មនុស្ស១០នាក់ស្លាប់ នៅក្នុងហេតុការណ៍ចាក់រះដោយកាំបិត នៅកាណាដា
កាណាដា៖នៅថ្ងៃអាទិត្យ ទី០៤ ខែកញ្ញាម្សិលមិញ មានមនុស្សយ៉ាងហោចណាស់ ១០ នាក់ បានស្លាប់ និង ១៥ នាក់ផ្សេងទៀតបានរងរបួស បន្ទាប់ពីជនដៃដល់ម្នាក់ បើកការចាក់រះដោយកំបិតចុងស្រួចជាបន្តបន្ទាប់គ្នាទៅលើពួកគេ។
ជំនួយការស្នងការប៉ូលិសកាណាដាប្រចាំតំបន់លោកស្រី Rhonda Blackmore ថ្លែងឲ្យដឹងនៅក្នុងសន្និសីទសារព័ត៌មានថា ជនរងគ្រោះទាំងអស់ រស់នៅក្នុងសហគមន៍ជនជាតិភាគតិច James Smith Cree Nation និងទីក្រុង Weldon ស្ថិតក្នុងខេត្ត Saskatchewan ភាគកណ្ដាលនៃប្រទេសកាណាដា។ លោកស្រី Blackmore បញ្ជាក់ថា ជនដៃដល់បានបើកការវាយប្រហារដោយកាំបិតនេះ ពីមួយកន្លែងទៅមួយកន្លែងទៀតជាបន្តបន្ទាប់គ្នា ចំនួន១៣ទីតាំង។
បន្ទាប់ពីមានការរាយការណ៍ពីប្រជាជននិងប្រមូលបានភស្តុតាងផ្សេងៗគ្នា ប៉ូលិសបានកំណត់អត្តសញ្ញាណជនសង្ស័យ ជាបុរសវ័យ៣០ឆ្នាំចំនួនពីរនាក់ ហើយបើកប្រតិបត្តិការតាមចាប់ពួកគេ ដោយព្រមានឱ្យប្រជាជនរស់នៅក្នុងតំបន់ជុំវិញបង្កើនការប្រុងប្រយ័ត្នខ្ពស់។
មកទល់ពេលនេះ ប៉ូលិសមិនទាន់អាចកំណត់បានថា បុរសទាំងពីរមានទំនាក់ទំនងជាមួយគ្នា ក្នុងការវាយប្រហារទាំង ១៣ កន្លែងឬអត់នោះទេ។ ចំណែកហេតុផលនៅពីក្រោយការវាយប្រហាររបស់ខ្មាន់កាំបិតនេះ ក៏ពុំទាន់ដឹងច្បាស់នៅឡើយដែរ។
ក្រោយការវាយប្រហារ សហគមន៍ James Smith Cree Nation បានប្រកាសដាក់សហគមន៍ក្នុងស្ថានភាពអាសន្ន រហូតដល់ថ្ងៃទីចុងខែកញ្ញានេះ។ ជាមួយគ្នានោះ ប៉ូលីសខេត្ត Saskatchewan និងខេត្តក្បែរខាង Alberta និងខេត្ត Manitoba ក៏បានជូនដំណឹងអំពីជនសង្ស័យនៅទូទាំងបណ្ដាខេត្ត ដើម្បីជាការប្រុងប្រយ័ត្ន ខណៈបុរសទាំង២ ត្រូវបានគេឃើញចុងក្រោយនៅក្រុង Regina ចម្ងាយប្រហែល ៣២០ គីឡូម៉ែត្រពីតំបន់កើតហេតុ៕
ដោយ៖ហួន ឌីណា
