ឆ្នាំជូត

សម្រាប់លោកអ្នកដែលកើតឆ្នាំជូត នាមសត្វកណ្តុរ ធាតុទឹក ពង្សទេវតាប្រុស។ រាសីអស់លោកអ្នកនៅក្នុងថ្ងៃនេះល្អជាមធ្យម។ កិច្ចការងារនៅក្នុងថ្ងៃនេះស្ថិតក្នុងស្ថានភាពហ្នឹងហ្ន៎ណាស់ លោកអ្នកអាចធ្វើការផ្លាស់ប្តូរ ឬរក្សាការងារនានាឲ្យនៅដដែលបានតាមធម្មតា។ ការបណ្តាក់ទុន និងបង្កើតមុខរបរថ្មីអាចធ្វើទៅបាន តែសូមប្រាកដថាអ្នកមានផែនការច្បាស់លាស់ បើមិនដូច្នោះទេបញ្ហាក៏អាចកើតឡើងកណ្តាលទីផងដែរ​។ ដោយឡែក លោកអ្នកមានលទ្ធភាពបង្កើនកំរិតហិរញ្ញវត្ថុកាន់តែប្រសើរ ប្រសិនបើអ្នកផ្តោតការយកចិត្តទុកដាក់បន្ថែមលើចំណុចប្រែប្រួលៗតូចៗដែលអាចនឹងកើតឡើងនៅក្នុងពេលនេះ។

ឆ្នាំឆ្លូវ

សម្រាប់លោកអ្នកដែលមានកំណើតឆ្នាំឆ្លូវ នាមសត្វគោ ធាតុដី ពង្សមនុស្សប្រុស។ រាសីអស់លោកអ្នកនៅក្នុងថ្ងៃនេះស្រុតចុះ។  រាល់កិច្ចការងាររបស់អ្នកមិនទាន់អាចសម្រេចផលបានតាមក្តីប៉ងប្រាថ្នាឡើយ។ លោកអ្នកកំពុងស្ថិតក្នុងសា្ថនភាពដែលមិនទាន់ប្រាកដ ប៉ុន្តែទាំងនេះមិនមែនមានន័យថាសុទ្ធតែជាស្ថានការណ៍ពិបាកទាំងអស់ទេ។ អ្វីដែលអ្នកចាំបាច់ធ្វើ គឺប្រុងប្រៀបឆ្លើយតប ឬទបទល់នឹងការប្រែប្រួល។ ផ្ទុយទៅវិញ លោកអ្នកមានមនុស្សអាណិតស្រលាញ់សណ្តោសប្រណី ដែលជាចំណុចល្អដើម្បីឲ្យអ្នកមានលំនឹងផ្លូវចិត្តចំពោះការខំប្រឹងប្រែង និងជឿជាក់លើខ្លួនឯង។

ឆ្នាំខាល

សម្រាប់លោកអ្នកដែលមានកំណើតឆ្នាំខាល នាមសត្វខ្លា ធាតុឈើ ពង្សយក្សស្រី។ រាសីអស់លោកអ្នកនៅក្នុងថ្ងៃនេះល្អជាមធ្យម។ ការងារ និងមុខរបររកស៊ីរបស់លោកអ្នកកំពុងចម្រើនទៅមុខយ៉ាងខ្លាំង។ នៅរវាងពេលរសៀល អ្នកអាចទទួលបានដំណឹងដែលកំពុងរងចាំ។ ដោយឡែក អ្នកត្រូវយកចិត្តទុកដាក់ទៅលើវិធីសាស្រ្តអនុវត្តការងារ ដោយរួមទាំងការធ្វើការចរចាជាមួយក្រុមការងារផងដែរ។ ចំពោះ ផលរំខានអាចនឹងកើតឡើងច្រើនគួរសម ដូច្នេះសូមប្រយ័ត្នជម្លោះធំ។ ក្រៅពីនេះ ប្រសិនបើអ្នកមានបំណងចង់ផ្លាស់ប្តូរកន្លែងការងារ គឺមិនគួរមានការស្ទាក់ស្ទើរទេ។

