បាងកក៖ នាយករដ្ឋមន្ត្រីថៃ ប្រាយុទ្ធ ចាន់អូចា បានដាស់តឿនសាធារណជន កុំឱ្យមានការព្រួយបារម្មណ៍ ខណៈអាជ្ញាធរបន្តស្វែងរកបុរសជនជាតិអឺរ៉ុបម្នាក់ ដែលត្រូវបានគេជឿថា បានឆ្លងជំងឺអុតស្វាពីបុរសជនជាតិថៃ ដែលជាករណីជំងឺអុតស្វាទីពីរ របស់ប្រទេសថៃ។

អ្នកនាំពាក្យរាជរដ្ឋាភិបាល លោក Thanakorn Wangboonkongchana បាននិយាយថា “នាយករដ្ឋមន្ត្រីបានស្នើឱ្យប្រជាជនកុំមានការភ័យស្លន់ស្លោ ខណៈពេលដែលក៏ព្រមានពួកគេឱ្យជៀសវាងពីសកម្មភាព ដែលមានហានិភ័យខ្ពស់ ដើម្បីធានាសុវត្ថិភាពនៅក្នុងរាជធានី បន្ទាប់ពីរបាយការណ៍នេះ” ។

លោក Thanakorn បាននិយាយបន្ថែមថា ជំងឺអុតស្វាមិនអាចឆ្លងបានខ្ពស់ទេ លុះត្រាតែមានទំនាក់ទំនងផ្ទាល់ជាមួយ សារធាតុរាវក្នុងខ្លួន ឬ ដំបៅ ឬ ទំនាក់ទំនងយូរ ជាមួយអ្នកឆ្លង។ លោកថា ជាទូទៅ អ្នកជំងឺភាគច្រើនជាសះស្បើយដោយខ្លួនឯង នៅផ្ទះ ក្នុងរយៈពេលពីរទៅបួនសប្តាហ៍។

លោក សូផុន ឡាំស៊ីរិតថាវុន (Sopon Iamsirithaworn) អនុប្រធាននាយកដ្ឋានគ្រប់គ្រងជំងឺ (DDC) បាននិយាយថា ការស៊ើបអង្កេតបង្ហាញថា បុរសជនជាតិថៃអាយុ ៤៧ ឆ្នាំរូបនេះនៅតែរស់នៅក្នុងរាជធានី ហើយមិនមានកំណត់ត្រា ធ្វើដំណើរឆ្លងខេត្តទេ។ បុរសរូបនោះមិនមានរោគសញ្ញាធ្ងន់ធ្ងរទេ។ លោកវេជ្ជបណ្ឌិត សុផុន បាននិយាយថា គាត់កំពុងត្រូវបានព្យាបាលនៅក្នុងបន្ទប់តែម្នាក់ឯង នៅមន្ទីរពេទ្យ វ៉ាជីរ៉ា(Vajira) ។

លោកវេជ្ជបណ្ឌិត Sophon បន្ថែមថា គាត់ទំនងជាឆ្លងតាមរយៈទំនាក់ទំនងផ្លូវភេទ ជាមួយបុរសជនជាតិអឺរ៉ុប ដែលគាត់មានភាពស្និទ្ធស្នាលជាមួយ នៅលើប្រព័ន្ធផ្សព្វផ្សាយសង្គម។

ការប្រកាសប្រាប់ឲ្យពលរដ្ឋ កុំស្លន់ស្លោពីជំងឺអុតស្វា បានកើនឡើង ខណៈដែលមន្ត្រីជំនាញកំពុងស្វែងរកបុរសអឺរ៉ុបរូបនេះ ដែលបានបាត់ខ្លួន ជាប់ពាក់ព័ន្ធ នឹងករណីជំងឺអុតស្វាទី២ ជនជាតិថៃរូបនោះ ដោយគេដឹងថា ពួកគេបានរួមដំណេកជាមួយគ្នា ដែលជាភេទតែមួយ៕ ប្រភពពីបាងកកប៉ុស្តិ៍, ប្រែសម្រួលដោយ៖ សារ៉ាត