កូរ៉េខាងត្បូងនិងជប៉ុននឹងធ្វើឲ្យកិច្ចព្រមព្រៀងចែករំលែកព័ត៌មានសន្តិសុខរស់ឡើងវិញ ក្រោមរូបភាពគំរាមកំហែងពីកូរ៉េខាងជើង
ជប៉ុននិងកូរ៉េខាងត្បូងដែលតែងតែអាក់អន់ស្រពន់ចិត្តជាមួយគ្នាជារឿយៗ ដោយសារដានប្រវត្តិសាស្រ្តដ៏ជូរចត់រវាងប្រទេសទាំងក្នុងសម័យកាលអនានិគមនិយមជប៉ុន បានងាកមកចាប់ដៃ ល្អូកល្អើននឹងគ្នាបន្តិច តំបន់នោះហាក់រងការគំរាមកំហែងដោយប្រទេសកូរ៉េខាងជើងតាមរយៈការបាញ់សាកល្បងគ្រាប់មីស៊ីលជាច្រើនលើកថ្មីៗនេះ។
រដ្ឋបាលថ្មីរបស់កូរ៉េខាងត្បូងដែលកើតចេញចំពេលវិបត្តិសង្គ្រាមអ៊ុយក្រែនដែលលុកលុយពីប្រទេសមហាអំណាចរុស្ស៊ី និងរងការគម្រាមផ្នែកសម្ពាធពីសំណាក់ប្រទេសកូរ៉េខាងជើង កំពុងបង្កើនកិច្ចខិតខំប្រឹងប្រែងដើម្បីពង្រឹងទំនាក់ទំនងត្រីភាគីជាមួយសហរដ្ឋអាមេរិក និងជប៉ុន ដោយសើរើផ្តល់តម្លៃលើកិច្ចព្រមព្រៀងសន្តិសុខទូទៅនៃព័ត៌មានយោធា (GSOMIA)។
ប្រទេសជិតខាងទាំងពីរបានបង្កើតកិច្ចព្រមព្រៀងចែករំលែកព័ត៌មានសម្ងាត់ជាលើកដំបូងក្នុងឆ្នាំ២០១៦ ដោយបើកបណ្តាញសម្រាប់ការផ្លាស់ប្តូរព័ត៌មានយោធាដោយផ្ទាល់ជាលើកដំបូង។ ពីមុន ពួកគេម្នាក់ៗនឹងចែករំលែកព័ត៌មានសំខាន់ៗទាក់ទងនឹងសន្តិសុខតាមរយៈអាជ្ញាធរសហរដ្ឋអាមេរិក ដែលជាសម្ព័ន្ធមិត្តរួមរបស់ពួកគេ។ នេះបើយោងតាម ព័ត៌មាន Korea Herald ដែលមានមូលដ្ឋាននៅកូរ៉េខាងត្បូង។
សារព័ត៌មាននេះបានដកស្រង់សម្តីអ្នកជំនាញ ដោយនិយាយថា ទោះបីជាទំនាក់ទំនងកូរ៉េខាងត្បូង-ជប៉ុនស្ថិតនៅចំនុចទាបបំផុតដោយសារតែភាពខុសគ្នារបស់ប្រទេសទាំងពីរលើអំពើឃោរឃៅរបស់ជប៉ុនដែលគ្របដណ្តប់តាំងពីការកាន់កាប់អាណានិគមជប៉ុនលើប្រទេសកូរ៉េ ការផ្សះផ្សាការទូតរវាងប្រទេសទាំងគួរតែរស់ឡើងវិញតាមរយៈកិច្ចព្រមព្រៀងសន្តិសុខទូទៅនៃព័ត៌មានយោធា។
យោងតាមក្រសួងការបរទេសអាមេរិក state.gov នៅក្នុងជំនួបទ្វេភាគីលើកដំបូងជាមួយរដ្ឋមន្ត្រីការបរទេសអាមេរិក លោក អានតូនី ប្ល៊ីនកែន (Antony Blinken) នៅទីក្រុងវ៉ាស៊ីនតោន រដ្ឋមន្ត្រីការបរទេសកូរ៉េខាងត្បូង លោក ផាក ជីន (Park Jin) បាននិយាយថា៖«ទាក់ទងនឹង GSOMIA យើងចង់ឱ្យ GSOMIA មានលក្ខណៈធម្មតាឱ្យបានឆាប់តាមដែលអាចធ្វើទៅបាន រួមជាមួយនឹងការធ្វើឱ្យប្រសើរឡើងនូវទំនាក់ទំនងកូរ៉េ-ជប៉ុន។»