ឆ្នាំថោះ

សម្រាប់លោកអ្នកដែលមានកំណើតឆ្នាំថោះ នាមសត្វទន្សាយ ធាតុឈើ ពង្សមនុស្សស្រី។ រាសីអស់លោកអ្នកឡើងខ្ពស់ត្រដែត។ ក្នុងថ្ងៃនេះ អ្នកអាចទទួលបានផលសម្រេចរាល់កិច្ចការងារទាំងឡាយ។ ប៉ុន្តែប្រការចាំបាច់ សូមចាប់ផ្តើមការងាររបស់អ្នកឲ្យបានរួសរាន់ ឲ្យមុនដៃគូរបស់អ្នក។ អ្នកគួរសំឡឹងមើលស្ថានការណ៍ ពីព្រោះកំរិតនៃភាពប្រែប្រួលមានច្រើន ដែលអាចឲ្យអ្នកពិបាកក្នុងការបត់បែន។ ចំពោះលោកអ្នកប្រកបការងាររដ្ឋឯកជន ប្រការចាំបាច់ក្នុងពេលនេះ គឺរក្សាគម្លាតពីការពិភាក្សាការងារដែលទាមទារការសម្រេចចិត្តភ្លាមៗ។ ក្រៅពីនេះ អ្នកទទួលបានអំណោយផលក្នុងការដោះស្រាយបញ្ហាដោយសន្តិវិធី និងទទួលបានការសរសើរគាំទ្រណាស់។

ឆ្នាំរោង

​សម្រាប់លោកអ្នកដែលមានកំណើតឆ្នាំរោង នាមសត្វនាគ ធាតុមាស ពង្សទេវតាប្រុស។ ​ រាសីអស់លោកអ្នកនៅក្នុងថ្ងៃនេះល្អជាមធ្យម។ កិច្ចការងាររកស៊ីរបស់លោកអ្នកនឹងដំណើរល្អ។ ចំពោះលោកអ្នកដែលធ្វើជំនួញអាចនឹងទទួលបានស្ថេរភាព និងផលចំណេញគួរឲ្យកត់សម្គាល់។ ក្នុងនោះ ផលចំណេញអាចទាក់ទងនឹងយុទ្ធសាស្រ្តទីផ្សារ ពិសេសការផ្សព្វផ្សាយ។ លោកអ្នកអាចប្រទះបញ្ហា ឬភាពស្មុគ្រស្មាញខ្លះ ដូច្នេះសូមដោះស្រាយដោយសន្តិវិធី ហើយក៏មិនគួរភ័យខ្លាចដែរ ពីព្រោះគ្មានអ្វីថាដោះស្រាយមិនបាននោះទេ។ ក្នុងថ្ងៃនេះ ស្ថានភាពការងារខ្លះអាចនឹងត្រូវកែប្រែ ប៉ុន្តែសូមរក្សាគម្រោងជានិច្ច។

ឆ្នាំម្សាញ់

សម្រាប់លោកអ្នកដែលមានកំណើតឆ្នាំម្សាញ់ នាមសត្វពស់ ធាតុភ្លើង ពង្សមនុស្សប្រុស។ ​​  អស់លោកអ្នកនៅក្នុងថ្ងៃនេះឡើងខ្ពស់ត្រដែត។ ឳកាសមុខរបរ និងការងាររបស់អ្នកមានដំណើរការទៅយ៉ាងល្អប្រសើរ។ ថ្ងៃនេះការសម្រេចចិត្តរបស់អ្នកមានភាពច្បាស់លាស់ហើយយោងលើហេតុផលបានល្អ ដូច្នេះអ្នកអាចទទួលបានទិន្នផលវិជ្ជមានតាមការប៉ងប្រាថា្ន។ ទន្ទឹមនឹងនោះកុំបន្ធូរបន្ថយការខំប្រឹងប្រែង ​ ពីព្រោះរាសីថ្ងៃនេះធានាថានឹងនាំភាពចម្រើន ព្រមទាំងសេចក្តីសុខផងដែរ។ ដោយឡែក ប្រសិនបើអ្នកចង់ប្រកបរបរថ្មី ផ្លាស់ប្តូរកន្លែងការងារ សូមសម្រេចចិត្តធ្វើចុះ អ្វីៗនឹងបានសម្រេចទាំងអស់។

