មូលនិធិរូបិយវត្ថុអន្តរជាតិនឹងពិចារណាលើការផ្តល់មូលនិធិសង្គ្រោះបន្ទាន់ថ្មីចំនួន ១,៣ ប៊ីលានដុល្លារសម្រាប់អ៊ុយក្រែន
អន្តរជាតិ៖ ក្រុមប្រឹក្សាប្រតិបត្តិរបស់មូលនិធិរូបិយវត្ថុអន្តរជាតិ (IMF) នឹងពិចារណាលើសំណើរបស់អ៊ុយក្រែន លើមូលនិធិសង្គ្រោះបន្ទាន់បន្ថែមចំនួន ១,៣ ប៊ីលានដុល្លារ ខណៈដែលសង្រ្គាមរបស់រុស្ស៊ីប្រឆាំងនឹងប្រទេសនេះនៅតែបន្ត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលស្រង់សម្ដីប្រភពពីររូបដឹងពីបញ្ហានេះ។
ប្រភពអះអាងថា បុគ្គលិក IMF បានរៀបចំឯកសារចាំបាច់ ហើយជឿជាក់ថា អ៊ុយក្រែនទទួលបានការធានាផ្នែកហិរញ្ញវត្ថុគ្រប់គ្រាន់ពីប្រទេសដៃគូនៅលើពិភពលោករបស់ខ្លួន ដើម្បីបំពេញតាមការចង់បានរបស់ IMF លើតម្រូវការនិរន្តរភាពបំណុល និងលក្ខណៈសម្រាប់មូលនិធិសង្គ្រោះបន្ទាន់បន្ថែម។
ប្រសិនបើសំណើត្រូវបានអនុម័ត នោះមូលនិធិនឹងបានមកពីកម្មវិធីផ្តល់ប្រាក់កម្ចីបន្ទាន់ថ្មីមួយ ដើម្បីដោះស្រាយការខ្វះខាតស្បៀងអាហារ ដែលក្រុមប្រឹក្សាអនុម័តកាលពីសប្តាហ៍មុន។
កន្លងមកមន្ត្រី IMFបានសរសើរដល់រដ្ឋាភិបាលអ៊ុយក្រែន និងធនាគារកណ្តាលរបស់ប្រទេសនេះ ចំពោះការគ្រប់គ្រងវិបត្តិសេដ្ឋកិច្ច ដែលបណ្តាលមកពីការឈ្លានពានរបស់រុស្សី ដែលចាប់ផ្ដើមនៅចុងខែកុម្ភៈ។ មិនបានប៉ុន្មានផងក្រោយពីការឈ្លានពាន ពោលគឺនៅដើមខែមីនា IMF បានផ្តល់ជំនួយសង្គ្រោះបន្ទាន់ចំនួន ១,៤ ប៊ីលានដុល្លារដល់អ៊ុយក្រែន។
ជុំវិញការស្នើសុំមូលនិធិថ្មីរបស់អ៊ុយក្រែនIMF មិនបានធ្វើអត្ថាធិប្បាយយ៉ាងណានោះទេ។ ទោះបីជាយ៉ាងនេះក្ដី មន្ត្រីអ៊ុយក្រែនបន្តការទទូចសុំរបស់ខ្លួន ក្រោមកម្មវិធីផ្តល់ប្រាក់កម្ចីពេញលេញរបស់ IMF ហើយកម្មវិធីបែបនេះ អាចកើតឡើងនៅពេលក្រោយ។
គួរបញ្ជាក់ថា បន្ទាប់ពីរុស្ស៊ីបើកការឈ្លានពាន ប្រទេសលោកខាងលិច ជាពិសេសសហរដ្ឋអាមេរិក និងសហភាពអឺរ៉ុប បានផ្ដល់ជំនួយរាប់លានដុល្លារដល់អ៊ុយក្រែន ទាំងជំនួយផ្នែងមនុស្សធម៌ និងយោធា។ កាលពីថ្ងៃសុក្រសប្ដាហ៍មុន សភាអាមេរិកបានអនុម័តលើជំនួយ ១២,៣ ប៊ីលានដុល្លារដល់អ៊ុយក្រែន ដែលនឹងប្រើដើម្បីថាហេដ្ឋារចនាសម្ព័ន្ធសំខាន់ៗរបស់អ៊ុយក្រែននៅតែដំណើរការ។ ៣ប៊ីលានដុល្លារក្នុងនោះ នឹងប្រើលើសព្វាវុធការផ្គត់ផ្គង់ផ្សេងៗនិងប្រាក់ខែសម្រាប់យោធាអ៊ុយក្រែនហើយ ៤,៥ ប៊ីលានដុល្លារ នឹងប្រើដើម្បីរក្សាស្ថិរភាពហិរញ្ញវត្ថុរបស់ក្រុងកៀវ និងដំណើរការរបស់រដ្ឋាភិបាល៕
ដោយ៖ហួន ឌីណា
ប្រភព៖ IMF to consider $1.3bn in emergency funding for Ukraine
