ភ្នំពេញ៖ សិស្សកម្ពុជាចំនួន៥រូប ទទួលបានជោគជ័យ និងនាំយកមកនូវមេដាយជាច្រើនគ្រឿង និងពានរង្វាន់ពីការប្រកួតពានរង្វាន់ពិភពលោក World Scholar’s Cup (WSC) វគ្គ Global Round ក្នុងចំណោមសិស្សជាង១,០០០នាក់ មកពីប្រទេសជាង២០ ពីថ្ងៃទី០២ ដល់ទី០៧ ខែកញ្ញា ឆ្នាំ២០២២ នៅទីក្រុងបាងកក ប្រទេសថៃ ហើយឈានចូលការប្រកួតវគ្គផ្ដាច់ព្រ័ត្រ។

កម្មវិធី World Scholar’s Cup គឺជាកម្មវិធីប្រកួតចំណេះដឹងកម្រិតពិភពលោកប្រចាំឆ្នាំ ដែលមានការចូលរួមពីសិស្សប្រមាណ ១៥,០០០នាក់ មកពី៦៥ប្រទេស និងដែលមានគោលបំណងជំរុញទឹកចិត្តសិស្សានុសិស្សពីគ្រប់មជ្ឍដ្ឋាន ដើម្បីស្វែងរកសក្ដានុពលផ្ទាល់ខ្លួនរបស់ពួកគេ និងកសាងអ្នកដឹកនាំសម្រាប់ជោគវាសនារួមគ្នា នៃសហគមន៍នាថ្ងៃអនាគត។

យោងតាមសេចក្ដីប្រកាសព័ត៌មានរបស់សាលាអន្តរជាតិ ស៊ី អាយ អេ ហ្វឺសត៍ បានឱ្យដឹងនៅល្ងាចថ្ងៃទី០៩ ខែកញ្ញា ឆ្នាំ២០២២ថា សិស្សឆ្នើមទាំង៥នាក់នោះ គឺជាសិស្សចេញពីសាលារបស់ខ្លួន។ ពួកគេក៏ត្រូវបានជ្រើសរើសឲ្យត្រៀមខ្លួន ដើម្បីចូលរួមប្រកួតវគ្គផ្តាច់ព្រ័ត្រដណ្ដើមពានរង្វាន់ពិភពលោកប្រចាំឆ្នាំ២០២២ ដែលត្រូវប្រព្រឹត្តទៅ នៅសាកលវិទ្យាល័យយ៉េលដ៏ល្បី (Yale University) នៃសហរដ្ឋអាមេរិក នៅរវាងថ្ងៃទី១១ ដល់ទី១៦ ខែវិច្ឆិកា ឆ្នាំ២០២២។

យុវសិស្សឆ្នើមជ័យលាភីទាំង០៥ រូបគឺ៖
*ទី១៖ យុវសិស្ស ធន់ សុគន្ធភ្លីនដឺ ទទួលបានពានរង្វាន់ចំណាត់ថ្នាក់លេខ១ ផ្នែកការតស៊ូមតិជាក្រុម មេដាយចំនួន ១៣ គ្រឿង និងត្រូវបន្តទៅវគ្គផ្ដាច់ព្រ័ត្រ នៅសហរដ្ឋអាមេរិក
*ទី២៖ យុវសិស្ស ឌៀវសុរិន្ទរ៍ ណាត់និឆា ទទួលបានពានរង្វាន់ចំណាត់ថ្នាក់លេខ១ ផ្នែកការតស៊ូមតិជាក្រុម មេដាយចំនួន ៧គ្រឿង និងត្រូវបន្តទៅវគ្គផ្ដាច់ព្រ័ត្រ នៅសហរដ្ឋអាមេរិក
*ទី៣៖ យុវសិស្ស ជួរ គឹមលី ទទួលបានមេដាយចំនួន ០៧គ្រឿង និងត្រូវបន្តទៅវគ្គផ្ដាច់ព្រ័ត្រ នៅសហរដ្ឋអាមេរិក
*ទី៤៖ យុវសិស្ស ទីវ សុភ័ក្ត្រនីកា ទទួលបានមេដាយចំនួន ០៦គ្រឿង និងត្រូវបន្តទៅវគ្គផ្ដាច់ព្រ័ត្រផ្ដាច់ព្រ័ត្រ នៅសហរដ្ឋអាមេរិក
*ទី៥៖ យុវសិស្ស ឡុង ស៊ីងហួ ទទួលបានមេដាយចំនួន ០៦គ្រឿង និងត្រូវបន្តទៅវគ្គផ្ដាច់ព្រ័ត្រនៅសហរដ្ឋអាមេរិក។

គួរបញ្ជាក់ផងដែរថា លទ្ធផលជាផ្លែផ្កាដ៏ត្រចះត្រចង់ដែលទទួលបាននៅថ្ងៃនេះ គឺឆ្លុះបញ្ចាំងពីភាពជាដៃគូដែលមិនអាចខ្វះបានរវាងសាលា និងមាតាបិតា ឬអ្នកអាណាព្យាបាល ហើយគឺជារង្វាស់នៃគុណភាពអប់រំនៅសាលាអន្តរជាតិ CIA First International School ដូចមានចែងក្នុងទស្សនៈវិស័យរបស់សាលាតាំងពីដើមរៀងមក គឺផ្តល់បរិយាកាសនៃការបង្រៀន ដែលលើកកំពស់ដល់ការអប់រំកម្រិតខ្ពស់ជាលក្ខណៈអន្តរជាតិទាំងខ្មែរ និងអង់គ្លេស។

តាមរយៈការសិក្សាប្រកបដោយគុណភាពអប់រំខ្ពស់ និងមានការទទួលស្គាល់ទាំងកម្រិតជាតិ និងអន្តរជាតិនៃសាលាអន្តរជាតិ ស៊ី អាយ អេ ហ្វឺសត៍ រួមជាមួយនឹងការខិតខំប្រឹងប្រែងរបស់ប្អូនៗទាំង ០៥រូប សាលា សង្ឃឹមយ៉ាងមុតមាំថាប្អូនៗ នឹងទទួលបានភាពជោគជ័យក្នុងការប្រកួតវគ្គផ្ដាច់ព្រ័ត្រពានរង្វាន់ពិភពលោកនៅសហរដ្ឋអាមេរិក ដើម្បីនាំមកនូវកិត្តិយសសម្រាប់ខ្លួនឯង គ្រួសារ សហគមន៍សាលា និងជាតិមាតុភូមិនៃយើង៕ ដោយ៖ ទីណា