ភ្នំពេញ៖ នៅព្រឹកថ្ងៃពុធ ទី៦ ខែកក្កដា ឆ្នាំ២០២២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួបសំណេះសំណាល ក៏ដូចជាផ្តល់នូវដំបូន្មានមួយចំនួនជូនដល់ប្រតិភូកីឡាអាស៊ានប៉ារ៉ាហ្គេម មុននឹងពួកគេចេញទៅប្រកួតកីឡាពិការអាស៊ាន ឬអាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី ។

ក្នុងព្រឹត្តិការណ៍ប្រកួតអាស៊ានប៉ារ៉ាហ្គេម លើកទី១១នេះ កម្ពុជា បញ្ជូនប្រតិភូកីឡាចូលរួមសរុប ១១៦នាក់។ ក្នុងនោះមានអត្តពលិក ១១៥នាក់ និងប្រតិភូកីឡា គ្រូបង្វឹក គ្រូជំនួយចំនួន ៣៩នាក់ មន្ត្រីបច្ចេកទេសចំនួន ៧នាក់ និងប្រតិភូជាតិចំនួន ៥នាក់។ កម្ពុជា បញ្ជូនអត្តពលិកចូលរួមប្រកួត លើប្រភេទកីឡាចំនួន១១កីឡា រួមមាន៖ វាយកូនឃ្លីលើតុ លើកទម្ងន់ អត្តពលកម្ម ហែលទឹក បាល់ទះអង្គុយបុរសនារី បាល់បោះជនពិការភ្នែក បាល់ទាត់៧ម្ខាង បាល់បោះជិះរទេះបុរសនារី បូស្យា វាយសី និងអុក។ ក្រុមប្រតិភូកីឡាប៉ារ៉ាហ្គេមកម្ពុជា នឹងចេញដំណើរទៅប្រកួតនៅថ្ងៃទី២៤ ខែកក្កដា ឆ្នាំ២០២២ ខាងមុខនេះ។

នៅក្នុងឱកាសនេះ សម្តេចតេជោ ហ៊ុន សែន បានមានប្រសាសនថា ការដែលសម្តេច ធ្វើជាប្រធានគណៈកម្មាធិការជាតិប៉ារ៉ាឡាំពិកកម្ពុជានេះ គឺជាការរួមចំណែកលើកទឹកចិត្តសម្រាប់ការខិតខំប្រឹងប្រែងរបស់បងប្អូនជនពិការទាំងអស់ មិនមែនគ្រាន់តែជាប្រធានសម្រាប់ការប្រកួតនោះទេ។ សម្តេចតេជោបានបញ្ជាក់ថា ការលើកទឹកចិត្តចំពោះជនមានពិការរភាព គឺជារឿងចាំបាច់បំផុត។ សម្តេចតេជោនាយករដ្ឋមន្ត្រីបានបង្ហាញការរំពឹងថា កីឡាករ កីឡាការិនីជាជនពិការរបស់កម្ពុជា ទាំងអស់ នឹងទទួលបានលទ្ធផលល្អប្រសើរក្នុងការប្រកួតនៅប្រទេសឥណ្ឌូនេស៊ីនាពេលខាងមុខ។ សម្តេចតេជោក៏បានអរគុណដល់ប្រទេសឥណ្ឌូនេស៊ី ដែលព្រមទទួលធ្វើជាម្ចាស់ផ្ទះនៃការប្រកួតកីឡាអាស៊ានប៉ារ៉ាហ្គេម បន្ទាប់ពីវៀតណាម សុំពន្យាពេលដោយសារវិបត្តិកូវីដ-១៩។

