រតនគិរី ៖ នៅព្រឹកថ្ងៃទី ២០ ខែកញ្ញា ឆ្នាំ២០២២នេះសាខាកាកបាទក្រហមកម្ពុជា ខេត្តរតនគិរី ដែលមានឯកឧត្តម ញ៉ែម សំអឿន ជាប្រធាន បានធ្វើយុទ្ធនាការស្តីពី «ការផ្សព្វផ្សាយលើកកម្ពស់សុវត្ថិភាពចរាចរណ៍ផ្លូវគោក និងបរិយាបន្ន» ដឹកនាំដោយលោក ឌឹម ណាត នាយកសាខា ដោយមានការអញ្ជើញចូលរួមពី លោកស្រី ឡាំ ប៉ាប៉ាក អនុប្រធានគណៈកម្មាធិការអនុសាខា ស្រុកបរកែវ និងមន្រ្តីសាខា មន្រ្តីអនុសាខា មន្ត្រីនគរបាលចរាចរណ៍ផ្លូវគោក លោកគ្រូ អ្នកគ្រូទីប្រឹក្សាយុវជន យុវជនអ្នកស្ម័គ្រចិត្តកាកបាទក្រហមកម្ពុជាសរុបចំនួន ៣៦នាក់ ស្ថិតនៅផ្លូវជាតិ ៧៨អា ចំណុចមុខផ្សារបរកែវ ភូមិមួយ ឃុំឡាមិញ ស្រុកបរកែវ ខេត្តរតនគិរី ។

នៅក្នុងយុទ្ធនាការខាងលើនេះ ក្រុមការងារបានចែកខិត្តប័ណ្ណផ្សព្វផ្សាយសុវត្ថិភាពចរាចរណ៍ បិទស្ទិកឺចំណាំងផ្លាតតាមយានយន្តអ្នកធ្វើដំណើរ និងចាក់សារសម្លេង អានសារសម្លេងតាមឧឃោសនស័ព្ទ អំពាវនាវដល់បងប្អូនប្រជាពលរដ្ឋអ្នកប្រើប្រាស់ផ្លូវគោកទាំងអស់ មេត្តាយោគយល់អធ្យាស្រ័យក្នុងពេលធ្វើដំណើរ ហើយប្រកាន់យកវិធានការច្បាប់ដ៏តឹងរឹងចំពោះបទល្មើសចរាចរណ៍ផ្លូវគោក ដើម្បីចៀសវាងពីការប្រឈមចំពោះផ្លូវច្បាប់ ការពារ អាយុជីវិតខ្លួនឯង និងអ្នកដទែ និងរួមគ្នាលើកកម្ពស់កិត្តិយស សេចក្តីថ្លៃថ្នូររបស់ប្រទេសជាតិយើង ។

គួរបញ្ជាក់ផងដែរថា នៅក្នុងយុទ្ធនាការលើកកម្ពស់សុវត្ថិភាពចរាចណ៍ក្រុមការងារបាន សួរសំនួរ-ចម្លើយទៅកាន់ប្រជាពលរដ្ឋដែលធ្វើដំណើរពុំមានពាក់មួកសុវត្ថិភាព និងបំពាក់មួកសុវត្ថិភាពដល់អ្នកឆ្លើយសំណួរ ចំនួន ៣០មួក ប័ណ្ណសុវត្ថិភាពចរាចរណ៍ ចាប់ផ្ដើមពីខ្ញុំ A5 ចំនួន ៧០០សន្លឹក ប័ណ្ណសុវត្ថិភាពចរាចរណ៍ ចាប់ផ្ដើមពីខ្ញុំ A2 ចំនួន ១០០សន្លឹក ប័ណ្ណយល់ដឹងពីពិការភាពក្នុងសង្គម ចំនួន ១.១០០សន្លឹក ចំណាំង ចំនួន ៧០០ សម្រាប់ជូនប្រជាពលរដ្ឋដែលធ្វើដំណើរតាមដងផ្លូវផងដែរ៕ដោយ គតិ យុត្ត