លោក ផាក ជីន បាននិយាយថា៖«ដើម្បីដោះស្រាយជាមួយនឹងការគំរាមកំហែងពីកូរ៉េខាងជើង យើងត្រូវមានការសម្របសម្រួលគោលនយោបាយ និងការចែករំលែកព័ត៌មានរវាងកូរ៉េ ជប៉ុន និងសហរដ្ឋអាមេរិក»។
កូរ៉េខាងត្បូងនិងកូរ៉េខាងជើងដែលពុះជ្រៀកក្នុងឆ្នាំ១៩៥៣ ដោយការប្រកាន់របបដឹកនាំប្រទេសតាមរបៀបប្លុកសេរីនិងប្លុកកុម្មុយនីស ជារឿយៗតែងកើតមានក្តីបារម្ភផ្នែកសន្តិសុខនៃការបំពានគ្នាជាយថាហេតុ។
CNN កាលពីដើមខែមិថុនា បានផ្សាយថា កូរ៉េខាងជើងបានបាញ់មីស៊ីលផ្លោងរយៈចម្ងាយខ្លីចំនួន៨គ្រាប់ពីទីតាំងជាច្រើនក្នុងប្រទេស ចូលទៅក្នុងដែនទឹកភាគខាងកើតនៃឧបទ្វីបកូរ៉េ។
តាមរយៈ CNN ដដែល អគ្គសេនាធិការចម្រុះនៃប្រទេសកូរ៉េខាងត្បូងបានហៅសកម្មភាពបាញ់មីស៊ីលនេះថាជា«ការបង្កហេតុដ៏ធ្ងន់ធ្ងរដែលបំផ្លាញសន្តិភាព និងស្ថិរភាពមិនត្រឹមតែ ឧបទ្វីបកូរ៉េ ប៉ុណ្ណោះទេ ប៉ុន្តែក៏សហគមន៍អន្តរជាតិផងដែរ»។
ទីភ្នាក់ងារព័ត៌មានរដ្ឋកូរ៉េខាងជើង KCNA បានដកស្រង់សម្តីមេដឹកនាំកូរ៉េខាងជើង លោក គីម ជុងអ៊ុន ដូចដែលបានប្រាប់គណបក្សនយោបាយពលកររបស់គាត់ ដោយនិយាយថា លោកនឹងប្រើអំណាចដើម្បីអំណាច (Power for Power) ដើម្បីប្រឆាំងនឹងការគំរាមកំហែងដល់អធិបតេយ្យភាពរបស់ប្រទេសកូរ៉េខាងជើង។
អ្នកជំនាញយោធា បានលើកឡើងថា ការបាញ់មីស៊ីលដើម្បីកំញើញគ្នានេះគឺនៅចំពេលមានការព្រួយបារម្ភកាន់តែខ្លាំងឡើងថា «ទីក្រុងព្យុងយ៉ាងកំពុងរៀបចំការសាកល្បងនុយក្លេអ៊ែរ»។
ឆ្លើយតបការគំរាមកំហែងរបស់កូរ៉េខាងជើង ប្រទេសកូរ៉េខាងត្បូងគ្រោងនឹងបង្កើនសមត្ថភាពឆ្លើយតបឲ្យកាន់តែខ្លាំងដើម្បីរារាំងការសាកល្បងនុយក្លេអ៊ែរ និងមីស៊ីលរបស់កូរ៉េខាងជើង។
តាមការចុះផ្សាយរបស់បណ្តាញសារព័ត៌មានល្បីឈ្មោះ The Straitstimes របស់សិង្ហបុរី លោក លី ជុងស៊ុប (Lee Jong-sup) រដ្ឋមន្ត្រីការពារជាតិកូរ៉េខាងត្បូងបាននិយាយក្នុងកិច្ចពិភាក្សានៅក្នុងកិច្ចប្រជុំនោះថា«ការគំរាមកំហែងនុយក្លេអ៊ែរ និងកាំជ្រួចរបស់កូរ៉េខាងជើង បានក្លាយជាការគំរាមកំហែងដ៏សាមញ្ញមួយ ចាប់ពីរយៈចម្ងាយខ្លី រហូតដល់កាំជ្រួចអន្តរទ្វីប។ ការធ្វើតេស្តម៉ីស៊ីលម្តងហើយម្តងទៀតរបស់កូរ៉េខាងជើងកំពុងធ្វើឲ្យមានទំនើបកម្មទាំងបរិមាណនិងគុណភាព»។
