អតីតនាយករដ្ឋមន្ត្រីអង់គ្លេសលោក បូរីស ចនសុន កំពុងរកផ្លូវកាន់អំណាចជាថ្មី?
អង់គ្លេស៖នៅប្រទេសអង់គ្លេស បន្ទាប់ពីលោកស្រី លីហ្ស ត្រាស្ស បានប្រកាសចុះចេញពីតំណែងជានាយករដ្ឋមន្ត្រីកាលពីថ្ងៃទី២០ ខែតុលា ឆ្នាំ២០២២មក បក្សកាន់អំណាចគឺបក្សអភិរក្សនិយម បានប្រកាសបង្ហាញបេក្ខភាពនាយករដ្ឋមន្ត្រីថ្មីជំនួសយ៉ាងយូរនៅចុងខែនេះ។ ក្នុងចំណោមបេក្ខជនអនាគតនាយករដ្ឋមន្ត្រីអង់គ្លេសថ្មី ដែលបក្សកំពុងត្រៀមចូលក្នុងការប្រកួតប្រជែងបោះឆ្នោតបន្ទាន់នោះក៏អាចមានដែរ លោក បូរីស ចនសុន អតីតនាយករដ្ឋមន្ត្រីដែលទើបបានលាចេញពីតំណែងមុនអាណត្តិលោកស្រី ត្រាស្ស។
ដ្បិតថានៅមិនទាន់មានបេក្ខជនណាម្នាក់ចេញមុខប្រកាសជាផ្លូវការ សម្រាប់ការប្រកួតប្រជែងកាន់តំណែងនាយករដ្ឋមន្ត្រីថ្មីអង់គ្លេសនេះ តែគេសង្កេតឃើញថាមានបេក្ខជនគីឡូធ្ងន់បីរូបចូលរួម។ ក្នុងចំណោមនោះ គឺមានលោក បូរីស ចនសុន ដែលជាអតីតនាយករដ្ឋមន្ត្រីអង់គ្លេសផងដែរ។
លោកចនសុន ត្រូវបានប្រព័ន្ធផ្សព្វផ្សាយចុះផ្សាយថា បានត្រលប់មកពីដំណើរកម្សាន្តនៅការីប៊ីនយ៉ាងប្រញាប់ប្រញាល់ ដើម្បីចូលរួមក្នុងការប្រកួតប្រជែងដែលនឹងចាប់ផ្តើមនៅថ្ងៃចន្ទទី២៤ ខែតុលាទៅ។
មានបុគ្គលសំខាន់ៗនៅក្នុងជួររដ្ឋាភិបាលបច្ចុប្បន្ន បានសម្តែងការគាំទ្រពេញទំហឹងឱ្យលោកចនសុន ឡើងកាន់អំណាចម្តងទៀត។ លោក Jacob Rees-Mogg ជារដ្ឋលេខាធិកាពាណិជ្ជកម្មបានគូសបញ្ជាក់ជាសាធារណៈតាមសារទ្វីតធ័រលោកថា គឺមានតែលោកចនសុន ប៉ុណ្ណោះ ដែលអាចឈ្នះការបោះឆ្នោតលើកនេះ។
ទន្ទឹមគ្នានេះដែរ រដ្ឋលេខាធិការការពារជាតិ លោក Ben Wallace បានប្រាប់សារព័ត៌មានប្រាប់ Sky News អំពីការរំពឹងរងចាំមើលភាពជោគជ័យរបស់លោក ចនសុន ដូចគ្នាដែរ។
គូប្រកួតពីររូបរបស់លោក ចនសុន អាចជាមហាសេដ្ឋីដើមកំណើតឥណ្ឌា លោក រីស្សី ស៊ុនណាក់។ លោកជាអតីតរដ្ឋមន្ត្រីហិរញ្ញវិត្ថុកាលពីជំនាន់លោក ចនសុន។ លោកត្រូវបានអ្នកវិភាគមើលឃើញថា ជាបេក្ខជនលេចធ្លោជាងគេបង្អស់ ដែលអាចមានឱកាសក្លាយជានាយករដ្ឋមន្ត្រីច្រើន។ម្នាក់ទៀតជាអតីតរដ្ឋមន្ត្រីការពារជាតិ អ្នកស្រី ផែន្នី ម័រដូនត៍។ បេក្ខជនទាំងពីរនេះ សុទ្ធតែបានប្រកួតប្រជែងជាមួយលោកស្រី លីហ្ស ត្រាស្ស ក្នុងការបោះឆ្នោតកាលពីលើកមុន។
គួរជ្រាបថា នៅអង់គ្លេស ដោយករណីនាយករដ្ឋមន្ត្រីលាចុះចេញពីតំណែងមុនចប់អាណត្តិ ដូច្នេះការជ្រើសរើសនាយករដ្ឋមន្ត្រីថ្មីជំនួស គឺធ្វើឡើងជាលក្ខណៈផ្ទៃក្នុងបក្សអភិរក្សនិយមដែលជាបក្សកាន់អំណាច។ បេក្ខជនមកពីបក្សអភិរក្សនិយមនោះ នឹងត្រូវស្វែងរកសំឡេងគាំទ្រពីសមាជិកសភា តាមរយៈការបោះឆ្នោតអនឡាញ ដោយចំណាយពេលតែមួយសប្តាហ៍ប៉ុណ្ណោះ។
ដូច្នេះយ៉ាងយូរបំផុតត្រឹមចុងសប្តាហ៍ក្រោយ ឬដំណាច់ខែតុលា ឆ្នាំ២០២២ ប្រទេសអង់គ្លេសនឹងមាននាយករដ្ឋមន្ត្រី ជំនួសលោកស្រី លីហ្ស ត្រាស្ស ដែលបានប្រកាសចុះចេញពីតំណែង ហើយដើម្បីអាចចូលរួមក្នុងការប្រកួតប្រជែងយកតំណែងប្រធានបក្សឬនាយករដ្ឋមន្រ្តី បេក្ខជនត្រូវរកសំឡេងគាំទ្ររបស់សមាជិកសភា មកពីគណបក្សអភិរក្សនិយមយ៉ាងតិច ១០០សំឡេង ឲ្យបានត្រឹមថ្ងៃចន្ទដើមសប្តាហ៍ក្រោយ។
គួរជ្រាបថា ក្នុងកាលៈទេសៈជួបវិបត្តិនយោបាយនិងវិបត្តិសេដ្ឋកិច្ច អង់គ្លេសបានផ្លាស់ប្តូរអ្នកដឹកនាំក្បាលម៉ាស៊ីនដល់ទៅ២ដងឯណោះ ក្នុងរយៈពេល៤ខែមកនេះ។ លើកទី១ គឺលោក បូរីស ចនសុន ដែលប្រកាសបញ្ចប់តួនាទីដោយសាររឿងអាស្រូវភូតកុហក លួចជប់លៀង នៅក្នុងពេលប្រទេសកំពុងបិទខ្ទប់ ក្នុងអំឡុងវិបត្តិកូវីដ និងទី២ គឺលោកស្រី លីហ្ស ត្រាស្ស ប្រកាសលាឈប់ពីតំណែងដូចគ្នា ដោយសារគម្រោងច្បាប់ហិរញ្ញវត្ថុយ៉ាងចម្រូងចម្រាសដែលបង្កជាអតិផរណាជាតិមិនធ្លាប់មានក្នុងរយៈពេលជាង៣០ឆ្នាំចុងក្រោយ៕ ដោយ៖ បណ្តូល ពេជ្រ