សម្តេចតេជោ ហ៊ុន សែន បានសម្រេចចាត់ចែងផ្តល់ជើងហោះហើរពិសេស ដឹកប្រតិភូកីឡាប៉ារ៉ាហ្គេមរបស់កម្ពុជា ទៅចូលរួមប្រកួតនៅប្រទេស ឥណ្ឌូនេស៊ី ទាំងទៅទាំងមកផងដែរ។ សម្តេចបានមានប្រសាសន៍ ទៅកាន់កីឡាករ កីឡាការិនីទាំងអស់ថា ការទទួលបានមេដាយមាស មេដាយប្រាក់ ឬមេដាយសំរឹទ្ធ ឬមិនបានក្តី គឺមិនសំខាន់នោះទេ តែអ្វីដែលសំខាន់នោះ គឺការគោរពលក្ខខន្ធ នៃការគោរពច្បាប់នៃការប្រកួត ជាពិសេសហាមដាច់ខាត ការប្រើប្រាស់សារធាតុញៀនផ្សេងៗ ដែលនាំឱ្យប៉ះពាល់ដល់កិត្តិយស ទាំងមូលរបស់កម្ពុជា។

សម្តេចតេជោនាយករដ្ឋមន្ត្រី បានមានប្រសាសន៍ថា បងប្អូនជនពិការយើងនៅទីនេះ ក៏មានអ្នកខ្លះពីការដោយសារគ្រាប់មីន និងគ្រាប់ផ្ទុះផ្សេងៗផងដែរ។សម្តេចតេជោបន្តថាគ្រាប់មីន និងគ្រាប់មិនទាន់ផ្ទុះ បានក្លាយទៅជាឧបសគ្គក្នុងការសម្រេច នយោបាយប្រែក្លាយតំបន់អតីតសមរភូមិសង្គ្រាម ទៅជាតំបន់អភិវឌ្ឍន៍។ សម្តេចតេជោ ក៏បានប្រកាសឱ្យបង្ហាញលេខគណនីមូលនិធិបោសសំអាតមីន ជាសាធារណៈ ដើម្បីឱ្យប្រជាពលរដ្ឋ និងមហាជនទូទៅបានចូលរួម ក្នុងសកម្មភាពបោសសំអាតមីននេះផងដែរ ។ សម្តេច បានលើកឡើងដែរថា គិតមកដល់ពេលនេះ កម្ពុជា ទទួលបានថវិកាជិត ១៥ លានដុល្លារ សម្រាប់ជំនួយដោះមីនដែលទទួលបានពីសប្បុរសជន ពេលនេះកម្ពុជាកំពុងបន្តទទួលតាមជំនួយពីអ្នកចង់ចូលរួមតាមបណ្តាញសង្គមហ្វេសបុក ទៅតាមសមត្ថភាព ចាប់ពី ២ម៉ឺនរៀល ឡើងទៅជាដើម។

