ភ្នំពេញ៖ គណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានបើកកិច្ចប្រជុំរួមមួយ ដើម្បីបូកសរុបការងារ ៩ខែដើមឆ្នាំ២០២២ និងលើកទិសដៅ ក៏ដូចជាដោះស្រាយបញ្ហាប្រឈមនានា ដែលពាក់ព័ន្ធទៅនឹងដំណើរការ នៃការត្រៀមលក្ខណៈ និងការរៀបចំធ្វើជាម្ចាស់ផ្ទះព្រឹត្តការណ៍កីឡាស៊ីហ្គេម លើកទី៣២ -អាស៊ានប៉ារ៉ាហ្គេម លើកទី១២ ឆ្នាំ២០២៣ ។

ពិធីនេះធ្វើឡើងក្រោមអធិតីភាពសម្តេចពិជ័យសេនាទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC នៅទីស្តីការក្រសួងការពារជាតិ នាព្រឹកថ្ងៃទី២២ ខែកញ្ញា ឆ្នាំ២០២២ ។

ថ្លែងបញ្ជាក់ក្រោយកិច្ចប្រជុំ ឯកឧត្តម វ៉ាត់ ចំរើន អគ្គលេខាធិការ CAMSOC បានមានប្រសាសន៍ គណៈកម្មនីមួយៗ បានធ្វើសេចក្ដីរាយការណ៍យ៉ាងជាក់លាក់នូវដំណើរការរបស់ខ្លួន ក៏ដូចជាផ្ដល់ចេញនូវសំណើរ និងសំណូមពរមួយចំនួន ដើម្បីឲ្យមានការរួមគ្នាដោះស្រាយ ។ អ្វីដែលគណៈកម្មការមានការវាយតម្លៃខ្ពស់ នូវវឌ្ឍនភាពការងារហើយ តែក៏នៅមានបញ្ហាប្រឈមមួយចំនួនដែរ រួមទាំងការងារត្រូវធ្វើបន្ដ ក្នុងនោះសម្ដេចពិជ័យសេនា ទៀ បាញ់ បានផ្ដល់អនុសាសន៍ណែនាំមួយចំនួន ហើយចំណុចដែលសំខាន់ គឺសម្ដេចបានឲ្យរាជធានី-ខេត្ត ដែលជារដ្ឋបាលដែនដីទទួលបន្ទុលគាំទ្រដល់ស៊ីហ្គេមនេះ ត្រូវរៀបចំជាក់លាក់អំពីការទទួលខុសត្រូវរបស់រាជធានី-ខេត្ត និងរៀបចំអ្នកទទួលខុសត្រូវជាអភិបាលរងម្នាក់ ដើម្បីធ្វើការជាមួយគណៈកម្មាធិការជាតិ CAMSOC ឲ្យមានភាពច្បាស់លាស់ ហើយទទួលបាននូវការទទួលខុសត្រូវ និងបំពេញបានតាមភារកិច្ច ការងារ ដែលគណៈកម្មាធិការជាតិ CAMSOC បំផុសឲ្យមានយុទ្ធនាការជាតិទូទាំងប្រទេស ។

មួយទៀត សម្ដេចមានប្រសាសន៍សង្កត់ធ្ងន់ ទៅលើការងារប្រមូលផ្ដុំកម្លាំងមកធ្វើការនៅក្នុងមជ្ឈមណ្ឌលប្រតិបត្តិការរួម ដែលមជ្ឈមណ្ឌលប្រតិបត្តិការពិសេសនេះ នឹងបើកដំណើរការនាដើមខែវិច្ឆិកា នៅពហុកីឡដ្ឋានជាតិមរតកតេជោ ។

