វ៉ាស៊ីនតោន៖ សេតវិមានបានបញ្ជាក់ថា ប្រធានាធិបតីអាមេរិកលោក ចូ បៃដិន បានទទួលព័ត៌មានសង្ខេបអំពី “ការបាញ់ប្រហារដ៏រន្ធត់” ដែលបណ្តាលឱ្យមនុស្ស១០នាក់ស្លាប់នៅឯផ្សារទំនើបមួយកន្លែង ស្ថិតក្នុងទីក្រុងបាហ្វេឡូ រដ្ឋញូវយ៉ក ដែលបានកើតឡើងនៅថ្ងៃសៅរ៍ចុងសប្តាហ៍មុន ដោយខ្មាន់កំាភ្លើងវ័យ ១៨ឆ្នាំម្នាក់។

លោក ចូ បៃដិន បានបញ្ជាក់នៅក្នុងសេចក្តីថ្លែងការណ៍ថា អំពើភេរវកម្មក្នុងស្រុកណាមួយ រួមទាំងទង្វើដែលប្រព្រឹត្តឡើងក្នុងនាមមនោគមវិជ្ជាជាតិនិយមស្បែកសដែលគួរឱ្យស្អប់ខ្ពើម គឺផ្ទុយនឹងអ្វីៗទាំងអស់ដែលយើងឈរនៅអាមេរិក។ យើងត្រូវតែធ្វើអ្វីគ្រប់យ៉ាងតាមអំណាចរបស់យើង ដើម្បីបញ្ចប់អំពើភេរវកម្មក្នុងស្រុកដែលជំរុញដោយស្អប់។

អ្នកនាំពាក្យសេតវិមានលោកស្រី ខារីន ជីន ផាយអឺ (Karine Jean-Pierre) បាននិយាយនៅក្នុងសេចក្តីថ្លែងការណ៍មួយថា លោក បៃដិន នឹងបន្តទទួលបានព័ត៌មានថ្មីៗពេញមួយល្ងាច និងថ្ងៃស្អែក នៅពេលព័ត៌មានបន្ថែមមានការវិវត្តន៍ចុងក្រោយ។

បើតាមសេចក្តីថ្លែងការណ៍ដដែលនេះ លោកប្រធានាធិបតី និងលោកជំទាវទីមួយកំពុងអធិស្ឋានដល់អ្នកដែលបានបាត់បង់ជីវិត និងសម្រាប់មនុស្សជាទីស្រឡាញ់របស់ពួកគេ។

បើតាមអាជ្ញាធរអាមេរិក ជនសង្ស័យដែលត្រូវបានបង្ហាញអត្តសញ្ញាណថា មានឈ្មោះ ភេថុន ហ្កិនដ្រុន (Payton Gendron) គឺបានធ្វើការ livestream សកម្មភាពបាញ់ប្រហាររបស់ខ្លួនថែមទៀតផង។

បុរសវ័យ១៨ឆ្នាំរូបនេះ ត្រូវបានចោទប្រកាន់ពីបទមនុស្សឃាតកម្រិតទី១ ដែលអាចប្រឈមការជាប់ពន្ធនាគារមួយជីវិត ខណៈទីភ្នាក់ងារ FBI កំពុងស៊ើបអង្កេតករណីនេះ ក្រោមការសន្និដ្ឋានថា ជាអំពើស្អប់ខ្ពើមរើសអើង និងហិង្សាជ្រុលនិយម៕ ប្រភព៖ ស៊ីនហួរ ប្រែសម្រួល៖ ទីណា និងបុត្រា