ភ្នំពេញ៖ សង្គមស៊ីវិលស្វាគមន៍ប្រតិបត្តិការចុះស្រាវជ្រាវទីតាំង បញ្ចាំ យានយន្ដគ្មានឯកសារខណៈដែលអាជ្ញាធររាជធានីភ្នំពេញ រកឃើញ ម៉ូតូរាប់រយគ្រឿងដែលគ្មានឯកសារត្រូវបានគេដាក់បញ្ចាំតាមបណ្ដាហាងបញ្ចាំមួយចំនួននៅភ្នំពេញ។

លោក សន ជ័យប្រធានអង្គការសម្ព័ន្ធគណនេយ្យភាពសង្គមកម្ពុជា ស្វាគមន៍ចំពោះប្រតិបត្តិការបស់អាជ្ញាធរចុះស្រាវជ្រាវទីតាំង បញ្ចាំនៅគ្រប់ខណ្ឌក្នុងរាជធានីភ្នំពេញបន្ទាប់ពីអាជ្ញាធរក្រុងភ្នំពេញបើកប្រតិបត្តិការចុះស្រាវជ្រាវទីតាំងបញ្ចាំខុសច្បាប់បីទីតាំងដែលទទួលទិញផលពីចោរកម្មក្នុងខណ្ឌទួលគោក ម្ដុំផ្សារឃ្លាំងរំសេវ សង្កាត់ទឹក ល្អក់ ទី៣ដោយបានរកឃើញម៉ូតូ២២២ គ្រឿងគ្មានឯកសារដាក់ បញ្ចាំងស្របច្បាប់ក្នុងចំណោមម៉ូតូដែលមានភាពមិនប្រក្រតីជាង៥០០គ្រឿង និងបានឃាត់ខ្លួនមនុស្សប្រាំនាក់។

លោកថា«ដំណើរដើមរឿងពិតជាអ៊ីចឹងមនុស្ស បើកាលណាចាញ់ ល្បែង នឹងយកមធ្យាបាយធ្វើដំណើរទៅបញ្ចាំមិនថា ម៉ូតូឬរថយន្ត ឡើយ។ប៉ុន្តែយើងសួរថា ដើមចមនៃការកកើតឡើងហាងបញ្ចាំ ។អ៊ីចឹងសម្រាប់ខ្ញុំយល់ថាការអនុញ្ញាត ឲ្យមានល្បែងស៊ីសង់ឬភ្នាល់ មិនថា ស្របច្បាប់ឬខុសច្បាប់សុទ្ធតែជាដើមសុទ្ធតែជា ប្រភពនៃ ការខាតបង់ទ្រព្យសម្បត្តិប្រជាពលរដ្ឋ។នេះយើងមិនទាន់រាប់ បញ្ចូលពីផលប៉ះពាល់មកលើសង្គមផ្នែកហិង្សាក្នុងគ្រួសារ សុភមង្គល ក្នុងគ្រួសារផង»។

លោក សន ជ័យ ជូនជាយោបល់ថា អាជ្ញាធរគួរតែរកឬសគល់ នៃបញ្ហាកុំឲ្យកើតមានល្បែងស៊ីសងទោះជាស្របច្បាប់ក៏ដោយ។

ចំណែកលោក យ៉ង គឹមអេង នាយកប្រតិបត្តិនៃមជ្ឈមណ្ឌល ប្រជាពលរដ្ឋដើម្បីអភិវឌ្ឍន៍ និងសន្តិភាព (PDP)យល់ថា ហាង បញ្ចាំជាមួយផ្នែកមួយតូចប៉ុណ្ណោះដែលជាប់ពាក់ព័ន្ធនឹងការប្រព្រឹត្តល្បែងស៊ីសងរបស់ពលរដ្ឋ។

លោកថា៖«ខ្ញុំគាំទ្រមួយផ្នែកចំពោះសកម្មភាពអាជ្ញាធរប្រយុទ្ធប្រឆាំងនឹងកន្លែងបញ្ចាំដែលគ្មានច្បាប់អនុញ្ញាតហើយប្រតិបត្តិស្រាវជ្រាវនេះគួរផ្ដោតលើក្រុមយុវជនអំពីដើមទងហេតុអ្វីនាំឲ្យគេយកមធ្យោបាយប្រើប្រាស់មកដាក់បញ្ចាំ សម្រាប់មនុស្សធំផ្ដោតលើមេគ្រួសារ»។

លោកបណ្ឌិត ឈត ប៊ុនថង ប្រតិបត្តិការស្រាវជ្រាវហាងបញ្ចាំជា ការ រួម ចំណែកយ៉ាងសំខាន់ដើរទន្ទឹមនឹងយុទ្ធនាការបង្ក្រាបល្បែង ស៊ីសង ខុសច្បាប់។លោកថា«បើកាលណាបិទកន្លែងបញ្ចាំខុសច្បាប់អាចធ្វើឲ្យអ្នកលួចគ្មានកន្លែងលក់គេនឹងលែងលួចខ្ញុំសុំឲ្យអាជ្ញាធរបន្តប្រតិបត្តិការនេះរៀងរហូតរួមចំណែកជួយសង្គមបានច្រើនណាស់»។លោកបណ្ឌិតស្នើឲ្យអាជ្ញាធរធ្វើការដោយប្រុងប្រយ័ត្នចំពោះហាងបញ្ចាំដែលស្របច្បាប់ព្រោះហាងបញ្ចាំស្របជួយសម្រាលបន្ទុកពលរដ្ឋបានមួយផ្នែក។