ឆ្នាំមមី

សម្រាប់លោកអ្នកដែលមានកំណើតឆ្នាំមមី នាមសត្វសេះ ធាតុភ្លើង ពង្សទេវតាសី្រ។ រាសីអស់លោកអ្នកនៅក្នុងថ្ងៃនេះឡើងខ្ពស់ត្រដែត។ ថ្ងៃនេះ គឺជាពេលវេលាល្អបំផុតសម្រាប់ដោះស្រាយបញ្ហាផ្សេងៗរបស់ការងារ ហើយក្នុងពេលឆាប់ៗនេះអ្នកអាចនឹងទទួលដំណឹងល្អទាក់ទងការអភិវឌ្ឍន៍មុខរបរ ឬការតម្លើងប្រាក់ខែ។ ចំពោះការបណ្តាក់ទុនហាក់ស្ថិតក្នុងលោកអ្នកទទួលបានភាពស្មោះត្រង់ពីដៃគូរជំនួញ ដូច្នេះភាពងាយស្រួល​ ក៏ដូចជាភាពចំណេញធានាថានឹងកើនឡើង។ ដោយឡែក សូមប្រុងប្រយ័ត្នរក្សាស្ថេរភាពហិរញ្ញវត្ថុបន្ថែម ក្នុងកនោះគួរកុំឲ្យគេខ្ចីបុល។

ឆ្នាំមមែ

សម្រាប់លោកអ្នកដែលមានកំណើតឆ្នាំមមែ នាមសត្វពពែ ធាតុមាស ពង្សទេវតាសី្រ។ រាសីអស់លោកអ្នកស្រុតចុះ។ លោកអ្នកគួរពន្យាពេលក្នុងការផ្តួចផ្តើមកិច្ចការងារថ្មី ឬការសម្រេចចុះហត្ថលេខា ពីព្រោះបញ្ហា និងភាពខាតបង់កំពុងមានកំរិតខ្ពស់។ ទន្ទឹមនឹងនោះ បញ្ហាធំ បំផុតរបស់អ្នកក្នុងថ្ងៃនេះ គឺការបាត់បង់លំនឹងក្នុងចិត្ត ពីព្រោះតែការទទួលយកឥទ្ធិពលខាងក្រៅ។ ចំពោះអ្នកធ្វើការរដ្ឋឯកជន អាចនឹងប្រទះភាពយល់ច្រឡំធំពីថា្នក់លើ ដូច្នេះសូមប្រុងប្រយ័ត្នពាក្យសំដី ហើយព្យាយាមកែប្រែស្ថានការណ៍ឲ្យបានប្រញាប់។ បើទោះបីជាស្ថានភាពថ្ងៃនេះហាក់លំបាកបន្តិច លោកអ្នកមានមនុស្សជួយទំនុកបម្រុង និងយកអាសារ។

ឆ្នាំវក

សម្រាប់លោកអ្នកដែលមានកំណើតឆ្នាំវក នាមសត្វស្វា ធាតុដែក ពង្សយក្សប្រុស។ រាសីអស់លោកអ្នកក្នុងថ្ងៃនេះឡើងខ្ពស់ត្រដែត។ ថ្ងៃនេះលោកអ្នកអាចមានលទ្ធភាពដោះស្រាយបញ្ហាបានគ្រប់យ៉ាង ពិសេសទាក់ទងនឹងការងារដែលអ្នកកំពុងតែអនុវត្ត។ ទន្ទឹមនឹងនោះ មតិយោបល់ ព្រមទាំងការសម្រេចចិត្តរបស់អ្នកមានការគោរពកោតសរសើរច្រើន ដែលធ្វើឲ្យអ្នកមានភាពងាយស្រួលសម្របទៅនឹងភាពប្រែប្រួលនានា។ កាន់តែពិសេស អ្នកលទ្ធភាព និងសមត្ថភាពពេញលេញក្នុងការដោះស្រាយបញ្ហានានា ដែលបានកើតតាំងពីមុន ក៏ដូចជាពេលនេះក្តី។