ចឹងយើងដឹងហើយ គណៈកម្មាធិការជាតិ CAMSOC បានប្រមូលកម្លាំងមកពីក្រសួង-ស្ថាប័នទាំងអស់មកធ្វើការរួមគ្នា ហើយក៏មានការងារតាមអង្គភាពមួយចំនួនដែរ ។ ចឹងសម្ដេចមានប្រសាសន៍ថា អ្នកទាំងអស់ ត្រូវប្រមូលផ្ដុំគ្នា ហើយធ្វើការទទួលសិទ្ធច្បាស់លាស់ពីក្រសួងរបស់ខ្លួន សម្រាប់រយៈពេល ៦-៧ខែ គឺមកធ្វើជាមួយគ្នា សម្រេចជាមួយគ្នា និងអនុវត្តជាមួយគ្នា ។ នេះគឺជាប្រសិទ្ធភាព នៃការធានាបាននូវការដឹកនាំគ្រប់គ្រងព្រឹត្តិការណ៍ហ្នឹងឲ្យទទួលបានជោគជ័យ ។

សំខាន់មួយទៀត គឺការរៀបចំឲ្យមានយន្ដការច្បាស់លាស់លើការងារថវិកា ទាំងការចំណាយ និងចំណូល ហើយនឹងការរៀបចំឲ្យមានចំណាយ-ចំណូល ក៏ដូចជាការស្នើសុំគម្រោងទាំងអស់ ត្រូវមានកិច្ចសន្យា ដើម្បីធានាបាននូវថវិកាគ្រប់គ្រាន់ ក្នុងការធ្វើការងារ តែអ្វីដែលសំខាន់ គឺធានាបាននូវតម្លាភាពក្នុងហិរញ្ញវត្ថុ ទៅតាមគោលការណ៍ដែលមានចែង ធ្វើការដោយសុចរិតភាពក្នុងការចំណាយ។

ឯកឧត្តមអគ្គលេខាធិការ បន្ថែមថា ក្រោមការដឹកនាំ និងបញ្ជាផ្ទាល់ពីឯកឧត្តមបណ្ឌិត ថោង ខុន តែងតែជំរុញ ផ្ដល់នូវគតិបណ្ឌិតល្អ ដើម្បីដោះស្រាយបញ្ហាដែលមាននៅសល់ពាក់ព័ន្ធនឹងការរាំងស្ទះរបស់គណៈកម្មាធិការជាតិ CAMSOC បានយ៉ាងរលូន ហើយមានឆន្ទៈទាំងអស់គ្នា ក្នុងការរួមជាមួយការដឹកនាំដ៏ខ្ពង់ខ្ពស់ប្រកបទៅដោយគុណធម៌របស់សម្ដេចពិជ័យសេនាប្រធាន គឺយើងសង្ឃឹមថា ការងារនេះ នឹងទទួលបានជោគជ័យ នៅក្នុងដំណើរវិវឌ្ឍន៍របស់ខ្លួន នៅក្នុងដំណាក់កាលចុងក្រោយនេះ ។

សម្ដេចពិជ័យសេនា ក៏បានដាស់តឿន ឲ្យរួមគ្នាខិតខំធ្វើការ រួមគ្នាទទួលខុសត្រូវចំពោះមុខនូវបេសកកម្មរបស់រាជរដ្ឋាភិបាល ជូនដល់គណៈកម្មាធិការជាតិ CAMSOC ដើម្បីផ្ដល់នូវទំនុកចិត្ដដល់ការទទួលបដិសណ្ឋារកិច្ចប្រតិភូកីឡាទាំងអស់ ដែលមកពីគ្រប់ទិសទី ស្របតាមការដាក់ចេញនូវយុទ្ធនាការទាំង ៥ របស់សម្ដេចតេជោ ហ៊ុន សែន ទី១-យុទ្ធនាការកម្ពុជាស្អាត បដិសណ្ឋារកិច្ចល្អ, យុទ្ធនាការប្រជាជនម្នាក់លេងកីឡាមួយមុខប្រចាំជីវិត, យុទ្ធនាការកីឡារស់ក្នុងសន្ដិភាព, យុទ្ធនាការឆ្នាំទស្សនាកម្ពុជា ២០២៣, យុទ្ធនាការកាត់បន្ថយគ្រោះថ្នាក់ចរាចរ និងកាត់បន្ថយគ្រឿងញៀន ដើម្បីឈានទៅសម្រេចជោគជ័យ នៅព្រឹត្តការណ៍ជាប្រវត្តិសាស្រ្តដំបូងរបស់ព្រហរាជណាចក្រកម្ពុជា ៕ ចាន់ វិចិត្រ