សូមជម្រាបជូនថា បន្ទាប់ពីរកឃើញម៉ូតូជាង៥០០គ្រឿង គ្មាន ឯកសារ ដាក់បញ្ចាំងស្របច្បាប់អាជ្ញាធរក៏បានដឹកម៉ូតូទាំងនោះ យកមកទុក ក្នុងឃ្លាំងផ្សាររុងរឿងដែលស្ថិតតាមបណ្ដោយផ្លូវOCICខណ្ឌជ្រោយចង្វារ។

ជានីតិវិធីដើម្បីបានម៉ូតូត្រឡប់ទៅវិញម្ចាស់ម៉ូតូត្រូវកាន់មកជាមួយនូវកាតគ្រីដោយផ្ទៀងផ្ទាត់ តួលេខម៉ាស៊ីន និងស្លាកលេខម៉ូតូ។ ដើម្បីឱ្យ ពលរដ្ឋងាយស្វែងរកម៉ូតូរបស់ខ្លួនយកកាតគ្រីមកផ្ទៀងផ្ទាត់ឬអធិការដ្ឋានខណ្ឌជ្រោយចង្វារ។ប្រតិបត្តិការនេះដែលដឹកនាំ ដោយ លោក ឃ្លាំង ហួត អភិបាលរងរាជធានីភ្នំពេញ។

លោកបានថ្លែងតាមប្រព័ន្ធឧឃោសនស័ព្ទពីកន្លែងឃ្លាំងទុកម៉ូតូនៅថ្ងៃទី២១ខែកញ្ញាថា អាជ្ញាធរបានរកឃើញម៉ូតូខុសប្រក្រតីចន្លោះ ៥០០ ទៅ៦០០គ្រឿង ហើយម៉ូតូខុសប្រក្រតីអាចនឹងមានច្រើនជាងនេះ ទៀតហើយប្រតិបត្តិការនេះបន្តធ្វើក្នុងខណ្ឌទាំងអស់ក្នុងរាជធានីភ្នំពេញ។

លោកថា«ខ្ញុំជឿថា ចោរលួច ឬចោរឆក់វាមិនស៊ីម៉ូតូទេ វាយកម៉ូតូទៅ លក់ដូរលុយ យកលុយមកលេងល្បែង ជក់គ្រឿងញៀន ខ្ញុំអរគុណ ចំពោះអ្នកផ្ញើសារប្រាប់ថា មានទីតាំងស្តុកម៉ូតូជាច្រើននៅឃ្លាំងរំសេវ បន្ទាប់ពីចុះទៅស្រាវជ្រាវចប់នៅឃ្លាំងរំសេវ ខ្ញុំនឹងចុះទាំង១៤ខណ្ឌ»។

លោក ឃ្លាំង ហួត បានគូសបញ្ជាក់ថា ប្រតិបត្តការរបស់អាជ្ញាធរ នៅពេលនេះ ស្របនឹងបទបញ្ជារបស់ប្រមុខរដ្ឋាភិបាលលោក ហ៊ុន សែន ។ លោកអភិបាលរងបានប្ដេជ្ញាធ្វើការងារនេះឲ្យបានចប់ចុងចប់ដើមដើម្បីប្រយោជន៍ដែលរងគ្រោះពីអំពើចោរកម្ម។លោកថា« ខ្ញុំសុំសន្យា សុំសច្ចាទាំងមេឃកំពុងភ្លៀងរលឹម បើខ្ញុំធ្វើការងារនេះគ្មានភាព ត្រង់ជាមួយប្រជាជន សុំឲ្យរន្ទះស្លាប់ ខ្ញុំបូជាកម្លាំងកាយ កម្លាំងចិត្ត ដោយមានការចូលរួមពីប្រជាពលរដ្ឋ ព្រះរាជអាជ្ញា អភិបាលខណ្ឌ នគរបាលខណ្ឌ កងរាជអាវុធហត្ថខណ្ឌ និងជាពិសេស ស្នងការដ្ឋាន នគរបាលរាជធានីភ្នំពេញ ដើម្បីផ្ដល់ភាពយុត្តិធម៌ជូនជនរងគ្រោះ និងបញ្ឈប់សកម្មភាពលួចឆកប្លន់»។

អភិបាលរងរូបនេះ៖«បើអត់កន្លែងបញ្ចាំចោរក៏ត្រូវបានកាត់បន្ថយដែរ មិនមែនថា អត់សោះទេដូច្នេះយើងត្រូវជីកឬសបញ្ហានេះ ហើយ យើងអត់ចង់បង្ក្រាបទេ យើងចង់ទប់ស្កាត់កុំឲ្យមានបទល្មើស យើង អត់ចង់ប្លន់ហើយដើរទៅរកម៉ូតូទេ»។

ប្រតិបត្តិការចុះស្រាវជ្រាវហាងបញ្ចាំជាផ្នែកមួយយុទ្ធនាការបង្ក្រាបស៊ីសង់នៅទូទាំងប្រទេសដែលកំពុងប្រយុទ្ធដូចភ្លៀងរលឹមនារដូវវស្សា។សង្គមស៊ីវិលសង្ឃឹមថាប្រតិបត្តិការធ្វើឡើងជាប់ជាប្រចាំជាមួយនឹងប្រសិទ្ធិភាពទទួលយកបានមិនត្រឹមដំណាក់មុនការបោះឆ្នោតដើម្បីបានសំឡេងគាំទ្រ៕ ដោយ៖ អេង រាជនី