វិបត្តិថាមពលអាល្លឺម៉ង់៖ កម្តៅបាតុកម្មតវ៉ាពលរដ្ឋផ្ទុះឡើងទាមទារឱ្យរដ្ឋបញ្ចេញកញ្ចប់មូលនិធិបន្ថែម
អាល្លឺម៉ង់៖នៅប្រទេសអាល្លឺម៉ង់ ប្រជាជននៅតាមទីក្រុងសំខាន់ៗទូទាំងប្រទេស បានប្រមូលផ្តុំគ្នាចុះផ្លូវធ្វើបាតុកម្មតវ៉ា ទាមទារឱ្យរដ្ឋាភិបាលបញ្ចេញមូលនិធិបន្ថែមទៀត ដើម្បីដោះស្រាយវិបត្តិថាមពលបច្ចុប្បន្ន។ វិបត្តិថាមពលនេះ បានបង្កឱ្យតម្លៃទំនិញនៅអាល្លឺម៉ង់ឡើងថ្លៃ ជួបបញ្ហាអតិផរណាដែលកំពុងតែរួមរឹតសេដ្ឋកិច្ចរស់នៅរបស់ប្រជាជន ពិសេសប្រជាជនក្រីក្រមានប្រាក់ចំណូលទាប។
សហជីព និងក្រុមបរិស្ថានជាច្រើន បានប្រកាសអំពាវនាវឱ្យប្រជាជនអាល្លឺម៉ង់រួមគ្នាចេញតវ៉ាក្នុងថ្ងៃទី២២ ខែតុលា ឆ្នាំ២០២២ ក្នុងការទាមទាររដ្ឋាភិបាលដោះស្រាយវិបត្តិថាមពល ទប់ស្កាត់ការកើនឡើងអតិផរណាជាតិ។ ក្រុមអ្នកតវ៉ាជាច្រើនពាន់នាក់ បានប្រមូលផ្តុំគ្នានៅក្នុងទីក្រុងចំនួនប្រាំមួយរបស់អាល្លឺម៉ង់ ដែលមាននៅទីក្រុង Berlin, Duesseldorf, Hannover, Stuttgart, Dresden និង Frankfurt-am-Main។
តាមបណ្តាញយុទ្ធនាការ Greenpeace ដែលជាស្ថាប័នរៀបចំមួយក្នុងចំណោមស្ថាប័នជាច្រើនទៀតអះអាងថា មានអ្នកចូលរួមធ្វើបាតុកម្មសរុបប្រមាណចំនួន ២៤,០០០នាក់ ដែលរួមបញ្ចូលនៅទីក្រុង Berlin ប្រមាណ ៦,០០០នាក់។ តែពីខាងភាគីរដ្ឋាភិបាលវិញថាមានពលរដ្ឋចូលរួមតិចជាងការអះអាងខាងលើនេះឆ្ងាយណាស់ ជាក់ស្តែងនៅ Berlin មានត្រឹមតែប្រមាណ ១,៨០០នាក់ប៉ុណ្ណោះ។ រដ្ឋាភិបាលបញ្ជាក់ថា បាតុកម្មនេះដំណើរការទៅដោយសន្តិភាព គ្មានការប៉ះទង្គិចជាមួយអាជ្ញាធរឡើយ។
ក្រុមអ្នកតវ៉ាបានដើរដង្ហែ លើបដាតវ៉ា៖ «រួមគ្នាឆ្លងកាត់វិបត្តិ ដើម្បីធានាដល់សន្តិសុខសង្គម និងឈានបញ្ចប់ការពឹងផ្អែកទៅលើឥន្ធនៈហ្វូស៊ីល»។ ក្នុងន័យនេះ ពួកគេចង់ឱ្យរដ្ឋាភិបាលធ្វើយ៉ាងណាលុបចោលការប្រើប្រាស់ថាមពលនុយក្លេអ៊ែរ និងបញ្ចេញកញ្ចប់មូលនិធិរដ្ឋាភិបាលបន្ថែមទៀត មកទប់ស្កាត់ការកើនឡើងតម្លៃថាមពល ពិសេសសម្រាប់ពលរដ្ឋខ្វះខាត។