នៅក្រោមកិច្ចព្រមព្រៀង GSOMIA នេះ ប្រទេសកូរ៉េនិងជប៉ុន បានផ្លាស់ប្តូរព័ត៌មានរាប់សិបបំណែករហូតដល់ឆ្នាំ ២០១៩។ ប៉ុន្តែបន្ទាប់ពីចំណុចនោះ ទំនាក់ទំនងរបស់ប្រទេសនៅអាស៊ីខាងកើតទាំងពីរបានធ្លាក់ចុះ បន្ទាប់ពីប្រទេសជប៉ុនដាក់ចេញនូវវិធានការទប់ស្កាត់ពាណិជ្ជកម្ម នៅក្នុងការសងសឹកជាក់ស្តែងប្រឆាំងនឹងតុលាការកំពូលរបស់កូរ៉េខាងត្បូងដែលបញ្ជាឱ្យក្រុមហ៊ុនជប៉ុនមួយ លក់ទ្រព្យសម្បត្តិរបស់ខ្លួនដើម្បីផ្តល់សំណងដល់ជនរងគ្រោះកូរ៉េនៃកម្លាំងពលកម្មដោយបង្ខំក្នុងសម័យសង្រ្គាមក្នុងអំឡុងពេលអាណានិគមជប៉ុន។
ជាវិធានការប្រឆាំងតបនឹងទណ្ឌកម្មពាណិជ្ជកម្មរបស់ទីក្រុងតូក្យូ ទីក្រុងសេអ៊ូលបានពិចារណាលើជម្រើសនៃការបញ្ចប់ GSOMIA។ ជម្លោះនេះបានប៉ះពាល់ដល់ការផ្លាស់ប្តូរព័ត៌មានរវាងប្រទេសទាំងពីរចាប់តាំងពីពេលនោះមក។
សារព័ត៌មានកូរ៉េ បានដកស្រង់ការលើកឡើងរបស់អ្នកជំនាញដែលនិយាយថា ប្រតិបត្តិការប្រកបដោយផ្លែផ្កានៃ GSOMIA អាចជារង្វាស់នៃទំនាក់ទំនងរបស់កូរ៉េ និងជប៉ុន ហើយថាកិច្ចខិតខំប្រឹងប្រែងការទូតគួរតែមុនការធ្វើឱ្យប្រក្រតីភាពនៃកិច្ចព្រមព្រៀងចែករំលែកព័ត៌មានសម្ងាត់។
លោក ជីន ចាង-សួ (Jin Chang-soo) អ្នកជំនាញលើកិច្ចការប្រទេសជប៉ុននៅវិទ្យាស្ថាន Sejong បានប្រាប់កាសែត The Korea Herald៖«GSOMIA អាចត្រូវបានគេមើលឃើញថាជាមូលដ្ឋានគ្រឹះនៃកិច្ចសហប្រតិបត្តិការត្រីភាគីដ៏រឹងមាំរវាងកូរ៉េខាងត្បូង សហរដ្ឋអាមេរិក និងប្រទេសជប៉ុន។ ការធ្វើឱ្យ GSOMIA មានលក្ខណៈធម្មតាក៏នឹងគាំទ្រដល់កិច្ចសហប្រតិបត្តិការទ្វេភាគីនៃទីក្រុងសេអ៊ូល និងតូក្យូ ដោយផ្តល់អត្ថប្រយោជន៍ដល់ពួកគេទាំងពីរក្នុងការដោះស្រាយកូរ៉េខាងជើង»៕
យោងតាមការផ្សាយរបស់កាសែតនេះ ប្រមុខដឹកនាំប្រទេសកូរ៉េខាងត្បូងនិងជប៉ុនក៏នឹងមានវត្តមានក្នុងកិច្ចប្រជុំមេដឹកនាំនៃប្រទេសជាសមាជិកនៃសន្ធិសញ្ញាអាត្លង់ទិកខាងជើង (NATO) នៅទីក្រុងម៉ាឌ្រីដប្រទេសអេស្ប៉ាញនៅចុងខែនេះ៕
