្ន ដែលបានកាត់ឬសសីមា និងដាក់ឱ្យប្រើប្រាស់ជាផ្លូវការនាពេលនេះ គឺជាសមិទ្ធផលថ្មីមួយទៀត សម្រាប់ជាចំណងដៃចំពោះព្រះសង្ឃ ប្រជាពលរដ្ឋ ពុទ្ធបរិស័ទ ស្រុកសំរោងទង សម្រាប់បូជា គោរពប្រតិបត្តិតាមគន្លងព្រះពុទ្ធសាសនា។

ការលើកឡើងរបស់នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង តំណាងដ៏ខ្ពង់ខ្ពស់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ខណៈអញ្ជើញចូលរួមពិធីបុណ្យកាត់ឫសសីមា ព្រះវិហារ និងសមិទ្ធផលនានាឆ្លងដាក់ឲ្យប្រើប្រាស់ជាផ្លូវការ ក្នុងវត្តក្រាំងតារ័ត្ន ឃុំព្នាយ ស្រុកសំរោងទង ខេត្តកំពង់ស្ពឺ នាថ្ងៃទី២០ ខែមីនា ឆ្នាំ២០២២។

នាយឧត្តមសេនីយ៍បានបញ្ជាក់ថា «ក្រោមការដឹកនាំរបស់គណបក្សប្រជាជនកម្ពុជា និងនយោបាយឈ្នះឈ្នះរបស់សម្តេចតេជោ ហ៊ុន សែន នាយករដ្ឋមន្ត្រី ជាប្រមុខ បានខិតខំប្រឹងប្រែង រក្សាបាននូវសុខសន្តិភាពពេញលេញ ខាងនយោបាយ សន្តិសុខរឹងមាំ ការអភិវឌ្ឍសង្គម សេដ្ឋកិច្ច សង្គមកិច្ច សាមគ្គី ឯកភាពជាតិ ការពង្រឹងលទ្ធិប្រជាធិបតេយ្យ ជាពិសេសលើកកម្ពស់ជីវភាពរស់នៅរបស់ប្រជាពលរដ្ឋមានការរីកចម្រើន»។

វត្តក្រាំងតារ័ត្ន គឺជាវត្តគណៈមហានិកាយ ស្ថិតនៅក្នុងភូមិក្រាំងតារ័ត្ន ឃុំព្នាយ ស្រុកសំរោងទង ខេត្តកំពង់ស្ពឺ កាលពីដើមឡើយ មានឈ្មោះហៅថា វត្តចំប៉ា ដោយបានកសាងឡើងក្នុងអំឡុងឆ្នាំ១៨៣១ គិតមកដល់ពេលនេះមានអាយុកាល ១៩១ឆ្នាំមកហើយ។

តាមរបាយការណ៍របស់លោក វ៉ី សំណាង អភិបាលនៃគណៈអភិបាលខេត្តកំពង់ស្ពឺ បានឲ្យដឹងថា សមិទ្ធផលវត្តក្រាំងតារ័ត្ន ដែលត្រូវប្រារព្ធពិធីបុណ្យឆ្លង និងដាក់សម្ពាធឲ្យប្រើប្រាស់នាពេលនេះ បានកសាងឡើងក្រោយឆ្នាំ២០០៦ ក្រោមការដឹកនាំរបស់ព្រះតេជគុណ ប៉ុល ច័ន្ទរ៉ា ព្រះចៅអធិការវត្ត ហើយបានគៀងគរសប្បុរសជនជិតឆ្ងាយដើម្បីកសាងសមិទ្ធផលនានាជាច្រើន រួមមាន ព្រះវិហារ កុដិ ២ខ្នង សាលាបាលី ស្ពាន ស្រះទឹក ក្លោងទ្វារ ដងទង់១គូរ ព្រះពុទ្ធដិមាធ្វើអំពីស្ពាន់និងថ្ម និងសមិទ្ធផលនានាជាច្រើនទៀត ដោយចំណាយអស់ទឹកប្រាក់ ៨៧ម៉ឺន ៦ពាន់ ៣០០ដុល្លារអាមេរិក។

ក្នុងឱកាសនោះ នាយឧត្តមសេនីយ៍កិត្តិបណ្ឌិត ហ៊ឹង ប៊ុនហៀង បាននាំយកអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត ប្រតេន វត្តក្រាំងតារ័ត្ន បច្ច័យ ១ម៉ឺនដុល្លា និងប្រាក់រៀល ៣លានរៀល។

ឧបត្ថម្ភស្រុកសំរោងទង អង្ករ ៥តោន, កំព្យូទ័រ ១គ្រឿង, ព្រីមធឺ ១គ្រឿង និងម៉ាស៊ីនថតចម្លង ១គ្រឿង។ ឧបត្ថម្ភដល់ឃុំទាំង១៥ឃុំ ក្នុង១ឃុំៗ កំព្យូទ័រ ១គ្រឿង និងព្រីនធឺ ១គ្រឿង។ ប្រកាសឧបត្ថម្ភដល់់បឋមសិក្សាក្រាំងតារ័ត្ន មាន អគារសិក្សា ១ខ្នង, ម៉ូតូ ២គ្រឿង, កំព្យូទ័រ ១គ្រឿង និងព្រីនធឺ ១គ្រឿង។ ប្រគេនបច្ច័យទិសឥន្ទកិល ចំនួន ៨លានរៀល និងទិសទាំង៨ ក្នុង១ទិសៗ ចំនួន ៥០ម៉ឺនរៀល។ ព្រមទាំងបានប្រគេនបច្ច័យ ព្រះសង្ឃ ចែកជូនដល់ តាជីយាយជី, ក្រុមប្រឹក្សាឃុំ ស្រុក, យុវជនទាំង៣ប្រភេទ,ប្រជាពលរដ្ឋ ពុទ្ធបរិស័ទចំណុះជើងវត្ត និងកងកម្លាំងមានសមត្ថកិច្ចជាច្រើនទៀតផងដែរ ៕ ដោយ-រ៉ាវុធ