លោក Andrea Kocsis អនុប្រធានសហជីពការងារ ver.di គូសបញ្ជាក់ថា បាតុកម្មតវ៉ានេះគឺមានចេទនាបង្ហាញទៅរដ្ឋាភិបាលអាល្លឺម៉ង់ថា ប្រជាជនអាល្លឺម៉ង់ពិតជាត្រូវការជំនួយផ្នែកហិរញ្ញវត្ថុបន្ទាន់មែនដើម្បីតុល្យភាពក្នុងសង្គម។ លោកបន្តថា ប្រជាជនក្រីក្រត្រូវការការជួយសង្គ្រោះជាអ្នកណាទាំងអស់នៅពេលនេះ។
ត្រង់ចំណុចនេះ លោក Olaf Bandt ប្រធានអង្គការ Friends of the Earth Germany (BUND) ចង់អោយរដ្ឋាភិបាលផ្លាស់ប្តូរគោលនយោបាយពន្ធដារ ដែលមានបញ្ចូលផែនការយោគយល់លើការយកពន្ធលើប្រាក់ចំណេញក្រុមហ៊ុនថាមពលដែលរងផលប៉ះពាល់ច្រើនដោយការកើនឡើងតម្លៃឧស្ម័ន។
រដ្ឋាភិបាលអាល្លឺម៉ង់កំពុងអនុវត្តវិធានការប្រយុទ្ធប្រឆាំងនឹងការកើនឡើងតម្លៃថាមពល ក្នុងកាលៈទេសៈជះផលប៉ះពាល់ពីសង្គ្រាមនៅអ៊ុយក្រែន។ សភាអាល្លឺម៉ង់កាលពីថ្ងៃទី២១ ខែតុលា ឆ្នាំ២០២២ ទើបបានអនុម័តកញ្ចប់ថវិកាសង្គ្រោះបន្ទាន់ក្នុងទំហំទឹកប្រាក់ ២០០ពាន់អឺរ៉ូ ក្នុងការកំណត់តម្លៃប្រេង ចាប់ពីខែមីនា សម្តៅជួយការងារក្រុមហ៊ុនខ្នាតតូចនិងមធ្យម និងគ្រួសារដែលរងផលប៉ះពាល់។
គួរដឹងថា នៅរដូវរងាខាងមុខនេះ តម្លៃថាមពលនៅអាល្លឺម៉ង់ត្រូវបានគេព្យាករថានឹងមានតម្លៃខ្ពស់ជាងពេលណាៗទាំងអស់។ តែទោះយ៉ាងណា មេដឹកនាំអាល្លឺម៉ង់ បង្ហាញសុទិដ្ឋិនិយមទៅលើប្រសិទ្ធភាពផែនការអតិផរណារបស់ខ្លួន ថាអាចជួយឱ្យប្រទេសរបស់លោកឆ្លងកាត់វិបត្តិដុនដាបនេះបាន។
ប្រទេសអាល្លឺម៉ង់ កំពុងប្រឈមបញ្ហាអតិផរណាខ្លាំង ដោយសារគ្មានការផ្គត់ផ្គង់ឧស្ម័នហ្គាសពីរុស្ស៊ី ដែលកំពុងរងទណ្ឌកម្មពីការវាយបំពានលើអ៊ុយក្រែន តាំងតែពីចុងខែកុម្ភៈ ឆ្នាំ២០២២មក។ ក្នុងខែសីហា អតិផរណាអាល្លឺម៉ង់ បានកើនឡើង៧,៩ភាគរយ ហើយបើតាមការព្យាករវិបត្តិអតិផរណា អាចនឹងកើនឡើងដល់ ១០ភាគរយ នៅចុងឆ្នាំ២០២២ ដែលនេះគឺជាកម្រិតខ្ពស់បំផុត ចាប់តាំងពីមានវិបត្តិប្រេងលើកដំបូង ក្នុងរដូវរងា កាលពីឆ្នាំ១៩៧៣ និងឆ្នាំ១៩៧៤មក៕ ដោយ៖ បណ្តូល ពេជ្រ
