អាមេរិក៖ ក្រុមហ៊ុនផលិតរថយន្តដើរដោយថាមពលអគ្កិសនី Tesla បានចេញផ្សាយរបាយការណ៍របស់ខ្លួន នៅថ្ងៃអាទិត្យ ទី០២ខែតុលាឆ្នាំ២០២២ ដែលបង្ហាញថា ក្រុមហ៊ុននេះ លក់រថយន្តបានចំនួន ៣៤៣,៨៣០គ្រឿង ក្នុងត្រីមាសទី៣ នៃឆ្នាំ២០២២។ចំនួននេះកើនឡើងប្រមាណ៤២ភាគរយ បើធៀបនឹងរយៈពេលដូចគ្នាកាលពីឆ្នាំ២០២១កន្លងទៅ ដែលក្រុមហ៊ុន Tesla លក់រថយន្តបានចំនួន ២៤១,៣៩១គ្រឿង។

ក្រៅពីកំណើននៃការលក់រថយន្ត ការផលិតរថយន្តរបស់ក្រុមហ៊ុន Tesla ក៏មានការកើនឡើងផងដែរនៅឆ្នាំ២០២២នេះ។ សម្រាប់ឆ្នាំ២០២២នេះ Tesla ផលិតរថយន្តបានចំនួន ៣៦៥,៩២៣គ្រឿង ខណៈការផលិតនៅឆ្នាំ២០២១ មានចំនួន ២៣៧,៨២៣គ្រឿង។

ក្នុងពេលដែលផលិតកម្មកើនឡើង ក្រុមហ៊ុនផលិតរថយន្តដើរដោយថាមពលអគ្គិសនីរបស់បុរសខ្លាំង អេឡុន ម៉ាស់(Elon Musk) បានទទួលស្គាល់ពីបញ្ហាប្រឈមរបស់ខ្លួន ក្នុងការបញ្ជូនរថយន្តទៅកាន់អតិថិជននៅទូទាំងពិភពលោក ដោយសារតែការឡើងថ្លៃនៃតម្លៃដឹកជញ្ជូន បណ្ដាលមកពីវិបត្តិថាមពលសកល។

នៅលើទីផ្សាររថយន្តអគ្គិសនី Tesla គឺជាក្រុមហ៊ុនមួយដែលលក់រថយន្តអគ្គិសនីបានច្រើនជាងក្រុមហ៊ុនផលិតរថយន្តផ្សេងទៀតទាំងអស់លើលោក លើកលែងតែក្រុមហ៊ុនរបស់ចិន។ នាពេលបច្ចុប្បន្ននេះ ការលក់រថយន្តដើរដោយថាមពលអគ្គិសនីរបស់ចិនវ៉ាដាច់ក្រុមហ៊ុនមកពីបណ្ដាប្រទេសដទៃទៀត ដោយសារតែរថយន្តរបស់ចិនដាក់លក់ក្នុងតម្លៃសមរម្យជាង។ មិនត្រឹមតែប៉ុណ្ណោះ ទីផ្សារនៅក្នុងប្រទេសចិនមានទំហំធំធេងសម្បើមណាស់។ គ្រាន់តែបរិមាណលក់រថយន្តអគ្គិសនីនៅក្នុងប្រទេសចិនតែមួយ មានចំនួនច្រើនជាងការលក់រថយន្តអគ្គិសនីនៅលើពិភពលោករួមបញ្ចូលគ្នាទៅទៀត។

គួរកត់សម្គាល់ថា ការប្រកួតប្រជែងនៅក្នុងទីផ្សាររថយន្តអគ្គិសនីនេះ ធ្វើឡើងក្នុងពេលដែលប្រទេសទាំងអស់លើលោកកំពុងតែពួតដៃគ្នាដាក់ចេញវិធានការនានា ដើម្បីកាត់បន្ថយការប្រែប្រួលអាកាសធាតុ។ កាលពីចុងខែមិថុនា ឆ្នាំ២០២២ គណៈកម្មការអឺរ៉ុបកំណត់វិធានការហាមឃាត់នូវរថយន្តដែលបំពាក់ដោយម៉ាស៊ីនប្រើប្រេងសាំង ប្រេងម៉ាស៊ូត និងរថយន្តហាយប្រ៊ីដ (Hybride) ចាប់ពីឆ្នាំ២០៣៥តទៅ ហើយគ្រប់រថយន្តផលិតថ្មី លក់នៅលើទីផ្សារអឺរ៉ុបទាំងអស់ គឺត្រូវតែជារថយន្តអគ្គីសនីទាំងស្រុង១០០ភាគរយ៕ ដោយ៖ កែវ កិរិយា