គណៈអចិន្រ្តៃយ៍នៃគណៈកម្មាធិការជាតិរៀបចំកីឡាអាស៊ីអាគ្នេយ៍ឆ្នាំ២០២៣ ដឹកនាំដោយ ឯកឧត្តម បណ្ឌិត ថោង ខុន អនុប្រធានអចិន្ត្រៃយ៍ នាព្រឹកថ្ងៃទី២៣ ខែសីហា ឆ្នាំ២០២២នេះ បានដឹកនាំកិច្ចប្រជុំលើរបៀបវីរៈស្តីអំពីការត្រៀមធ្វើមហាសន្និបាតអូឡាំពិកអាស៊ី នាអំឡុងខែ តុលា ឆ្នាំ២០២២ខាងមុខនេះ។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំកីឡាអាស៊ីអាគ្នេយ៍ឆ្នាំ២០២៣ (camsoc) បានលើកឡើងថា កិច្ចប្រជុំគណៈអចិន្រ្តៃយ៍នាថ្ងៃនេះ គឺដើម្បីត្រៀមផែនការឆ្ពោះទៅការរៀបចំធ្វើមហាសន្និបាតអូឡាំពិកអាស៊ី ដែលកម្ពុជាទទួលធ្វើជាម្ចាស់ផ្ទះ ចាប់ពីថ្ងៃទី១ដល់ថ្ងៃទី៥ ខែ តុលា ឆ្នាំ២០២២។

ឯកឧត្តម អគ្គលេខាធិការ camsoc បានគូសបញ្ជាក់ថា មហាសន្និបាតអូឡាំពិកអាស៊ី ត្រូវបានប្រមុខរាជរដ្ឋាភិបាលសម្តេចតេជោ ហ៊ុន សែន ឯកភាព និងបានផ្តល់នូវការអនុញ្ញាតរបស់រាជរដ្ឋាភិបាល ក្នុងការរៀបចំទទួលបដិសណ្ឋាកិច្ចភ្ញៀវចំនួន៤០០នាក់ ដែលជាថ្នាក់ដឹកនាំកីឡានៅលើពិភពលោក ពិសេស គឺក្រុមប្រឹក្សាកីឡាអាស៊ីចំនួន៤៥ប្រទេសដែលជាប្រធានគណៈកម្មាធិការអូឡាំពិក និងមានតំណាងអង្គការកីឡាសំខាន់ដូចជាអង្គការកីឡាប្រឆាំងសារៈធាតុដូពីង អង្គការសាមគ្គីអូឡាំពិក និងសហព័ន្ធកីឡាអន្តរជាតិសំខាន់ជាច្រើនផងដែរ ។

ឯកឧត្តម បញ្ជាក់ទៀតថា ក្នុងមហាសន្និបាតអូឡាំពិកអាស៊ី ដែលកម្ពុជាធ្វើជាម្ចាស់ក្នុងការរៀបចំនេះ នឹងមានប្រទេសដែលមានតួនាទីភារៈកិច្ចត្រៀមរៀបចំកីឡាអូឡាំពិក យុវជនអាស៊ី កីឡាអាស៊ី នឹងមកធ្វើបទបង្ហាញស្តីអំពីការរៀបចំ ក្នុងនោះក៏មានកម្ពុជា នឹងត្រូវធ្វើបទបង្ហាញដែរ អំពីផែនការយុទ្ធសាស្រ្តរបស់ខ្លួនក្នុងការតៀមទទួលធ្វើជាម្ចាស់ផ្ទះ កីឡាអាស៊ីអាគ្នេយ៍លើកទី៣២ ឆ្នាំ២០២៣ និងកីឡាយុវជនអាស៊ីក្នុងឆ្នាំ២០២៩ផងដែរ។
ឯកឧត្តម បានពន្យល់ថា ការទទួលធ្វើជាម្ចាស់ផ្ទះរៀបចំមហាសន្និបាតនេះ គណៈកម្មាធិការជាតិ camsocក្រោមការដឹកនាំរបស់សម្តេចពិជ័យសេនា ទៀ បាញ់ ប្រធាន បានផ្តល់អនុសាសន៍ជំរុញឲ្យធ្វើយ៉ាងណាស្វែងរកការគាំទ្រពីអន្តរជាតិឲ្យពេញទំហឹងទៅលើការទទួលធ្វើជាម្ចាស់ផ្ទះរបស់កម្ពុជា ក្នុងរៀបចំកីឡាស៊ីហ្គេម អាស៊ានប៉ារ៉ាហ្គេមឆ្នាំ២០២៣ និងកីឡាយុវជនអាស៊ីនៅឆ្នាំ២០២៩។

ឯកឧត្តម អះអាងថា អត្ថប្រយោជន៍ដែលទទួលបានពីការទទួលធ្វើជាម្ចាស់ផ្ទះនៃមហាសន្និបាតអូឡាំពិកអាស៊ីនេះ នាដើមខែ តុលា ឆ្នាំ២០២២ខាងមុខនេះ គឺកម្ពុជាទទួលបានអត្ថប្រយោជន៍ពីសហគមន៍អន្តរជាតិ បណ្តាញសារព័ត៌មានអន្តរជាតិ និងសហព័ន្ធកីឡាអន្តរជាតិមកបណ្តុំក្នុងមហាសន្និបាត ដែលជាឱកាសសម្រាប់សហព័ន្ធកីឡាជាតិយើងបានធ្វើការទំនាក់ទំនងពង្រឹងកិច្ចសហការជាមួយសហព័ន្ធកីឡាអន្តរជាតិ ជួយដល់សហព័ន្ធកីឡាជាតិមួយចំនួន ហើយអ្វីដែលកាន់តែពិសេសនោះ គឺនយោបាយការទូតរបស់កម្ពុជាកាន់តែរឹងមាំ និងមើលឃើញពីសក្តានុពលរបស់កម្ពុជាផងដែរ។

ឯកឧត្តម វ៉ាត់ ចំរើន បន្ថែមទៀតថា ក្នុងកិច្ចប្រជុំនាព្រឹកមិញនេះ ឯកឧត្តម បណ្ឌិត ថោង ខុន អនុប្រធានអចិន្ត្រៃយ៍CAMSOC បានជំរុញឲ្យអនុគណៈគ្រប់ផ្នែកដែលពាក់ព័ន្ធត្រូវបង្កើនការយកចិត្តទុកដាក់ខ្ពស់ ដើម្បីឲ្យមហាសន្និបាតទទួលបានការកោតសើរពីថ្នាក់ដឹកនាំកីឡាមកពីគ្រប់ទិសទីនៅលើពិភពលោក។

សូមបញ្ជាក់ថា មហាស្និបាតអូឡាំពិកអាស៊ីមានថ្នាក់ដឹកនាំកីឡាមកចូលរួមចំនួន៤០០នាក់ នឹងចាប់ផ្តើមពីថ្ងៃទី០១ដល់ថ្ងៃទី៥ ខែ តុលា ឆ្នាំ២០២២៕ អត្ថបទ៖ ជាវ ចន្ធូ