ស្វាយរៀង៖ តបតាមការអំពាវនាវរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ឲ្យនាំគ្នាហូបអំបុកនោះ លោកជំទាវកិត្តិសង្គហបណ្ឌិត ម៉ែន សំអន ប្រធានក្រុមការងារគណបក្សប្រជាជនកម្ពុជា ចុះជួយខេត្តស្វាយរៀង បានអំពាវនាវឲ្យអាជ្ញាធរ កងកម្លាំង សមាជិកសមាជិកាគណបក្សប្រជាជន ប្រជាពលរដ្ឋ ត្រូវរួមគ្នាហូបអំបុកទាំងអស់គ្នា ចាប់ពីថ្ងៃទី៩ ដល់ថ្ងៃទី១២ វិច្ឆិកា ដែលជាពិធីបុណ្យអុំទូក ដើម្បីចូលរួមការពារជាតិ សាសនា និងព្រះមហាក្សត្រ។ ការអំពាវនាវយ៉ាងដូច្នេះ ក្នុងឱកាសដែលលោកជំទាវអញ្ជើញចូលរួមបិទកិច្ចប្រជុំបូកសរុបលទ្ធផលអនុវត្តន៍ភារកិច្ចរបស់ក្រុមការងារគណៈកម្មាធិការកណ្ដាល ចុះជួយខេត្តស្វាយរៀង ដំណាក់កាលទី៧ លើកទី៣ និងទិសដៅអនុវត្តន៍ភារកិច្ចសំខាន់ៗ សម្រាប់អនុវត្តន៍ដំណាក់កាលទី៧ លើកទី៤ នៅសាលាប្រជុំមន្ទីរគណបក្សខេត្តស្វាយរៀង នៅព្រឹកថ្ងៃទី០៥ ខែតុលា ឆ្នាំ២០១៩នេះ។

លោកជំទាវក៏ស្នើដល់សមាជិកសមាជិកា ទទួលខុសត្រូវខ្ពស់កិច្ចការចំនួន៧ចំណុច រួមមាន៖
១)ត្រូវបន្ដលើកកម្ពស់សុវត្ថិភាព សន្ដិសុខសង្គម ធ្វើឱ្យជនគ្រប់រូបទទួលបានសេចក្ដីសុខទាំងផ្លូវកាយ និងផ្លូវចិត្ត តាមរយៈការធ្វើឱ្យបទល្មើសព្រហ្មទណ្ឌគ្រប់ប្រភេទ មានការថយចុះ ពង្រឹងបរិយាកាសសង្គម ជាសង្គមល្អ គ្មានជនពាល ឬជនទំនើង ត្រូវបន្ដរៀបចំសណ្ដាប់ធ្នាប់សាធារណៈ ពិសេសសណ្ដាប់ធ្នាប់ចរាចរណ៍ឱ្យមានរបៀបរៀបរយល្អ។
២)ក្រុមការងារគណបក្ស និងគណបក្សគ្រប់ថ្នាក់ពីខេត្តរហូតដល់មូលដ្ឋានទាំងអស់ ត្រូវបន្ដតាមដានក្ដាប់ជាប់ការវិវត្តនៃសភាពការណ៍នៅក្នុងមូលដ្ឋានរបស់ខ្លួននីមួយៗ ទាំងសភាពការណ៍ប្រជាជន ទាំងសកម្មភាពរបស់ក្រុមប្រឆាំងជ្រុលនិយម ហើយត្រូវដាក់ចេញ នូវវិធានការនានា ទាំងវិធានការរដ្ឋបាល ទាំងវិធានការអប់រំ ទាំងវិធានការច្បាប់ឱ្យបានទាន់ពេលវេលា ដោយឈរលើស្មារតីដឹកនាំដោយសមូហភាព ម្នាក់ៗទទួលខុសត្រូវ ដើម្បីបង្កើនប្រៀបខ្លាំង និងប្រជាប្រិយភាពរបស់គណបក្ស រក្សាសន្ដិភាព ស្ថិរភាព សុវត្ថិភាព និងជំរុញការអភិវឌ្ឍនៅគ្រប់មមូលដ្ឋាន។
៣)ក្រុមការងារគណបក្សគ្រប់ថ្នាក់ និងប្រព័ន្ធព័ត៌មាន ត្រូវយកចិត្តទុកដាក់អប់រំ ផ្សព្វផ្សាយឱ្យបានទូលំទូលាយស៊ីជម្រៅក្នុងមហាជន អំពីការរីកចម្រើនគ្រប់វិស័យនៃសង្គមជាតិ អំពីគោលនយោបាយ និងការប្រឹងប្រែងរបស់រាជរដ្ឋាភិបាលក្នុងការអភិវឌ្ឍ សេដ្ឋកិច្ចសង្គម។
៤)គណបក្សខេត្ត ត្រូវយកចិត្តទុកដាក់ការលើកកម្ពស់សមត្ថភាពប្រសិទ្ធភាពការងារ របស់គណៈកម្មាធិការគណបក្សគ្រប់ថ្នាក់។
៥)គណបក្សគ្រប់ជាន់ថ្នាក់ ត្រូវបន្ដកែសម្រួលកសាងពង្រឹងអង្គការចាត់តាំងមូលដ្ឋាន របស់គណបក្សឱ្យមានរចនាសម្ព័ន្ធគ្រប់គ្រាន់ មានការទទួលខុសត្រូវឱ្យច្បាស់លាស់ និងអនុវត្តន៍បានល្អនូវការងារគ្រប់គ្រង អប់រំ ថែបំប៉នសមាជិក និងកសាងពង្រីកសមាជិកថ្មី ពិសេសក្នុងជួរយុវជនដែលមានឈ្មោះក្នុងបញ្ជីបោះឆ្នោត។
៦)គណបក្សខេត្ត ត្រូវបន្ដរៀបចំបើកវគ្គអប់រំនយោបាយដល់មន្ត្រី និងសកម្មជន យុវជនគណបក្សដែលពុំទាន់បានរៀនតាមកម្មវិធីបច្ចុប្បន្ន ជាមួយនេះ ត្រូវបន្ដពង្រឹងអង្គការ មហាជនរបស់គណបក្សឱ្យសម្រេចបានល្អ តាមតួនាទី ភារកិច្ចរបស់ខ្លួន ពិសេសពង្រឹង ការគ្រប់គ្រងរាល់អង្គការយុវជនគណបក្ស។
៧)មន្ត្រីគ្រប់ថ្នាក់ទាំងផ្នែកបក្ស ទាំងផ្នែករដ្ឋត្រូវរៀបចំការងារពាក់ព័ន្ធរបស់ខ្លួនឱ្យ បានច្បាស់លាស់ និងត្រូវចេះសន្សំពិន្ទុជាមួយប្រជាជនតាមរយៈប្រសិទ្ធភាពការងារប្រចាំថ្ងៃ តាមរយៈការចុះជួបប្រាស្រ័យផ្ទាល់ក្នុងវេទិកាសាធារណៈតាមភូមិនីមួយៗ ទទួលយកនូវការលំបាក សំណូមពររបស់ប្រជាពលរដ្ឋ និងខិតខំដោះស្រាយឱ្យមានប្រសិទ្ធភាពទាំងសេវា តម្រូវការ និងសេវាសំណូមពរ៕