ហាណូយ ៖ បើតាមប្រធានសមាគមស្បៀងអាហាររបស់ប្រទេសវៀតណាម ការនាំចេញអង្ករ របស់ប្រទេសវៀតណាមត្រូវបានគេរំពឹងថា នឹងកើនឡើងដល់ ចន្លោះពី ៦.៣លាន ទៅ ៦.៥លានតោននៅឆ្នាំ២០២២នេះ ពោលគឺកើនពី ៦.២៤លានតោនកាលពីឆ្នាំមុនដោយសារតម្រូវការខ្លាំង ។

លោក Nguyen Ngoc Nam ប្រធានសមាគមស្បៀងអាហារវៀតណាមបានប្រាប់រ៉យទ័រ កាលពីថ្ងៃទី៣០ សីហាថា “រហូតមកដល់ពេលនេះ ឆ្នាំនេះ ការនាំចេញបានកើនឡើងយ៉ាងខ្លាំងហើយយើងរំពឹងថា នឹងឃើញសន្ទុះនៅតែបន្តសម្រាប់ឆ្នាំដែលនៅសល់” ។

ប្រទេសវៀតណាម ដែលជាប្រទេសនាំចេញអង្ករធំជាងគេទី ៣ របស់ពិភពលោក ត្រូវបានរាយការណ៍ពីការកើនឡើង ១៩% នៃការនាំចេញអង្កររបស់ខ្លួនក្នុងរយៈពេល ៨ ខែដំបូង ក្នុងឆ្នាំនេះ ពោលគឺដល់ ៤.៧លានតោន។

លោក Nam បាននិយាយថា តម្លៃនាំចេញអង្ករវៀតណាមក៏នឹងកើនឡើងក្នុងកំឡុងប៉ុន្មានខែខាងមុខ ដោយតម្លៃផលិតកម្មកាន់តែខ្ពស់ ហើយដោយសារតែលក្ខខណ្ឌអាកាសធាតុមិនល្អនៅក្នុងប្រទេសដែលដាំស្រូវជាច្រើនប៉ះពាល់ដល់ផលិតកម្ម ។

ប្រភពបាននិយាយទៀតថា ប្រទេសហ្វីលីពីននឹងនៅតែជាទីផ្សារនាំចេញអង្ករដ៏ធំបំផុតរបស់វៀតណាមនៅឆ្នាំ២០២២នេះ ៕ ប្រភពពី VNexpress , ដោយ៖សារ៉ាត