ភ្នំពេញ៖ លោកឧត្តមសេនីយ៍ទោ គង់ មនោ ស្នងការនគរបាលខេត្តកោះកុង បានបញ្ជាក់ប្រាប់ AMS នៅមុននេះបន្តិចថា ពុំមានករណីបង្ខាំងជនជាតិហ្វីលីពីនចំនួន០៤នាក់ នៅក្នុងកាស៊ីណូឡុងបេ ស្ថិតនៅតំបន់តារាសាគរ ឃុំកោះស្តេច ស្រុកគីរីសាគរ ខេត្តកោះកុង នោះទេ។ ការបញ្ជាក់នេះ បានធ្វើឡើងបន្ទាប់ពីសមត្ថកិច្ចបានចុះត្រួតពិនិត្យនៅក្នុងទីតាំងកាស៊ីណូឡុងបេ និងក្រុមហ៊ុន Shi Lin គឺមិនមានករណីនេះ ដូចជាការផ្សព្វផ្សាយរបស់សារព័ត៌មានមួយចំនួននោះទេ។

ស្នងការនគរបាលខេត្តកោះកុង បានបន្តថា កម្លាំងស្នងការដ្ឋាននគរបាលខេត្តកោះកុង និងមានការសហការពីតំណាងម្ចាស់ទីតាំង បានចុះធ្វើការត្រួតពិនិត្យឆែកឆេរបន្ទប់ដែលមានជនជាតិហ្វីលីពីនស្នាក់នៅ៣ទីតាំង មាន៨បន្ទប់ ដែលជាអគារស្នាក់នៅរបស់បុគ្គលិក កាស៊ីណូឡុងបេ និងក្រុមហ៊ុន Shi Lin ស្តិតនៅភូមិ ពាមកាយ ឃុំកោះស្តេច ស្រុកគិរីសាគ ខេត្តកោះកុង រកឃើញមនុស្ស៩នាក់ (ស្រី៤នាក់) ប៉ុន្តែរកមិនឃើញមានករណីបង្ខាំងនោះទេ។

លោកឧត្តមសេនីយ៍ទោ គង់ មនោ បានបញ្ជាក់ថា តាមការសាកសួរស្រាវជ្រាវលម្អិតពីក្រុមម្ចាស់ទីតាំងសង្ស័យថា ជនជាតិហ្វីលីពីន ៤នាក់នោះ ធ្លាប់នៅក្រុមហ៊ុនខ្លួនពិតមែន ប៉ុន្តែពួកគេបានឈប់ធ្វើការ និងចាកចេញច្រើនថ្ងៃ ដោយមិនដឹងថាទៅទីកន្លែងណាទេ។ ការចាកចេញរបស់ជនជាតិហ្វីលីពីនទាំង៤នាក់នេះ គឺមុនលិខិតស្នើសុំអន្តរាគមន៍របស់ស្ថានទូតហ្វីលីពីនមកអគ្គស្នងការនគរបាលជាតិទៅទៀត។ ចំណែកតំណាងម្ចាស់កាស៊ីណូឡុងបេ និងក្រុមហ៊ុន Shi Lin បានបញ្ជាក់ថា ទីតាំងទាំង៣ របស់ខ្លួនមានជនជាតិហ្វីលីពីនបម្រើការងារសរុប២៦នាក់ (ស្រី១៥នាក់)។ ក្នុងនោះធ្វើការនៅកាស៊ីណូ២២ ស្រី១២ និងក្រុមហ៊ុន Shi Lin ៤នាក់ (ស្រី៣) ពិតប្រាកដមែន ក៏ប៉ុន្តែមនុស្សទាំង៤នាក់ដែលធ្វើការនៅក្រុមហ៊ុនShi Lin បានឈប់ធ្វើការ និងចាកចេញតាំងពីយប់ថ្ងៃទី១២ ខែសីហា ឆ្នាំ២០២២មកម៉្លេះ។

យោងតាមរបាយការណ៍របស់សមត្ថកិច្ចបានឱ្យដឹងថា កាលពីថ្ងៃទី២១ ខែសីហា ឆ្នាំ២០២២ កម្លាំងជំនាញរបស់នាយកដ្ឋានដោយមានការចូលរួមពីកម្លាំងស្នងការដ្ឋាននគរបាលខេត្តកោះកុង និងមានការសហការពីតំណាងម្ចាស់ទីតាំង បានចុះធ្វើការត្រួតពិនិត្យឆែកឆេរបន្ទប់ដែលមានជនជាតិហ្វីលីពីនស្នាក់នៅ ៣ទីតាំងស្មើ ៨បន្ទប់ ដែលជាអគារស្នាក់នៅរបស់បុគ្គលិក កាស៊ីណូឡុងបេ និងក្រុមហ៊ុន Shi Lin ស្តិតនៅភូមិ ពាមកាយ ឃុំកោះស្តេច ស្រុកគិរីសាគ ខេត្តកោះកុង រកឃើញមនុស្ស ៩នាក់ (ស្រី៤នាក់)។

តាមការអះអាងរបស់លោក ចាន់ មុន្នី តំណាងឱ្យម្ចាស់ទីតាំងបានបញ្ជាក់ថា ក្នុងទីតាំងទាំង៣ខាងលើ មានជនជាតិហ្វីលីពីនបម្រើការងារសរុប ២៦នាក់ (ស្រី១៥នាក់) ក្នុងនោះធ្វើការនៅកាស៊ីណូ ចំនួន២២ (ស្រី ១២នាក់) និងក្រុមហ៊ុន shi lin ៤នាក់ (ស្រី៣) ប៉ុន្តែ៤នាក់ដែលធ្វើការនៅក្រុមហ៊ុន Shi Lin បានឈប់និងចាកចេញតាំងពីយប់ថ្ងៃទី១២ ខែសីហា ឆ្នាំ២០២២ មកម៉្លេះ ។ ដោយឡែកនៅល្ងាចថ្ងៃដដែលក៏មានតំណាងជនជាតិហ្វីលីពីន ៣នាក់/២២នាក់ បានមកបំភ្លឺនិងអះអាងថា ជនជាតិហ្វីលីពីនដែលធ្វើការនៅទីនេះ គឺពួកគេបានចងជាគ្រុប wechat ដើម្បីទំនាក់ទំនងជាក្រុម និងក៏បានសំណូមពរដល់សមត្ថកិច្ចកម្ពុជាគ្រប់លំដាប់ថ្នាក់អនុញ្ញាតឱ្យពួកគេបានធ្វើការនៅកន្លែងដដែលទៀតផង។

ផ្អែកតាមការត្រួតពិនិត្យទីតាំងស្នាក់នៅជាក់ស្តែង ការអះអាងរបស់តំណាងម្ចាស់ទីតាំង ការបញ្ជាក់របស់តំណាងជនជាតិហ្វីលីពីន៣/២២នាក់ ការពិនិត្យកាមេរ៉ាសុវត្ថិភាពរបស់ក្រុមហ៊ុន ក៏ដូចជាព័ត៌មានដែលទទួលបាន អាចសន្និដ្ឋានបានថា ទីតាំងខាងលើពុំអាចមានករណីបង្ខាំងបង្ខំឱ្យធ្វើការដូចដែលព័ត៌មានចុះផ្សាយនាពេលកន្លងមកនោះឡើយ៕
ដោយ៖ពលជ័យ