នៅក្នុងឱកាសនេះ សម្តេចតេជោ ហ៊ុន សែន បានសម្រេច និងប្រកាសជាផ្លូវការថា អ្នកប្រើប្រាស់រថយន្តចង្កូតស្តាំទាំងអស់នៅកម្ពុជា ត្រូវចូលទៅបង់ពន្ធ តែមិនបាច់ដូរចង្កូតនោះទេ។ ជាមួយគ្នានោះ សម្តេចតេជោ ក៏បានមានប្រសាសន៍ថា ការអនុញ្ញាតនេះ គឺសម្រាប់តែរថយន្តដែលកំពុងមានវត្តមាននៅទឹកដីកម្ពុជា ត្រឹមថ្ងៃទី៦ ខែកក្កដា ឆ្នាំ២០២២តែប៉ុណ្ណោះ តែរថយន្តដែលនាំចូលថ្មី មិនឱ្យបង់ពន្ធ មិនអោយដូរចង្កូតនោះទេ គឺត្រូវចាប់យកតែម្តង។ ការដាក់ចេញនូវបទបញ្ជានេះ គឺក្នុងគោលបំណងបញ្ឈប់ មិនអោយមានការនាំចូលរថយន្តចង្កូតស្តាំតទៅទៀត។ សម្តេច ក៏បានស្នើឱ្យសមត្ថកិច្ច និងភាគីពាក់ទាំងអស់ ត្រូវធ្វើការបិទការនាំចូលរថយន្តចង្កូតស្តាំងពីខាងក្រៅជាដាច់ខាត។ ចំពោះរយថន្តចង្កូតស្តាំនៅព្រំដែនហើយបម្រុងនាំចូល គឺឱ្យគេយកទៅវិញ បើនាំយកមកគឺត្រូវចាប់យកតែម្តង។ សម្តេចតេជោក៏បានស្នើគ្រប់ស្ថាប័ន និងសមត្ថកិច្ចពាក់ព័ន្ធ ធ្វើយ៉ាងណាកុំឱ្យមាននាំយករថយន្តចង្កូតស្តាំលួចលាក់ ឬស្នើសុំមកជាដាច់ខាត។ សម្តេចតេជោ បានបញ្ជាក់បន្ថែមថា រថយន្តចង្កូតស្តាំនៅក្នុងប្រទេស កម្ពុជាដែលកំពុងដំណើរការមានជាង ២ពាន់គ្រឿង មិនទាន់ដូរចង្កូត ហើយជាង៤ពាន់គ្រឿង បានប្តូររួចហើយ។
ពាក់ព័ន្ធនឹងបញ្ហាកូវីដ-១៩នៅកម្ពុជា សម្តេចតេជោនាយករដ្ឋមន្ត្រី បានមានប្រសាសន៍ថា ពេលនេះកូវីដចាប់ផ្តើមផ្ទុះឡើងវិញហើយ។ រលកនៃការឆ្លងជំងឺកូវីដ-១៩ឡើងវិញនេះ គឺត្រូវទាមទារឱ្យប្រជាពលរដ្ឋទាំងអស់ត្រូវបង្កើនការយកចិត្តទុកដាក់ការពារឡើងវិញ កុំអោយមានការផ្ទុះរាលដាលខ្លាំង។ តែទោះជាយ៉ាងណាក៏ដោយ សម្តេចតេជោនាយករដ្ឋមន្ត្រី បានមានប្រសាសន៍បញ្ជាក់ថា រហូតមកដល់ពេលនេះ យើងមិនមានភាពចាំបាច់ណាមួយត្រូវបិទក្រុង បិទសាលារៀន បិទរោងចក្រ ដូចកាលពីមុនទៀតនោះទេ ព្រោះយើងមានវ៉ាក់សាំងជាបង្អែកដ៏រឹងមាំ ដូច្នេះប្រជាពលរដ្ឋម្នាក់ៗ ត្រូវតែការពារពីជំងឺនេះទាំងអស់គ្នា។

សម្តេចតេជោនាយករដ្ឋមន្ត្រី បានលើកទឹកចិត្តដល់កីឡាករ កីឡាការិនីទាំងអស់ ខិតខំប្រឹងប្រែងដើម្បីទទួលបានជ័យជំនះបន្ថែមទៀត ។ នៅថ្ងៃនេះ សម្តេចតេជោ នាយករដ្ឋមន្ត្រីបានឧបត្ថម្ភលើកទឹកចិត្ត ដល់កីឡាករកីឡាការិនី និងគ្រូបង្វឹកចំនួន ១៦៥នាក់ ក្នុងម្នាក់ៗទទួលបាន ៥០០ ដុល្លារអាមេរិក ក្នុងការធ្វើដំណើរទៅប្រកួតនៅប្រទេសឥណ្ឌូនេស៊ី នៅពេលខាងមុខនេះ ។

សម្តេចតេជោ ហ៊ុន សែន ក៏បានជូនពរកីឡាករកីឡារិនីទាំងអស់ អោយទទួលបានជោគជ័យក្នុងការប្រកួត ព្រមទាំងជួបតែសេចក្តីសុខ សេចក្តីចម្រើនគ្រប់ៗគ្នា៕ ដោយ វណ្ណលុក