ភ្នំពេញ ៖ រថយន្តកាមរីបាឡែនមួយគ្រឿងបើកបរដោយបុរសម្នាក់ និងអ្នករួមដំណើរ ២នាក់ទៀត បានជ្រុលទៅបុករថយន្តដឹកសំរាមពីក្រោយពេញទំហឹងបណ្ដាលឲ្យរបួសធ្ងន់ស្រាលទាំង ៣នាក់ និងធ្វើឲ្យរថយន្តខ្ទេចមួយកំណាត់មុខ បង្កការភ្ញាក់ផ្អើលកាលពីវេលាម៉ោង ២យប់ រំលងអាធ្រាតឈានចូលថ្ងៃទី ២២ ខែកក្កដាឆ្នាំ ២០២២ នៅតាមបណ្ដោយផ្លូវហាណូ ខាងត្បូងស្តុប៩២ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តកាមរីបាឡែនមួយគ្រឿងពណ៌ទឹកប្រាក់ពាក់ស្លាកលេខភ្នំពេញ 2AC-9324 បើកបរដោយបុរសម្នាក់រួមដំណើរដោយបុរសពីរនាក់ទៀត ធ្វើដំណើរតាមបណ្តោយផ្លូវហាណូយទិសដៅពីត្បូងទៅជើងក្នុងល្បឿនលឿន ដល់ចំណុចកើតហេតុខាងលើ បានរេចង្កូតទៅបុករថយន្តដឹកសំរាមខណៈកំពុងឈប់ប្រមូលសំរាមពីក្រោយខាងឆ្វេង ពេញទំហឹង បណ្ដាល្យអ្នករួមដំណើរម្នាក់អង្គុយជាប់និងអ្នកបើកបររគៀបជាប់ ត្រូវបានបងប្អូនប្រជាពលរដ្ឋនាំគ្នាជួយគាស់ចេញមកក្រៅ រួចទំនាក់ទំនងទៅរថយន្តសាមុយមកដឹកយកទៅសង្គ្រោះនៅឯមន្ទីរពេទ្យភ្លាមៗ

ក្រោយកើតហេតុសមត្ថកិច្ចមូលដ្ឋានបានមកដល់ទំនាក់ទំនងទៅសមត្ថកិច្ចជំនាញមកធ្វើការវាស់វែងយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នាតាមច្បាប់៕ដោយ ៖ ជីម ភារ៉ា