សៀមរាប៖ មន្រ្តីរដ្ឋបាលស្រុកបន្ទាយស្រី និងអាជ្ញាធរមូលដ្ឋានក្នុងឃុំ រុនតាឯកបានត្រៀមខ្លួនប្រចាំការជារៀងរាល់ថ្ងៃ។សកម្មភាពនេះបាន ចាប់ផ្តើមពីថ្ងៃដែលបងប្អូនប្រជាពលរដ្ឋរស់នៅតំបន់រមណីយដ្ឋានអង្គរដោយខុសច្បាប់ និងស្មគ្រ័ចិត្តចូលរួមជ្រើសរើសដីឡូត៍ដែល រៀបចំដោយ រាជរដ្ឋាភិបាលក្នុងការផ្តល់ទីលំនៅថ្មី នៅក្នុងភូមិធម្មជាតិរុនតាឯកនេះ។

កញ្ញា ឆម សារី មន្រ្តីកិច្ចសន្យានៃរដ្ឋបាលស្រុកបន្ទាយស្រី ដែលត្រូវ ប្រចាំការនៅក្នុងសាលាបឋមសិក្សា ហ៊ុន សែន រុនតាឯក បានបញ្ជាក់ ប្រាប់អ្នកយកព័ត៌មានទូរទស្សន៍អប្សរាថា ដើម្បីសម្រួលដល់ការងារ អញ្ជើញចុះពិនិត្យដីឡូត៍និងបំពេញទម្រង់ក្បាលដីយើងបានរៀបចំសកម្មភាពការងារមួយចំនួនជាស្រេច។

ជាមួយគ្នានេះដែរលោក មឺន មិត្ត សមាជិកក្រុមប្រឹក្សាឃុំរុនតាឯក បានមាន ប្រសាសន៍ឱ្យដឹងដែរថា លោកបានមកប្រចាំការនៅក្នុងបរិវេណ សាលាបឋម សិក្សា ហ៊ុនសែនរុនតាឯក នេះគឺរង់ចាំបងប្អូនសម្រាប់មកចុះលេខ ក្បាល ដីឡូត៍ដែលបងប្អូនប្រជាពលរដ្ឋចាប់ឆ្នោតបាន ហើយទៅបង្ហាញទៅឱ្យចំ គោលដៅ របស់គាត់។ លោកបានបន្ថែមថា ក្បាលដីឡូត៍នៅក្នុង មូលដ្ឋាន របស់លោកដែលរាជរដ្ឋាភិបាលរៀបចំជាលំនៅដ្ឋាននេះ មានទំហំសរុប ប្រាំមួយពាន់ក្បាលដី ឬស្មើនឹងប្រាំមួយពាន់គ្រួសារ។

ទន្ទឹមគ្នានេះ លោកក៏បានសំណូមពរដល់បងប្អូនប្រជាពលរដ្ឋដែលអញ្ជើញ មកអាចសាកសួរព័ត៌មានក្បាលដីរបស់ខ្លួនហើយក្រុមការងារ នឹង រៀបចំជូន ក្នុងទីតាំងនេះ និងនាំចុះទៅពិនិត្យមើលក្បាលដីឡូត៍ដល់ទីតាំងតែម្តង ។

ប្រជាពលរដ្ឋដែលបានចាប់ឆ្នោតជ្រើសរើសក្បាលដីឡូត៍របស់ខ្លួន រួចហើយ និងបានមកពិនិត្យមើលទីតាំងដីក្នុងក្នុងភូមិធម្មជាតិ រុនតាឯក បាន សម្តែងក្តីសប្បាយចិត្តជាមួយនិងការរៀបចំដីឡូត៍សម្រាប់ប្រជាពលរដ្ឋដែលបានស្ម័គ្រចិត្តមករស់នៅក្នុងទីតាំងថ្មីនេះ ។

អ្នកស្រី ថេង យ៉ត ប្រជាពលរដ្ឋមកពីភូមិត្រពាំងសេះ ស្ថិតក្នុងតំបន់ រមណីយ ដ្ឋាន អង្គរ ជួបជាមួយអ្នកយកព័ត៌មានទូរទស្សន៍អប្សរា បាន សំដែងនូវអារម្មណ៍សប្បាយរីករាយ ជាមួយក្រុមគ្រួសារ នៅក្នុងពេល ដែលអញ្ជើញចុះមកមើលទីតាំងផ្ទាល់នេះ។

អ្នកស្រីក៏បានថ្លែងអំណរគុណដល់រាជរដ្ឋាភិបាល ដែលរៀបចំចែក ដីដល់ ប្រជាពរលដ្ឋ ដែលស្ម័គ្រចិត្តមករស់ នៅក្នុងទីតាំងថ្មី ស្ថិត នៅ ក្នុងតំបន់ អភិវឌ្ឍន៍ រុនតាឯក ។នេះ ជាការបង្ហាញពីការយក ចិត្តទុក ដាក់ខ្ពស់របស់ ប្រមុខរាជរដ្ឋាភិបាលចំពោះសុខទុក្ខនិងការរស់នៅរបស់ប្រជាពលរដ្ឋ។

លោក មឺន មិត្ត សមាជិកក្រុមប្រឹក្សាឃុំរុនតាឯក បានបញ្ជាក់ថា ក្រៅ អំពី ការងារទទួលចុះឈ្មោះក្នុងបញ្ជីក្បាលដីនៅក្នុងលំនៅឋាននេះ ប្រជាពលរដ្ឋ អាច សាកសួរព័ត៌មានអំពីសាលារៀនសម្រាប់កូនរបស់គាត់ផងដែរ ដោយ ក្រុមការងាររបស់ឃុំ ស្រុក និងធ្វើការប្រឹក្សាយោបល់ជូននៅក្នុងទីតាំង នេះ តែម្តង៕
ដោយ៖ង៉ាន ទិត្យ