ឆ្នាំរកា

សម្រាប់លោកអ្នកដែលមានកំណើតឆ្នាំរកា នាមសត្វមាន់ចែ ធាតុដែក ពង្សយក្សប្រុស។  រាសីអស់លោកអ្នកថ្ងៃនេះល្អជាមធ្យម។ កិច្ចការងារនានារបស់លោកអ្នកដំណើរការជាប្រក្រតី ប៉ុន្តែមិនគួរចាប់យកការងារធំនោះទេ។​ ​ក្នុងនោះការចាប់ស្រវាការងារមកច្រើនពេកក៏មិនមែនជាជម្រើសដ៏ល្អនោះដែរ ដោយសារអ្នកគ្មានពេលវេលាគ្រប់គ្រាន់នោះទេ។ ក្នុងករណីនេះអ្នកអាចបណ្តាលឲ្យធ្លាក់ខ្លួនទៅក្នុងភាពស្មុគ្រស្មាញ និងលទ្ធភាពពិបាកក្នុងការរកផលចំនេញពីក្នុងការងារនោះទៅវិញ។ ក្រៅពីនេះជម្លោះ ឬភាពយល់ច្រលំរវាងមនុស្សនៅក្នុងគ្រួសារអាចកើតឡើង ហើយបើមិនរក្សាចិត្ត គឺអ្នកអាចធ្វើឲ្យប៉ះពាល់ការងារបាន។

ឆ្នាំច

សម្រាប់លោកអ្នកដែលមានកំណើតឆ្នាំចរ នាមសត្វឆ្កែ ធាតុដី ពង្សយក្សស្រី។ រាសីអស់លោកអ្នកនៅក្នុងថ្ងៃនេះស្រុតចុះ។ នៅពេលវេលានេះ លោកអ្នកមិនទាន់អាចសម្រេចការងារតាមក្តីប្រាថ្នាទេ ប៉ុន្តែសូមបន្តការងារ និងគម្រោងដែលអ្នកកំពុងមានក្នុងពេលនេះ។ អ្នកគួរយកចិត្តទុកដាក់លើភាពប្រែប្រួល ប៉ុន្តែមិនគួរកែប្រែគម្រោងរបស់អ្នកទាំងស្រុងក្នុងពេលនេះទេ ពីព្រោះលោកអ្នកនៅមិនទាន់មានពេលវេលាគ្រប់គ្រាន់នៅឡើង។ ក្រៅពីនេះសូមលោកអ្នកសំលឹងមើលឳកាសនៅជុំវិញខ្លួន ពីព្រោះអ្នកអាចមានលទ្ធភាពទទួលបានសំណាងដោយស្មានមិនដល់ទៅវិញ។

ឆ្នាំកុរ​

សម្រាប់លោកអ្នកដែលមានកំណើតឆ្នាំកុរ  នាមសត្វជ្រូក ធាតុទឹក ពង្សមនុស្សស្រី។ រាសីអស់លោកអ្នកនៅក្នុងថ្ងៃនេះឡើងខ្ពស់ត្រដែត។ កិច្ចការងារនានានឹងទទួលផលជាទីគាប់ចិត្ត លោកអ្នកមានលទ្ធភាពពេញលេញក្នុងការប្រកបការងារឲ្យបានជោគជ័យ។ ក្នុងនោះដែរអ្នកនឹងទទួលបានសំណាងនៅរវាងពេលរសៀល ដែលសំណាងនោះនឹងនាំមកពីមនុស្សនៅឆ្ងាយ។ ដោយឡែក ចំពោះកិច្ចការទាំងឡាយណាដែលស្ថិតក្នុងគម្រោងសហការ សូមយកចិត្តទុកដាក់ជាមួយពត៌មាន ហើយមានជំនឿចិត្តខ្ពស់ជាមួយមនុស្សរួមក្រុម។ សូមចងចាំថា មន្ទិលសង្ស័យជ្រុលពេកអាចនឹងរំខានដំណើរជោគជ័យ។

ចំណាំៈ

ឆ្នាំទាំង៥  ថោះ ម្សាញ់ មមី វក កុរ រាសីឡើងខ្ពស់ត្រដែត។ លាភសំណាង លុយកាក់ ឋានៈ តួនាទីនឹងកើតឡើងចំពោះលោកអ្នក។ ក្នុងនោះការធ្វើដំណើរបេសកកម្មទាំងឡាយនឹងបាន ផលល្អ។