អាមេរិកប៉ាន់ប្រមាណថា រុស្ស៊ីដាក់ពង្រាយជិត៣/៤នៃកងកម្លាំងរបស់ខ្លួនក្នុងសង្រ្គាមអ៊ុយក្រែន
មេបញ្ជាការបញ្ជាការដ្ឋានភូមិភាគអឺរ៉ុបរបស់សហរដ្ឋអាមេរិក លោកឧត្ដមសេនីយ៍ Tod Wolters និយាយកាលពីថ្ងៃអង្គារថា រុស្ស៊ីបានដាក់ពង្រាយជិត៣/៤នៃកងកម្លាំងយោធាសរុបរបស់ខ្លួន ទៅក្នុងការឈ្លានពាននៅអ៊ុយក្រែន។
លោក Wolters និយាយក្នុងអំឡុងសក្ខីកម្មទៅកាន់គណៈកម្មាធិការសេវាប្រដាប់អាវុធព្រឹទ្ធសភាអាមេរិកថា «ក្នុងការកំណត់ផ្សេងគ្នា ខ្ញុំអាចផ្ដល់ឱ្យនូវចំនួនជាក់លាក់មួយ ប៉ុន្តែប្រហែល ៧០ ទៅ ៧៥ ភាគរយ» ត្រូវបានប្រើក្នុងការលុកលុយអ៊ុយក្រែននាពេលនេះ។
នៅពេលសួរថាតើអ៊ុយក្រែននឹងអាចបញ្ឈប់រុស្ស៊ីដោយជោគជ័យ ឬរុញកងកម្លាំងឱ្យថយក្រោយវិញបានឬយ៉ាងណា លោក Wolters និយាយថា លោកជឿថាអ៊ុយក្រែន «អាចជោគជ័យក្នុងការបញ្ឈប់កងកម្លាំងរុស្ស៊ី» ប៉ុន្តែលោកមិនបង្ហាញសុទិដ្ឋិនិយមវែងឆ្ងាយទៀតអំពីឱកាសជ័យជម្នះរបស់អ៊ុយក្រែននោះទេ។
ជាមួយគ្នានោះ មន្ត្រីជាន់ខ្ពស់ប្រចាំអឺរ៉ុបដដែលក៏បាននិយាយផងដែរអំពីបញ្ហាដែលអាចមានចន្លោះប្រហោងក្នុងការប្រមូលផ្ដុំព័ត៌មានរបស់ភ្នាក់ងារចារកម្មសម្ងាត់អាមេរិក ដែលឱ្យអាមេរិកវាយតម្លៃហួសហេតុសមត្ថភាពរបស់រុស្ស៊ី ហើយមើលស្រាលសមត្ថភាពការពាររបស់អ៊ុយក្រែន។
ពេលរុស្ស៊ីចាប់ផ្ដើមលុកលុយអ៊ុយក្រែន ចារកម្មរបស់សហរដ្ឋអាមេរិកវាយតម្លៃថា ការវាយប្រហារទូទាំងប្រទេសអាចនាំឱ្យរដ្ឋធានីកៀវធ្លាក់ចូលទៅក្នុងដៃរុស្ស៊ីត្រឹមរយៈពេលប៉ុន្មានថ្ងៃប៉ុណ្ណោះ។ ប៉ុន្តែចូលដល់ខែទី២ហើយ យោធារុស្ស៊ីនៅតែបរាជ័យ ដោយសារបញ្ហានិរន្តរភាព និងភស្តុភារ រួមជាមួយនឹងការតស៊ូដ៏មិននឹកស្មានដល់ពីកងកម្លាំងអ៊ុយក្រែន។
ខណៈដែលការប្រយុទ្ធគ្នាបន្តអូសបន្លាយ រុស្ស៊ីនិយាយកាលពីថ្ងៃអង្គារបន្ទាប់ពីកិច្ចពិភាក្សាស្វែងរកដំណោះស្រាយនាទីក្រុងអ៊ីស្តង់ប៊ុលថា ខ្លួននឹង«កាត់បន្ថយយ៉ាងសណ្ធឹក»នូវការវាយប្រហារយោធារបស់ខ្លួនជុំវិញរដ្ឋធានីកៀវ និងក្រុង Chernihiv ក្រោយយោធារុស្ស៊ីនិយាយថា ខ្លួននឹងផ្ដោតសំខាន់លើការប្រយុទ្ធនៅតំបន់ពួកផ្ដាច់ខ្លួនដែលរុស្ស៊ីគាំទ្រនៅភាគខាងកើតអ៊ុយក្រែនវិញ។
ប្រភព៖ US commander estimates nearly three-quarters of Russian forces are dedicated to Ukraine https://www.foxnews.com/politics/us-commander-nearly-three-quarters-russian-forces-dedicated-to-ukraine
