ប្រេសិតពិសេសរបស់ប្រធានអាស៊ានធ្វើសន្និសីទកាសែតបញ្ជាក់ពីលទ្ធផលនៃដំណើរទស្សនកិច្ចនៅមីយ៉ាន់ម៉ា
ភ្នំពេញៈ ឯកឧត្តម ឧបនាយករដ្ឋមន្ត្រី ប្រាក់ សុខុន ជាប្រេសិតពិសេសរបស់ប្រធានអាស៊ានស្តីពីមីយ៉ាន់ម៉ានិងជារដ្ឋមន្ត្រី ក្រសួងការបរទេសនិងសហប្រតិបត្តិការអន្តរជាតិបានធ្វើសន្និសីទសារព័ត៌មានអំពីដំណើរទស្សនកិច្ចការងារនៅប្រទេសមីយ៉ាន់ម៉ា នៅអាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៣ ខែមីនា ឆ្នាំ២០២២ នេះ។
ឯកឧត្តមឧបនាយករដ្ឋមន្ត្រី ប្រាក់ សុខុន បានមានប្រសាសន៍ថា ដំណើរទស្សនកិច្ចលើកដំបូងទៅមីយ៉ាន់ម៉ាដើម្បីពិនិត្យ តាមដាននិងពិនិត្យលទ្ធផល នៃដំណើរទស្សនកិច្ចរបស់សម្តេចតេជោ ហ៊ុន សែន ទៅមីយ៉ាន់ម៉ាកាលពីថ្ងៃទី៧-៨ ខែមករា ឆ្នាំ២០២២ , កិច្ចសន្ទនារវាងសម្តេចតេជោ ហ៊ុន សែន ជាមួយឯកឧត្តមនាយឧត្តមសេនីយ៍ជាន់ខ្ពស់ មីង អោង ឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា , កិច្ចប្រជុំចង្អៀតរដ្ឋមន្ត្រីការបរទេសអាស៊ាន ។
ឯកឧត្តមឧបនាយករដ្ឋមន្ត្រីបានបន្តថា ឯកឧត្តមបានជួបជាមួយឯកឧត្តមនាយឧត្តមសេនីយ៍ជាន់ខ្ពស់ មីង អោង ឡាំង ដើម្បីសម្របសម្រួលការងារពង្រឹងបទឈប់បាញ់ ជំនួយមនុស្សធម៌ និងលើកឡើងអំពីទស្សនកិច្ចរបស់សម្តេចតេជោ ហ៊ុន សែន ទៅមីយ៉ាន់ម៉ាកាលពីថ្ងៃទី៧ – ៨ ខែមករា ឆ្នាំ២០២២។
ប្រេសិតពិសេសរបស់ប្រធានអាស៊ានបានគូសបញ្ជាក់ពីការប្តេជ្ញាចិត្តក្នុងការអនុវត្តអាណត្តិជាប្រេសិតពិសេសគឺមិន ជ្រៀតជ្រែកចូលកិច្ចការផ្ទៃក្នុង ហើយបានពន្យល់ពីភាពបន្ទាន់គឺការបញ្ឈប់អំពើហិង្សា ជំនួយមនុស្សធម៌ និងការស្វែងរកដំណោះស្រាយប្រកបដោយបរិយាបន្ននិងសង្កត់ធ្ងន់ទៅលើការចូលរួមពីភាគីពាក់ព័ន្ធទាំងអស់និងបានស្វាគមន៍បទឈប់បាញ់របស់ឯកឧត្តម នាយឧត្តមសេនីយ៍ជាន់ខ្ពស់ មីង អោង ឡាំងប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា។
ប្រេសិតពិសេសបានបន្តថា ទាក់ទងអំពើហិង្សានៅមីយ៉ាន់ម៉ានៅតែបន្តកើតមានគឺស្នើសុំឲ្យមានការអត់ធ្មត់ចំពោះ ការប្រើកម្លាំងយោធាហើយបានស្នើឲ្យមានកិច្ចសហប្រតិបត្តិការ និងការគាំទ្រពីឯកឧត្តមនាយឧត្តមសេនីយ៍ជាន់ខ្ពស់ មីង អោង ឡាំង ស្តីពីជំនួយមនុស្សធម៌ ប្រកបដោយសុវត្ថិភាព មិនមានការរារាំង ការរើសអើង បូករួមទាំងការចាក់វ៉ាក់សាំង។
ឯកឧត្តមឧបនាយករដ្ឋមន្ត្រី ប្រាក់ សុខុន បានបញ្ជាក់ថាកិច្ចសន្ទនានយោបាយត្រូវចូលរួមពីគ្រប់ភាគីពាក់ព័ន្ធទាំងអស់ ដើម្បីចូលរួមផ្សះផ្សាជាតិ ហើយប្រេសិតពិសេសធ្វើជាស្ពានគ្រប់ភាគីពាក់ព័ន្ធទាំងអស់។លោកបានរំលឹកពីសំណើរបស់ សម្តេចតេជោ ហ៊ុន សែន ពីការរៀបចំឲ្យមានយន្តការត្រយការដើម្បីចូលរួមសកម្មភាពរបស់អាស៊ានក្នុងការចូលរួម អនុវត្តកិច្ចព្រមព្រៀងជាឯកច្ឆ័ន្ទ ប្រាំចំណុច ជួយឲ្យមីយ៉ាន់ម៉ាវិលទៅរកភាពប្រក្រតីឡើងវិញ។
