កូឡុំបូ៖ អតីតប្រធានាធិបតីស្រីលង្កា លោក Gotabaya Rajapaksa បានធ្វើដំណើរទៅដល់រដ្ឋធានីកូឡុំបូវិញហើយ នៅព្រឹកព្រលឹមថ្ងៃសៅរ៍ ទី៣ កញ្ញានេះ ពោលគឺបន្ទាប់ពី ៧សប្ដាហ៍ដែលលោកភៀសខ្លួនចេញពីប្រទេស ចំពោះមុខវិបត្តិសេដ្ឋកិច្ច និងបាតុកម្មតវ៉ា ទាមទារឱ្យលោកលាលែងចេញពីតំណែង។

លោក Rajapaksa បានភៀសខ្លួនចេញពីប្រទេសស្រីលង្កា កាលពីពាក់កណ្ដាលខែកក្កដាកន្លងទៅ ដោយធ្វើដំណើរទៅដល់ប្រទេសម៉ាល់ឌីវ និងសិង្ហបុរី មុនពេលទៅថៃ បន្ទាប់ពីក្រុមបាតុករសម្រុកចូលការិយាល័យប្រធានាធិបតីរបស់លោក។
លោក Rajapaksa បានសម្រេចចិត្តលាលែងចេញពីតំណែងក្នុងពេលស្នាក់នៅសិង្ហបុរី។

មានរដ្ឋមន្ត្រីមួយចំនួនត្រូវបានរាយការណ៍ថា បានទទួលលោកនៅចំណតអាកាសយានដ្ឋាន ហើយអ្នកនាំពាក្យក្រសួងការពារជាតិស្រីលង្កា បានប្រាប់ BBC ថា លោកត្រូវទទួលការការពារសន្តិសុខ ក្នុងនាមជាអតីតប្រធានាធិបតី៕ ប្រភពពីBBC , ដោយ៖ សារ៉ាត