ទិន្នន័យចុងក្រោយបង្ហាញថា ចិនកំពុងចុះខ្សោយភាពខ្លាំងរបស់ខ្លួនលើផលិតកម្ម និងការនាំចេញ
ចិន៖ ប្រទេសចិនកំពុងបាត់បង់ចំណែកទីផ្សារផលិតកម្ម និងការនាំចេញរបស់ខ្លួនកាន់តែច្រើន នៅក្នុងវិស័យសំខាន់ៗបើប្រៀបធៀបនឹងប្រទេសជិតខាងនៅអាស៊ី ដោយសារតែគោលនយោបាយសូន្យកូវីដ ដែលជាកត្តាសំខាន់នាំទៅរកការចុះខ្សោយនៃភាពខ្លាំងរបស់ក្រុងប៉េកាំងក្នុងការគ្រប់គ្រងពាណិជ្ជកម្មពិភពលោក។ នេះបើតាមការចុះផ្សាយរបស់សារព័ត៌មាន CNBC ដែលស្រង់ទិន្នន័យពីក្រុមហ៊ុនសេដ្ឋកិច្ចដឹកជញ្ជូន MDS Transmodal។
ទិន្នន័យចុងក្រោយបង្ហាញថា ប្រទេសចិនបានបាត់បង់ការលក់សំខាន់ៗ រួមមានសម្លៀកបំពាក់ និងគ្រឿងបន្លាស់ ស្បែកជើង គ្រឿងសង្ហារឹម និងទំនិញសម្រាប់ការធ្វើដំណើរ ខណៈការនាំចេញរាប់តាំងពីរ៉ែរហូតដល់គ្រឿងបច្ចេកវិទ្យាសម្រាប់ការិយាល័យ ក៏មានការធ្លាក់ចុះ។
លោកស្រី Antonella Teodoro អ្នកប្រឹក្សាជាន់ខ្ពស់នៅ MDS Transmodal បានអះអាងថា វិធានការសូន្យកូវីដរបស់ចិន កំពុងជះឥទ្ធិពលដល់ផលិតកម្ម ហើយក្រុមហ៊ុនអ្នកផលិតក៏កំពុងងាកចេញពីចិន ដោយសម្លឹងមើលការវិនិយោគដាក់រោងចក្រនៅប្រទេសដទៃ។
លោកស្រី Teodoro បានបន្តថា៖ «បើមើលពីក្រុមទំនិញនីមួយៗដែលនាំចេញពីចិន យើងសង្កេតឃើញថា ប្រទេសចិនបាននិងកំពុងបន្តបាត់បង់ចំណែកទីផ្សារ ដោយវៀតណាមស្ថិតក្នុងចំណោមប្រទេសដែលទទួលបាននូវសារៈសំខាន់ពីការបាត់បង់នេះ»។
លោកស្រី Teodoro បានអះអាងទៀតថា ភាពជិតស្និទ្ធរបស់វៀតណាមទៅនឹងចិន និងកម្លាំងពលកម្មថោក គឺជាហេតុផលដែលវៀតណាមក្លាយជាជម្រើសដ៏សមស្របមួយសម្រាប់អ្នកវិនិយោគងាកចេញពីចិន។ លោកស្រីបន្តថា៖ «ខ្សែដឹកជញ្ជូនកំពុងស្វែងរកទីផ្សារ និងការវិនិយោគថ្មី ហើយបន្ទាប់មកធ្វើការពង្រីកទីផ្សារថ្មី»។
ការប្រកួតប្រជែងគ្នា មានលក្ខណៈកាន់តែខ្លាំងឡើងៗក្នុងរយៈពេលប៉ុន្មានឆ្នាំមុនវិបត្តិកូវីដ។ ប្រទេសវៀតណាម ជាអ្នកទទួលផលយ៉ាងខ្លាំងពីវិស័យផលិតកម្ម ដែលងាកចេញពីចិន ជាមួយនឹងការកើនឡើងរហូតដល់ ៣៦០ ភាគរយនៃពាណិជ្ជកម្មចាប់តាំងពីឆ្នាំ ២០១៤ មក។ បើយោងតាមក្រុមហ៊ុន MDS Transmodal ដដែល ប្រទេសម៉ាឡេស៊ី និងបង់ក្លាដែស ក៏ទទួលចំណែកនៃការវិនិយោគលើវិស័យផលិតកម្មកាត់ដេរមួយចំនួន ដែលដកខ្លួនចេញពីចិន ខណៈកោះតៃវ៉ាន់ ក៏គេមើលឃើញពីការកើនឡើងស្តួចស្ដើងផងដែរក្នុងផលិតកម្មដែក។
អនុប្រធានជាន់ខ្ពស់ផ្នែកផលិតផលអាស៊ីប៉ាស៊ីហ្វិករបស់ក្រុមហ៊ុន SEKO Logistics លោក Akhil Nair បានគូសបញ្ជាក់ថា ចាប់តាំងពីពន្ធពាណិជ្ជកម្មរបស់សហរដ្ឋអាមេរិកដាក់ចេញក្នុងឆ្នាំ ២០១៨ មានក្រុមហ៊ុនជាច្រើនបានងាកចេញពីការវិនិយោគពីក្នុងប្រទេសចិន។
បញ្ហានេះ កាន់តែអាក្រក់ទៅៗជាមួយនឹងការបិទខ្ទប់ដោយសារវិបត្តិកូវីដ និងការរំខាននៅក្នុងខ្សែចង្វាក់ផ្គត់ផ្គង់ ដោយក្រុមហ៊ុនជាច្រើនធ្វើការងាកចេញពីចិន រួចហើយទៅវិនិយោគជាមួយប្រទេសជិតខាងចិន ដូចជាវៀតណាមទៅវិញ៕ ដោយ៖ ហួន ឌីណា