ឯកឧត្តមឧបនាយករដ្ឋមន្ត្រីបានបញ្ជាក់ទៀតថា មានអ្នកខ្លះថាដំណើរទស្សនកិច្ចទៅមីយ៉ាន់ម៉ាដើម្បីផ្តល់ភាពស្របច្បាប់ឲ្យរដ្ឋាភិបាលមីយ៉ាន់ម៉ា គឺជាការមិនពិតទេ។ កម្ពុជាគ្មានអ្វីក្រៅពីការជួយមីយ៉ាន់ម៉ា និងប្រជាជនមីយ៉ាន់ម៉ារួចផុតពី សោកនាដកម្មតែប៉ុណ្ណោះ។
ឯកឧត្តមបានបន្តថា ចំណែកឯកឧត្តមនាយឧត្តមសេនីយ៍ជាន់ខ្ពស់ មីង អោងឡាំង ប្រធានក្រុមប្រឹក្សារដ្ឋបាលរដ្ឋនៃ សាធារណរដ្ឋសហភាពមីយ៉ាន់ម៉ាបានសម្តែងការព្រួយបារម្ភពីការលួចនាំអាវុធចូលដែលនាំឲ្យមានអំពើហិង្សាឥតឈប់ឈរ។ឯកឧត្តមនឹងបើកផ្លូវឲ្យប្រេសិតពិសេសបានជួបជាមួយជាមួយតួអង្គសំខាន់ៗ និងប្តេជ្ញាគាំទ្រប្រេសិតពិសេស។ឯកឧត្តមនាយឧត្តមសេនីយ៍ជាន់ខ្ពស់ មីង អោង ឡាំង បានបញ្ជាក់ថា “គ្មានអ្វីសំខាន់ជាងជីវិតមនុស្សឡើយ”។
សូមជម្រាបថា ក្នុងនាមជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជាបានដឹកនាំគណៈប្រតិភូអញ្ជើញទៅបំពេញ ទស្សនកិច្ចការងារនៅសាធារណរដ្ឋសហភាពមីយ៉ាន់ម៉ា ពីថ្ងៃទី ២១ដល់ថ្ងៃទី២៣ខែមីនាឆ្នាំ២០២២តបតាមការអញ្ជើញ របស់ក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា។
ក្នុងឱកាសបំពេញទស្សនកិច្ចការងារនៅមីយ៉ាន់ម៉ា ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនិង សហប្រតិបត្តិការអន្តរជាតិនិងជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ាបានអញ្ជើញចូលជួបសវនាការចំពោះឯកឧត្តមនាយឧត្តមសេនីយ៍ជាន់ខ្ពស់ មីង អោងឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាព មីយ៉ាន់ម៉ា។ នៅក្នុងជំនួបនេះ ភាគីទាំងពីរបានពិភាក្សា និងផ្លាស់ប្តូរទស្សនៈស្តីពីការអនុវត្តនិងវឌ្ឍនភាពនៃការ ព្រមព្រៀងជាឯកច្ឆន្នប្រាំចំណុចរបស់អាស៊ាន ក្រោយពីដំណើរទស្សនកិច្ចរបស់សម្តេចតេជោនាយករដ្ឋមន្ត្រី ហ៊ុន សែន កាលពីខែមករា ឆ្នាំនេះ។
បន្ទាប់ពីជួបជាមួយនាយឧត្តមសេនីយ៍ជាន់ខ្ពស់ មីង អោង ឡាំង ឧត្តមឧបនាយករដ្ឋមន្ត្រី ប្រាក់ សុខុនបានបន្តជួបជាមួយ ឯកឧត្តម វុនណា ម៉ោង ល្វីន រដ្ឋមន្ត្រីការបរទេស, ឯកឧត្តម កូ កូឡាំង រដ្ឋមន្ត្រីសហប្រតិបត្តិការអន្តរជាតិនិងជាប្រធាន ក្រុមការងារស្តីពីជំនួយមនុស្សធម៌អាស៊ាននិងឯកឧត្តមឧត្តមសេនីយ៍ យ៉ា ព្យេ រដ្ឋមន្ត្រីការិយាល័យរដ្ឋាភិបាលសហព័ន្ធ និងជាប្រធានគណៈកម្មាធិការសាមគ្គីភាពជាតិ និងកសាងសន្តិភាពផងដែរ៕ដោយៈពលជ័យ
