ភូមិវត្តបូព៌ជាប់លេខ៣ ក្នុងចំណោមសង្កាត់ល្អជាងគេចំនួន៥១ នៅលើពិភពលោក
ភ្នំពេញ៖ ទស្សនាវដ្ដីដ៏ចំណាស់មួយរបស់ប្រទេសអង់គ្លេសបានឱ្យចំណាត់ថ្នាក់ភូមិវត្តបូព៌នៃខេត្តសៀមរាបជាប់លេខបី ក្នុងចំណោមសង្កាត់ល្អជាងគេចំនួន៥១ នៅលើពិភពលោក។
យោងតាមការបោះពុម្ពដោយ Timeout ដែលជាទស្សនាវដ្តីអន្តរជាតិដែលមានមូលដ្ឋាននៅចក្រភពអង់គ្លេសបានបង្ហាញថា ការជ្រើសរើសនេះ គឺផ្អែកលើការស្ទង់មតិលើអ្នកដែលរស់នៅក្នុងទីក្រុង និងអ្នកជំនាញក្នុងតំបន់ចំនួន ២០,០០០នាក់ ស្នើសុំឱ្យដាក់ចំណាត់ថ្នាក់កន្លែងដ៏អស្ចារ្យបំផុតសម្រាប់ការកម្សាន្ត អាហារ វប្បធម៌ និងសហគមន៍។
បច្ចុប្បន្ននេះ ភូមិវត្តបូព៌មានកន្លែងដ៏អស្ចារ្យជាច្រើនដូចជា Laundry និង Miss Wong ភោជនីយដ្ឋានដែលមានទេសភាពប្រកបដោយភាពច្នៃប្រឌិតដូចជា Banlle និង Pou Restaurant & Bar សណ្ឋាគារល្បីៗលំដាប់អន្តរជាតិដូចជា Viroth’s និង Treeline Urban Resort និងហាងកាហ្វេ bougie ដូចជា Paris Bakery, Footprint និង Snack & Relax.
ហើយភូមិវត្តបូព៌ក៏ជាទីតាំងរបស់គ្រឹះស្ថានចម្អិនម្ហូបសរីរាង្គ Tevy’s Place ដែលជាសហគ្រាសសង្គមក្នុងការផ្តល់សិទ្ធិអំណាចដល់ស្ត្រីក្នុងមូលដ្ឋាន និងការប្រមូលផ្ដុំតុក្តារធ្វើដោយដៃរបស់ Oko Gallery។
បន្ថែមពីនេះទៀត ចំណុចលេចធ្លោមួយគឺភូមិវត្តបូព៌ក្នុងខេត្តសៀមរាបប្រទេសកម្ពុជា ដែលជាប់ចំណាត់ថ្នាក់លេខ៣ក្នុងចំណាត់ថ្នាក់រួម និងបានគ្រងមកុដជាសង្កាត់ដែលស្អាតជាងគេនៅអាស៊ី។
ជុំវិញរឿងនេះ ឯកឧត្តម តុប សុភ័ក អ្នកនាំក្រសួងទេសចរណ៍ បានប្រាប់ថា វាជារឿងល្អ ដែលភូមិនេះត្រូវបានពិភពលោកស្គាល់ ហើយនឹងភ្ញៀវទេសចរអន្តរជាតិច្រើនចង់មកស្គាល់ ទស្សនាប្រទេសកម្ពុជា។
លោកបន្តថា៖ «នៅក្នុងហ្នឹងក្រសួងទេសចរក៏មានការរៀបចំសន្តិសុខសណ្ដាប់ធ្នាប់ឲ្យបានល្អប្រសើរ ដែលជាវត្តគំរូទេសចរដោយសារតែទេសចរយើងខ្លះក៏គេចង់ទៅមើលវត្ត ព្រោះវត្តអារាមក៏ជាគោលដៅទេសចរណ៍មួយដែរ»។
លោកបន្តថា៖ «អ្វីដែលក្រសួងធ្វើកន្លងទៅគឺរៀបចំឱ្យមានការប្រឡងប្រជែងវត្តគំរូ ប្រសិនបើវត្តណាអាចរៀបចំជាវត្តគំរូហើយរៀបចំជាគោលដៅទេសចរបានគឺវាល្អ ក្រៅពីប្រាង្គប្រាសាទ និងសហគមទេសចរណ៍»។
ក្រៅពីនេះលោកបន្ថែមទៀតថា លោកមិនច្បាស់ថាមានអ្វីខ្លះនៅក្នុងភូមិវត្តបូព៌នោះទេ ពីព្រោះវត្តមិនមែនក្រសួងទេសចរចេញអាជ្ញាប័ណ្ឌគ្រប់គ្រងនោះទេ តែលោកក៏បានបញ្ជាក់ដែរថាវត្តក៏ជាគោលដៅទេសចរមួយផងដែរ៕ ហោ សុវិទ្យា និង ជា សុខនី
