អូស្ត្រាលីប្តេជ្ញាពង្រឹកកិច្ចសហការយោធាជាមួយឥណ្ឌូនេស៊ី
អូស្រ្តាលី៖ប្រទេសអូស្ត្រាលីបានប្រកាសថា ខ្លួននឹងបន្តផ្តល់ការហ្វឹកហ្វឺនយោធា ធ្វើសមយុទ្ធរួម និងការនាំចេញអាវុធទៅកាន់ប្រទេសឥណ្ឌូនេស៊ី បើទោះបីជាអំពើហិង្សា និងការចោទប្រកាន់ពីបទរំលោភសិទ្ធិមនុស្សនៅតំបន់ចម្រូងចម្រាស់នៃខេត្តប៉ាពួខាងលិច មានការកើនឡើងក៏ដោយ។
ក្រសួងការពារជាតិអូស្ត្រាលីបានបញ្ជាក់នៅក្នុងសេចក្តីថ្លែងការណ៍មួយដែលផ្ដល់ទៅឱ្យបណ្ដាញព័ត៌មាន Al Jazeera នៅថ្ងៃពុធ ទី ១៩ ខែតុលាថា រដ្ឋាភិបាលថ្មីរបស់លោកប្រធានាធិបតី Anthony Albanese ដែលជាប់ឆ្នោតកាលពីខែឧសភា នឹងបន្តកិច្ចសហការយោធាជាមួយឥណ្ឌូណេស៊ី។
ក្រសួងថ្លែងយ៉ាងដូច្នេះថា៖ «ឥណ្ឌូនេស៊ីគឺជាដៃគូដ៏សំខាន់បំផុតមួយរបស់អូស្ត្រាលី។ អូស្ត្រាលីនឹងបន្តធ្វើសមយុទ្ធរួម ផ្តល់ការបណ្តុះបណ្តាលផ្នែកយោធា និងគោលនយោបាយ និងនាំចេញសម្ភារៈយោធាទៅឥណ្ឌូនេស៊ី ដោយសមស្របតាមច្បាប់»។
កន្លងមកទោះបីជាមានការមិនត្រូវរូវគ្នាខ្លះៗក៏ដោយ អូស្ត្រាលីនៅតែមានទំនាក់ទំនងយោធាយូរអង្វែងជាមួយឥណ្ឌូនេស៊ី តាមសបញ្ជាក់ឱ្យឃើញតាមរយៈការហ្វឹកហ្វឺនយោធារួមគ្នា និងការផ្គត់ផ្គង់អាវុធជាដើម។ក្នុងឆ្នាំ២០១៤ក្រុមហ៊ុនយោធាអូស្រ្តាលី Thales Australia បានលក់នាវាដឹកទាហាន Bushmaster ចំនួនបីគ្រឿងទៅឱ្យអង្គភាពយោធា Kopassus ដែលជាកងកម្លាំងពិសេសរបស់កងទ័ពឥណ្ឌូនេស៊ី។
អង្គភាពយោធាឥណ្ឌូណេស៊ី ដូចជា Kopassus បានធ្វើសមយុទ្ធជាមួយកម្លាំងពិសេសរបស់អូស្រ្តាលី SAS ខណៈពេលកម្លាំងប្រឆាំងភេរវកម្មឥណ្ឌូណេស៊ី Detachment 88 ដែលបង្កើតឡើងបន្ទាប់ពីការទម្លាក់គ្រាប់បែកកោះបាលីឆ្នាំ ២០០២ ទទួលបានមូលនិធិ និងការបណ្តុះបណ្តាលពីអូស្ត្រាលី និងសហរដ្ឋអាមេរិក។
គំនិតផ្តួចផ្តើមបែបនេះ ត្រូវបានគេចាត់ទុកថាកាត់បន្ថយការគំរាមកំហែងពីក្រុមជ្រុលនិយម ប៉ុន្តែកងកម្លាំងឥណ្ឌូណេស៊ី នៅតែស្ថិតក្រោមការត្រួតពិនិត្យលើការចោទប្រកាន់អំពីការរំលោភសិទ្ធិមនុស្សធ្ងន់ធ្ងរនៅខេត្តប៉ាពួខាងលិច ជាកន្លែងដែលជនជាតិដើមភាគតិច តស៊ូទាមទារឯករាជ្យអស់រយៈពេល ៥០ ឆ្នាំមកហើយ។
គួររំឭកថា ឥណ្ឌូណេស៊ីបានចូលកាន់កាប់ប៉ាពួខាងលិចនៅដើមទសវត្សរ៍ឆ្នាំ ១៩៦០ ក្រោមកិច្ចព្រមព្រៀងក្រុងញូវយ៉ក ដែលផ្ទេរការគ្រប់គ្រងតំបន់សម្បូរធនធានធម្មជាតិមួយនេះពីហូឡង់ទៅឥណ្ឌូណេស៊ី ហើយបន្ទាប់មកធ្វើការគ្រប់គ្រងតំបន់នោះជាផ្លូវការ តាមរយៈការធ្វើប្រជាមតិដ៏ចម្រូងចម្រាស ដែលអង្គការសហប្រជាជាតិទទួលស្គាល់ ក្នុងឆ្នាំ ១៩៦៩។
មកទល់ពេលនេះ បញ្ហានេះបានធ្វើឱ្យមានការប៉ះទង្គិចគ្នាជាច្រើនដង រវាងកងកម្លាំងតស៊ូក្នុងតំបន់ និងកងកម្លាំងរបស់ឥណ្ឌូណេស៊ី និងបង្កឱ្យមានការចោទប្រកាន់លើការរំលោភសិទ្ធិមនុស្សជាច្រើន លើកម្លាំងរបស់ឥណ្ឌូណេស៊ី ពីក្រុងសិទ្ធិមនុស្ស៕
ដោយ៖ហួន ឌីណា ប្រភព៖ Australia committed to military cooperation with Indonesia
