អង្គការ Wonder of Mekong ឱ្យលើកកម្ពស់ការយល់ដឹងអំពីឆ្មាដាវ ក្រោយរកឃើញមានវត្តមាននៅជុំវិញអាងទន្លេមេគង្គ
គម្រោងអច្ឆរិយភាពនៃទន្លេមេគង្គ Wonder of Mekong នៅថ្ងៃទី០១ ខែកញ្ញា ម្សិលមិញ បានប្រកាសពីការរកឃើញវត្តមានសត្វឆ្មាដាវ នៅជុំវិញអាងទន្លេមេគង្គ។ ឆ្មាដាវ គឺជាសត្វប្រមាញ់ដ៏គួរឲទាក់ទាញបំផុតមួយ ដែមានឈ្មោះជាភាសាអង់គ្លេសថា the Asian leopard cat និងមានឈ្មោះវិទ្យាសាស្ត្រ Prionailurus bengalensis។
ឆ្មាដាវដ៏គួរឱ្យលង់ស្រឡាញ់នេះ ភាគច្រើនរស់នៅក្នុងតំបន់អាស៊ីខាងត្បូង និងអាស៊ីអាគ្នេយ៍ និងស្ថិតក្នុងបញ្ជីក្រហមរបស់អង្គការ IUCN ដោយសារតែវាជាសត្វដែលមាននៅសេសសល់ក្នុងចំនួនតិចតួច និងព្រួយបារម្ភថាជិតផុតពូជពីលើលោកយើងនេះថែមទៀត។
ដោយសារតែវត្តមានរបស់ឆ្មាដាវស្ថិតក្នុងស្ថានភាពផុយស្រួយបែបនេះ គម្រោងអច្ឆរិយភាពនៃទន្លេមេគង្គ បានសំណូមពរដល់ភាគីពាក់ព័ន្ធ ឱ្យជួយលើកកម្ពស់ការយល់ដឹងពីឆ្មាដាវ និងការប្រឈមរបស់ពួកវា តាមរយៈចែករំលែកព័ត៌មាននេះ និងតាមដានគម្រោងអច្ឆរិយភាពនៃទន្លេមេគង្គ ដើម្បីស្វែងយល់បន្ថែមអំពីសត្វដែលរស់នៅក្នុងតំបន់អាងទន្លេមេគង្គ។
គួរកត់សម្គាល់ថា ឆ្មាដាវ មានទំហំដូចនិងឆ្មាស្រុកធម្មតា ប៉ុន្តែពួកវាមានជើងវែងដែលជួយឱ្យពួកវាអាចប្រមាញ់នៅទីដែលមានស្មៅខ្ពស់ ឬគុម្ពោធព្រៃជាដើម។ ភាពអស្ចារ្យរបស់ឆ្មាដាវ គឺវាអាចក្លែងបន្លំខ្លួនជាមួយនឹងបរិយាកាសជុំវិញខ្លួនរបស់ពួកវា ព្រោះពណ៌និងប្រវែងរោមរបស់ពួកវា អាចប្រែប្រួលអាស្រ័យលើជម្រកដែលពួកវារស់នៅ។ អ្នកវិទ្យាសាស្រ្តមួយចំនួនប៉ាន់ស្មានថា ឆ្មាដាវ អាចជាសត្វឆ្មាមួយប្រភេទដំបូងគេ ដែលត្រូវបានយកទៅចិញ្ចឹមនៅក្នុងប្រទេសចិនប្រហែល ៥០០០ ឆ្នាំមុន។ អ្វីដែលយើងនឹកស្មានមិនដល់ទៀតនោះ គឺថា ឆ្មាដាវធ្លាប់បានបង្កាត់ពូជជាមួយឆ្មាក្នុងស្រុក ហើយបង្កើតបានជាកូនឆ្មាស្រុក ពូជ Bengal។
ទោះបីជាមានលក្ខណៈពិសេសច្រើន និងត្រូវបានគេចាប់អារម្មណ៍ក៏ដោយ ក៏ប៉ុន្តែឆ្មាដាវនៅតែបន្តរងការគំរាមកំហែងពីសំណាក់ព្រានព្រៃបរបាញ់សត្វ។ ជារឿយៗឆ្មានេះត្រូវបានគេសម្លាប់ដោយសារមូលហេតុផ្សេងៗ៕ហោ សុវិទ្យា
