ភ្នំពេញ ៖ មានករណីផ្ទុះអាវុធរវាងសមត្ថកិច្ច និងជនសង្ស័យជួញដូរគ្រឿងញៀនជាង ១០គ្រាប់ បណ្តាលឲ្យជនសង្ស័យម្នាក់បានស្លាប់បាត់បង់ជីវិត ម្នាក់ទៀតរងរបួស និងជនសង្ស័យ ២នាក់ផ្សេងទៀតត្រូវបានចាប់ឃាត់ខ្លួន ព្រមទាំងបណ្ដាលឲ្យប្រជាពលរដ្ឋរបួស៣នាក់ផងដែរ បង្កការភ្ញាក់ផ្អើលកាលពីវេលាម៉ោងប្រមាណ ៩ព្រឹកថ្ងៃទី៣១ ខែសីហា ឆ្នាំ២០២២ ស្ថិតនៅចំណុចផ្លូវចូលកំពង់ដស្វាយជ្រុំ តាមបណ្តោយផ្លូវកែវចិន្តា ស្ថិតក្នុងភូមិទី៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។

ក្នុងប្រតិបត្តិការនេះ មានរថយន្តស៊េរីទំនើបមួយគ្រឿង ម៉ាកហ្វដ ពណ៌ស ត្រូវបានសមត្ថកិច្ចបាញ់ ធ្លុះធ្លាយខ្ទេច ខណៈជនសង្ស័យបាញ់តដៃជាមួយសមត្ថកិច្ច ។

ជាមួយគ្នានោះកម្លាំងសមត្ថកិច្ចជំនាញក៏បានដកហូតសារធាតុញៀនប្រមាណ ២០គីឡូក្រាម និងវត្ថុតាងមួយចំនួនទៀត រួចបន្តធ្វើការស្រាវជ្រាវរកបក្ខពួកបន្ថែមយកមកផ្ដន្ទាទោសតាមច្បាប់ ៕ ដោយ ៖ ភារ៉ា និងប៊ុនធី