ខេត្តបាត់ដំបង៖ កិច្ចពិភាក្សារវាងរដ្ឋបាលខេត្តបាត់ដំបង “ព្រះរាជាណាចក្រកម្ពុជា” និង ខេត្តស្រះកែវ “ព្រះរាជាណាចក្រថៃ” ត្រូវបានធ្វើឡើងនៅរសៀលថ្ងៃទី២១ ខែកញ្ញាឆ្នាំ២០២២ នាសាលប្រជុំសាលាខេត្តបាត់ដំបង ដោយខាងភាគីខេត្តបាត់ដំបង ដឹកនាំដោយ ឯកឧត្តម សុខ លូ គណៈអភិបាលខេត្ត និងខាងភាគីខេត្តស្រះកែវ ដឹកនាំដោយឯកឧត្តម បរិញ្ញា ភោធិស័ត្យ អភិបាលខេត្តស្រះកែវ ប្រទេសថៃ។

គោលបំណងនៃកិច្ចប្រជុំនេះ ផ្តោតសំខាន់ក្នុងការពង្រឹងនូវចំណងមិត្តភាព និងកិច្ចសហប្រតិបត្តិការ ដើម្បីការអភិវឌ្ឍន៍រវាងខេត្តទាំង២ ដោយលើកយកនូវគោលបំណងសំខាន់ៗ ដើម្បីពិភាក្សាផ្លាស់ប្តូរយោបល់ដើម្បីរកចំណុចឯកភាពគ្នាជាវិជ្ជមានដើម្បីផលប្រយោជន៍ទៅវិញទៅមកហើយក្នុងកិច្ចប្រជុំនេះភាគីទាំងពីរក៏បានបង្ហាញពីការប្ដេជ្ញាចិត្តក្នុងការលើកកម្ពស់និងពង្រឹងកិច្ចសហប្រតិបត្តិការលើវិស័យសំខាន់ៗមួយចំនួនដូចជា៖ វិស័យទេសចរណ៍ សេដ្ឋកិច្ច និងពាណិជ្ជកម្ម ជាដើម ។

តាមរយៈនៃកិច្ចប្រជុំរវាងភាគីទាំងពីរបានសម្រេចចេញជាលទ្ធផល ដោយបានចុះហត្ថលេខាលើកំណត់ហេតុខ្លឹមសារសំខាន់ៗនៃពិធីសាររួមចំនួន ៧ចំណុច ៖១.ជំរុញឱ្យមានការរៀបចំប្រជុំរវាងមន្រ្តីរដ្ឋបាល និងកងកម្លាំងដែលបំពេញការងារតាមបរិវេណព្រំដែនប្រទេសទាំង ក្នុងគោលបំណងពង្រឹងចំណងមិត្តភាព តាម រយៈការប្រជុំ និងដំណើរការដោះស្រាយបញ្ហារួមគ្នាការពារកុំឱ្យកើតមាននូវកំហុសឆ្គងផ្សេងៗ។២.ការសហការត្រួតពិនិត្យការធ្វើដំណើរឆ្លងដែនដើម្បីទប់ស្កាត់ការលួចឆ្លងដែនខុសច្បាប់ ។៣.កំណត់យកច្រកទ្វារព្រំដែនអន្តរជាតិ”បានខៅឌិន” ដែលឈមជាមួយច្រកទ្វារព្រំដែនអន្តរជាតិភ្នំដី”គីឡូ១៣” សម្រាប់បញ្ជូន -ទទួលពលករ កម្ពុជាដែលមានបំណងធ្វើដំណើរវិលត្រឡប់ទៅប្រទេសកម្ពុជា។៤.អនុញ្ញាតឱ្យយានជំនិះដែលជារថយន្តគ្រប់ប្រភេទរបស់ប្រទេសទាំងពីរដែលមានឯកសារគ្រប់គ្រាន់អាចធ្វើដំណើរឆ្លងដែនចូលឬចេញពីប្រទេសរបស់ភាគីណាមួយ ក្រោមលក្ខខណ្ឌដូចគ្នា ជាមួយនឹងការកាន់ប័ណ្ណឆ្លងដែន(Border Pass)ចាប់ពីថ្ងៃទី១ ខែតុលា ឆ្នាំ២០២២។ ៥.ដើម្បីជាប្រយោជន៍ក្នុងការទំនាក់ទំនងការលក់ដូរនៅតំបន់ព្រំដែន ផ្ដល់សិទ្ធិឱ្យសមត្ថកិច្ចកម្ពុជាចេញសំបុត្រឆ្លងដែនបណ្ដោះអាសន្នដល់ពលរដ្ឋកម្ពុជា (កាន់ប្រើប្រាស់) ហើយយកទៅបង្ហាញដល់នគរបាលអន្តោប្រវេសន៍ របស់ភាគីថៃ និងអនុញ្ញាតឱ្យធ្វើដំណើរ ដល់ផ្សារខៅឌិន(ផ្សារស៊ីផេន) ស្រុកខ្លងហាត និងតម្រូវឱ្យត្រឡប់មកវិញ នៅវេលាម៉ោង១៨៖០០នាទីល្ងាច(ហាមស្នាក់នៅ)ដោយអនុវត្តន៍ ចាប់ពីថ្ងៃទី១ខែតុលា ឆ្នាំ២០២២ តទៅ។ ៦. ការជួយបង្ការ និងកាត់បន្ថយគ្រោះមហន្តរាយសាធារណៈនៅតំបន់ព្រំដែន ដោយមានការគាំទ្រឧបត្ថម្ភ ផ្នែកបុគ្គលិក សម្ភារៈបរិក្ខានិងឧបករណ៍ចាំបាច់ ព្រមទាំងមានការបណ្ដុះបណ្ដាលនិងការផ្លាស់ប្ដូរទិន្នន័យព័ត៌មានរវាងមន្រ្តីពាក់ព័ន្ធ។៧.អនុញ្ញាតឱ្យយានយន្តគ្រប់ប្រភេទ ដូចជា៖ រថយន្តសង្រ្គោះបន្ទាន់ ឬ រថយន្តសម្រាប់ដឹកបញ្ជូនអ្នកជំងឺបន្តរបស់ប្រទេសទាំងពីរដែលត្រូវបានអនុញ្ញាតនិងមានការទំនាក់ទំនងសម្របសម្រួលពីមជ្ឈមណ្ឌលអន្តរជាតិទទួលបន្ទុកបញ្ជូនអ្នកជំងឺរវាងប្រទេស អាចធ្វើដំណើរឆ្លងកាត់ព្រំដែនចូលឬចេញពីទឹកដីនៃភាគីកិច្ចសន្យាណាមួយក្រោមលក្ខខណ្ឌដូចគ្នាជាមួយនឹងការកាន់លិខិតឆ្លងដែន (Passport) ឬប័ណ្ណឆ្លងដែន(Border Pass)។ លើកលែងតែករណីចាំបាច់បន្ទាន់ តម្រូវឱ្យទំនាក់ទំនងមជ្ឈមណ្ឌលអន្តរជាតិទទួលបន្ទុកបញ្ជូនអ្នកជំងឺរវាងប្រទេសធ្វើលិខិតបញ្ជាក់ឱ្យដល់អ្នកជំងឺជាមុន និងផ្ញើបញ្ជូនឯកសារភស្តុតាងនៅពេលក្រោយ ៕ អ៊ុក សំអាន