ស្រុកចំនួន៨ ក្នុងខេត្តសៀមរាប រងការជន់លិចលង់ដោយជំនន់ទឹកភ្លៀង
ខេត្តសៀមរាប៖ តាមរបាយការណ៍របស់លេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្តសៀមរាប បានឲ្យដឹងថា ដោយស្ថានភាពអាកាសធាតុក្នុងរយៈពេលជិតមួយសប្តាហ៍នេះ មានភ្លៀងធ្លាក់ជាបន្តបន្ទាប់ចាប់ពីថ្ងៃទី១៧ ដល់ថ្ងៃទី២១ ខែកញ្ញា ឆ្នាំ២០២២ ជំនន់ទឹកភ្លៀងបានបណ្តាលឲ្យប៉ះពាល់ដល់ភូមិចំនួន ១៥០ភូមិ នៃឃុំចំនួន ៣១ ក្នុងស្រុកចំនួន ៨ រួមមាន ៖ ស្រុកស្រីស្នំ ស្រុកក្រឡាញ់ ស្រុកជីក្រែង ស្រុកអង្គរជុំ ស្រុកវ៉ារិន ស្រុកពួក ស្រុកសូទ្រនិគម និងស្រុកប្រាសាទបាគង បង្កឲ្យមានផលប៉ះពាល់ដល់ប្រជាពលរដ្ឋចំនួន ២ពាន់៩០៦គ្រួសារ ក្នុងនោះលិចបរិវេណផ្ទះកម្រិតស្រាលចំនួន ១ពាន់៧៦០ខ្នង និងកម្រិតធ្ងន់ចំនួន ២៩ខ្នង ហើយមានប្រជាពលរដ្ឋចំនួន៤ គ្រួសារ បានជម្លៀសដោយខ្លួនឯងទៅនៅជាមួយសាច់ញាតិដែលនៅជិតៗ ដោយឡែកប្រជាពលរដ្ឋដទៃនៅពុំទាន់ដល់កម្រិតដែលត្រូវជម្លៀសទៅកាន់ទីទួលសុវត្ថិភាពនៅឡើយទេ ។

ក្នុងរបាយការណ៍បានបញ្ជាក់បន្ថែមថា ក្រៅពីប៉ះពាល់ដល់លំនៅឋាននិងប្រជាពលរដ្ឋនោះ ទឹកជំនន់នេះ បានប៉ះពាល់ដល់ស្រូវពង្រោះចំនួន ៦ពាន់១២៥ហិកតា ដំឡូងមី ចំនួន ១ពាន់៥៧៨ហិកតា លិចទីធ្លាសាលារៀន ៣៣កន្លែង មណ្ឌលសុខភាព ០៤កន្លែង អាគាររដ្ឋបាលឃុំ ប៉ុស្តិ៍រដ្ឋបាល ០៧កន្លែង លិចបរិវេណវត្ត ០៦កន្លែង លិចផ្លូវប្រវែង ៧៨ពាន់៤២៦ម៉ែត្រ និងខូចខាតប្រវែង ២ពាន់៣៦៦ម៉ែត លិចខ្នងទំនប់ ខ្នងប្រឡាយ ប្រវែង ១៩ពាន់២២៣ម៉ែត្រ និងខូចខាតប្រវែង ៩៥ម៉ែត លិចស្ពាន ០១កន្លែង និងខូចខាតប្រវែង ១០ម៉ែត្រ ងាប់គោចំនួន ០១ក្បាល ងាប់មាន់ទាសរុបចំនួន ៦៧៦ក្បាល តែមិនបានធ្វើឲ្យប៉ះពាល់ដល់អាយុជីវិតប្រជាពលរដ្ឋណាម្នាក់ឡើយ ។

បន្ទាប់ពីមានករណីជំនន់ទឹកភ្លៀងកើតឡើង លេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយខេត្ត បានចេញសារជូនដំណឹង ដល់បងប្អូនប្រជាពលរដ្ឋ និងសាធារណជន នៅក្នុងភូមិសាស្ត្រខ្លះនៃខេត្តសៀមរាប ឱ្យមានលក្ខណៈ ត្រៀមបម្រុង និងតាមដានបង្កើនការយកចិត្តទុកដាក់ប្រុងប្រយ័ត្នឱ្យបានខ្ពស់ដើម្បី ឆ្នាំ២០២២ ដែលកម្ពុជាកំពុងបន្តទទួលរងឥទ្ធិពលជ្រលងសម្ពាធទាប (ITCZ) ។ ជាមួយគ្នានេះដែរ រដ្ឋបាលខេត្តសៀមរាប សហការជាមួយគណៈកម្មាធិការសាខាកាកបាទក្រហមកម្ពុជាខេត្ត អាជ្ញាធរក្រុង ស្រុក ឃុំសង្កាត់ បានចុះពិនិត្យមើលស្ថានភាពទឹកជំនន់ និងផលប៉ះពាល់ផលដំណាំរួមផ្សំផ្សេងៗរបស់បងប្អូនប្រជាពលរដ្ឋ ព្រមទាំងបានធ្វើការណែនាំដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្ន មើលថែកូនចៅឲ្យបានល្អចៀសវាងគ្រោះថ្នាក់ដោយការលង់ទឹក ការថែទាំសុខភាព ការបង្កាជម្ងឺរាករូស កាពារពីការយាយីពីសត្វមានអាសិរពិស និង ការស្វែងរកទីទួលមានសុវត្ថិភាព ក្នុងករណីទឹកជំនន់នៅតែបន្តកើនឡើងខ្លាំងទៀត ។ ដោយឡែកចំពោះស្ថានភាពជំនន់ទឹកភ្លៀងក្នុងក្រុងសៀមរាបវិញ បានលិចទឹកនៅតាមភូមិនៃបណ្ដាសង្កាត់ចំនួន១១ បណ្ដាលឲ្យលិចនូវហេដ្ឋារចនាសម្ព័ន្ធនានា បរិវេណផ្សារ សាលារៀន មណ្ឌលសុខភាព និងតាមបណ្តាដងផ្លូវសំខាន់ៗក្នុងក្រុង ដោយបរិមាណទឹកភ្លៀងខ្លាំង ធ្វើឲ្យចរន្ធទឹកហូរចូលលូមិនទាន់ ហើយ ក៏បានស្រកទឹកវិញជាក្រោយពេលភ្លៀងឈប់ធ្លាក់ ។

ស្របតាមសេចក្ដីជូនដំណឹងរបស់ក្រសួងធនធានទឹក និងឧតុនិយម ដែលបានព្យាករណ៍អាការធាតុចាប់ពីថ្ងៃទី២១-២៩ ខែកញ្ញា ឆ្នាំ២០២២ ចំពោះឥទ្ធិពល ជ្រលងប្រព័ន្ធសម្ពាធទាប (ITCZ) ដែលអាចធ្វើឱ្យមានជំនន់ទឹកភ្លៀងកើតឡើង ជាយថាហេតុ ស្របពេលតំបន់មួយចំនួនមានការជន់លិចស្រាប់នាអំឡុងពេលនេះ ។ ក្នុងនោះលេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយខេត្ត ក្រុង ស្រុក ឃុំ សង្កាត់ ក៏បានត្រៀមលក្ខណៈ ដើម្បីតាមដាន និងត្រៀមបម្រុងសម្រាប់ជួយសង្គ្រោះក្នុង ករណីមានគ្រោះមហន្តរាយ ឬឧបទ្ទវហេតុផ្សេងៗផងដែរ ៕ ម៉ី សុខារិទ្ធ

