មនុស្ស២៨ស្លាប់នៅក្នុងហេតុការណ៍ផ្ទុះនៅក្នុងអណ្ដូងធ្យូងថ្ម ភាគខាងជើងប្រទេសតួកគី
តួកគី៖ អណ្ដូងធ្យូងថ្មមួយ នៅភាគខាងជើងនៃប្រទេសតួកគី បានផ្ទុះឡើងដោយសម្លាប់មនុស្សចំនួន២៨នាក់ និងធ្វើឱ្យមនុស្សរាប់សិបនាក់ទៀតត្រូវជាប់គាំងនៅក្នុងអណ្ដូងរ៉ែនោះ។ ហេតុការណ៍ផ្ទុះនេះកើតឡើងនៅថ្ងៃសុក្រ ទី១៤ ខែតុលា ឆ្នាំ២០២២ នៅឯអណ្ដូងរ៉ែមួយកន្លែង ដែលគ្រប់គ្រងដោយរដ្ឋ ក្នុងទីក្រុង AAmasra នៃខេត្ត Bartin។
រដ្ឋមន្ដ្រីក្រសួងសុខាភិបាលតួកគី លោក Fahrettin Koca បានសរសេរនៅលើបណ្ដាញសង្គមធ្វីតធ័ររបស់លោកថា មានមនុស្សចំនួន២៨នាក់បានស្លាប់បាត់បង់ជីវិតនៅក្នុងឧបទ្ទវហេតុនេះ។ក្រុមសង្គ្រោះបន្ទាន់បានជួយសង្គ្រោះមនុស្សចំនួន៥៨នាក់ចេញពីអណ្ដូងរ៉ែកើតហេតុ។នៅក្នុងចំណោមអ្នកដែលគេជួយសង្គ្រោះបាននោះ មាន១១នាក់កំពុងទទួលការព្យាបាលនៅមន្ទីរពេទ្យ។
រហូតមកទល់ពេលនេះ អាជ្ញាធរតួកគីនៅតែបន្តប្រតិបត្តិការជួយសង្គ្រោះរបស់ខ្លួនបន្តទៀត ដោយសារគេដឹងថា មានមនុស្សជាច្រើនសិបនាក់ទៀតកំពុងជាប់គាំងនៅក្នុងអណ្ដូងរ៉ែដែលផ្ទុះ។ អណ្ដូងរ៉ែដែលផ្ទុះនោះ មានមនុស្សធ្វើការចំនួន១១០នាក់។
ចំណែកមូលហេតុនៃការផ្ទុះនេះ លោករដ្ឋមន្ដ្រីថាមពលតួកគី Fatih Donmez ដែលបានចុះទៅដល់កន្លែងកើតហេតុផ្ទាល់បានវាយតម្លៃជាបឋមថា ទំនងជាអាចកើតឡើងដោយសារតែការឆេះណាមួយនៅក្នុងអណ្ដូងរ៉ែនោះ ដោយផ្អែកទៅលើឧស្ម័នដែលភាយចេញពីអណ្ដូងរ៉ែ។
ក្រៅពីរដ្ឋមន្ដ្រីក្រសួងថាមពល រដ្ឋមន្ដ្រីក្រសួងមហាផ្ទៃរបស់តួកគី គឺលោក Suleyman Soylu ក៏បានធ្វើដំណើរទៅកាន់អណ្ដូងរ៉ែដែលជួបគ្រោះថ្នាក់ផ្ទុះនោះដែរ ដើម្បីសម្របសម្រួលប្រតិបត្តិការជួយសង្គ្រោះ ប៉ុន្តែលោករដ្ឋមន្ដ្រីនៅមិនទាន់មានតួលេខអ្នកជាប់គាំងក្នុងអណ្ដូងរ៉ែនៅក្នុងដៃសម្រាប់បញ្ចេញដល់សារព័ត៌មាននៅឡើយទេ។
ដោយឡែក លោក រ៉ាហ្ស៊ីប តាយីប អ៊ែរដូហ្គាន់ ប្រធានាធិបតីតួកគី បានថ្លែងតាមបណ្ដាញសង្គមធ្វីតធឺដោយក្ដីសង្ឃឹមថា នឹងមិនមានការបាត់បង់ជីវិតណាមួយកើនឡើងបន្ថែមទៀតទេ ខណៈពេលដែលក្រុមជួយសង្គ្រោះបន្ទាន់នៅតែបន្តប្រតិបត្តិការសង្គ្រោះរបស់ខ្លួនយ៉ាងសស្រាក់សស្រាំ។ លោកបានដាក់បញ្ជាឱ្យក្រុមការងារពាក់ព័ន្ធទាំងអស់ប្រឹងប្រែងឱ្យអស់ពីលទ្ធភាពដើម្បីស្វែងរកអ្នកដែលនៅរស់រានមានជីវិតពីហេតុការណ៍ផ្ទុះអណ្ដូងរ៉ែធ្យូងនេះ ដោយបានប្រកាសលុបចោលកម្មវិធីដែលបានគ្រោងទុកទាំងអស់របស់លោក ដើម្បីធ្វើដំណើរទៅកាន់កន្លែងកើតហេតុគ្រោះថ្នាក់នៅថ្ងៃសៅរ៍ ទី១៥ ខែតុលា ឆ្នាំ២០២២។
គួរជម្រាបដែរថា នេះមិនមែនជាលើកទី១ទេ ដែលតួកគីជួបគ្រោះអាក្រក់ដោយហេតុការណ៍ផ្ទុះអណ្ដូងរ៉ែដូច្នេះ។ កាលពីឆ្នាំ២០១៤ ការផ្ទុះឆេះអណ្ដូងរ៉ែធ្យូងថ្មនៅក្នុងទីក្រុង Soma ភាគខាងលិចប្រទេសតួកគី បានបណ្ដាលឱ្យមនុស្សស្លាប់សរុបចំនួន៣០១នាក់៕ ដោយ៖ កែវ កិរិយា
