ហូណូលូលូ៖ មន្ត្រីទទួលបន្ទុកទីបញ្ជាការតំបន់ឥណ្ឌូ-ប៉ាស៊ីហ្វិករបស់សហរដ្ឋអាមេរិកនៅទីក្រុង Honolulu បាននិយាយថា ការធ្វើតេស្តនុយក្លេអ៊ែរដោយកូរ៉េខាងជើង នឹងក្លាយជា “អ្នកផ្លាស់ប្តូរហ្គេម” នៅក្នុងតំបន់ ហើយបង្កឱ្យមានការឆ្លើយតបរបស់សហរដ្ឋអាមេរិក ដែលគ្របដណ្តប់លើឧបករណ៍ជាច្រើននៃអំណាចជាតិ។

មន្ត្រីម្នាក់ក្នុងលក្ខខណ្ឌមិនបញ្ចេញឈ្មោះបានប្រាប់អ្នកសារព័ត៌មានថា កូរ៉េខាងជើងដែលបានបាញ់មីស៊ីលផ្លោងចំនួនបួនគ្រាប់ក្នុងសប្តាហ៍មុននេះ ហាក់ដូចជាកំពុងរៀបចំសម្រាប់ការសាកល្បងនុយក្លេអ៊ែរ ដែលទំនងជានឹងធ្វើឡើងមួយទៅពីរសប្តាហ៍ បន្ទាប់ពីសមាជបក្សកុម្មុយនិស្តចិនចាប់ពីថ្ងៃទី ១៦ ខែតុលាខាងមុខ។

ពាក់ព័ន្ធនឹងការអះអាងនេះដែរ ប្រមុខកងទ័ពជើងអាមេរិកក្នុងតំបន់ លោកឧត្តមនាវីឯក Sam Paparo បាននិយាយថា រាល់ការសាកល្បងបែបនេះ នឹងក្លាយជាបញ្ហាធ្ងន់ធ្ងរ ការព្រួយបារម្ភយ៉ាងធ្ងន់ធ្ងរ ហើយនឹងជំរុញឱ្យមានការឆ្លើយតបយ៉ាងទូលំទូលាយរបស់សហរដ្ឋអាមេរិក។

លោកបានបញ្ជាក់យ៉ាងដូច្នេះថា ការឆ្លើយតបនោះ នឹងក្លាយជាលើកដំបូង នៅក្នុងការពិគ្រោះយោបល់យ៉ាងជិតស្និទ្ធជាមួយសម្ព័ន្ធមិត្តរបស់យើង គឺកូរ៉េខាងត្បូង ហើយទំនងជានឹងអនុលោមតាមគោលលទ្ធិរបស់យើង នៃការទប់ស្កាត់រួមបញ្ចូលគ្នា ហើយវាក៏នឹងពង្រីកឧបករណ៍ជាច្រើននៃអំណាចជាតិ ដោយសំដៅទៅលើវិធានការផ្នែកការទូត យោធា និងសេដ្ឋកិច្ច។

សូមជម្រាបថា ស្ថិតក្រោមសម្ពាធពីទណ្ឌកម្មអន្តរជាតិជុំវិញកម្មវិធីអាវុធរបស់ខ្លួន កូរ៉េខាងជើងបានអនុម័តកាលពីខែកញ្ញាកន្លងទៅ នូវដំណោះស្រាយមួយដោយប្រកាសខ្លួនជាមហាអំណាចនុយក្លេអ៊ែរ “មិនអាចត្រឡប់វិញបាន”។ កន្លងមក កូរ៉េខាងជើងបានធ្វើការសាកល្បងនុយក្លេអ៊ែរចំនួន ៦លើក ចាប់តាំងពីឆ្នាំ ២០០៦ ដោយការធ្វើតេស្តថ្មីបំផុត និងខ្លាំងក្លាបំផុតក្នុងឆ្នាំ ២០១៧៕
ប្រភព៖ CNA ប្រែសម្រួល៖ ទីណា និងបុត្រា