ខេត្តកោះកុងអាចនឹងមានរោងចក្រដំឡើងរថយន្តអគ្គិសនីដោយមានការវិនិយោគពីក្រុមហ៊ុនចិន
កោះកុង៖ខេត្តកោះកុង អាចនឹងមានរោងចក្រដំឡើងរថយន្តអគ្គិសនី ដោយមានការវិនិយោគពីក្រុមហ៊ុន China Matrix Technology Group-Horche Intelligent Automobile។
តាមរយៈកិច្ចប្រជុំកាលពីថ្ងែទី២២ ខែតុលាឆ្នាំ២០២២ អភិបាលខេត្តកោះកុងជាមួយគណៈប្រតិភូតវិនិយោគចិន បានពិភាក្សាគ្នាស្ដីពី សក្ដានុពលនៃការវិនិយោគលើវិស័យបច្ចេកវិទ្យា ឧស្សាហកម្ម និងគោលបំណងរបស់ក្រុមហ៊ុនចិន ក្នុងការបង្កើតរោងចក្រដំឡើងរថយន្តអគ្គិសនីនៅខេត្តកោះកុង។
ជុំវិញរឿងនេះ លោក សុខ សុទ្ធី អភិបាលរងខេត្តកោះកុង បានប្រាប់ថាខាងខេត្តកោះកុង គឺស្វាគមន៍ចំពោះការវិនិយោគទាំងអស់ទាំងក្នុង និងក្រៅប្រទេស ហើយការវិនិយោគដំឡើងរថយន្តអគ្គិសនីនេះ វាគ្រាន់តែជាការសិក្សាជំហានដំបូងមួយរបស់ក្រុមហ៊ុន China Matrix Technology Group-Horche Intelligent Automobile ដើម្បីមកពិភាក្សាការងារជាមួយអាជ្ញាធរខេត្តកោះកុងតែប៉ុណ្ណោះ។
លោក សុខ សុទ្ធីថា៖ «មិនទាន់ដឹងទេថា ក្រុមហ៊ុនត្រូវចំណាយដើមទុនប៉ុន្មាន ត្រូវសាងសង់ទីកន្លែងណា គ្រាន់ដែលថាគាត់មកសិក្សាអំពីសក្ដានុពលនៅកន្លែងហ្នឹង ប្រសិនបើគាត់ធ្វើចឹងមានន័យថាក្រុមហ៊ុនដែលផលិតរថយន្តដែលដើរដោយអគ្គិសនី វាយ៉ាងម៉េចដែរ? ហើយនឹងសិក្សាមើលពីចំណុចសក្ដានុពលរបស់កោះកុង»។
លោកបន្តថា ជាទូទៅការសិក្សាពីរចំណុចរបស់ក្រុមហ៊ុននេះគឺទី១. ទាក់ទងនឹងការផលិតនៅខេត្តកោះកុងនេះ វាអាចទៅរួចអត់ និងទី២. ការទាក់ទាញអ្នកវិនិយោគពីដៃគូក្រុមហ៊ុនផ្សេងៗទៀត ដែលធ្វើការទាក់ទងនឹងការងារក្នុងវិស័យផ្សេងៗនៃខេត្តកោះកុងនេះបន្ថែមទៀត។
លោកបន្ថែមថា៖ «វាជារឿងល្អ ដែលប្រទេសកម្ពុជាយើងមានក្រុមហ៊ុនរថយន្តដំឡើងអគ្គិសនី ពីព្រោះជាការទាក់ទាញអ្នកវិនិយោគ ដែលធ្វើឲ្យមានកំណើនសេដ្ឋកិច្ច និងបង្កើតឱកាសការងារដល់ប្រជាពលរដ្ឋធ្វើ ហើយនឹងឃើញសក្ដានុពលរបស់យើងប៉ុន្មាន គាត់នឹងសិក្សាបន្តទៀត»។
ចំណែកកញ្ញា ភួង កែវរស្មី សកម្មជនចលនាមាតាធម្មជាតិ បានប្រាប់ថាប្រសិនបើក្រុមហ៊ុននេះ ចង់បោះទុននៅទីតាំងហ្នឹងវាជាកត្តាល្អមួយដែលមើលឃើញពីសក្ដានុពលរបស់ប្រទេសកម្ពុជា នៅខាងខេត្តកោះកុង។
កញ្ញា ភួង កែវរស្មី បន្តថាថា៖ «យើងសង្ឃឹមថាគេជ្រើសរើសទីតាំងដែលអត់មានពាក់ព័ន្ធជាមួយហ្នឹង ទីកន្លែងរបស់បងប្អូនប្រជាពលរដ្ឋ ដែលគាត់រស់នៅទីកន្លែងហ្នឹង អាចថាកុំឲ្យមាននៅបន្សល់ជម្លោះដីធ្លីរ៉ាំរ៉ៃការរំលោភដីធ្លីប្រជាពលរដ្ឋ»។កញ្ញាបន្តថា ពីព្រោះការបោះទុនវិនិយោគនៅស្រុកខ្មែរវាជាឱកាស បន្ថែមការងារដល់ប្រជាពលរដ្ឋ និងលើកតម្កើនសេដ្ឋកិច្ចជាតិ ហើយជាពិសេសឡានអគ្គិសនី វាមានប្រយោជន៍ច្រើនដែលកាត់បន្ថយរឿងផ្សែងបំពុលបរិស្ថាន។
កញ្ញារស្មីបន្ថែមថា៖ «ប៉ុន្តែយើងអត់ទាន់ច្បាស់ថាឡានហ្នឹង យើងលក់នៅស្រុកខ្មែរឬក៏យកទៅលក់នៅស្រុកក្រៅឬយ៉ាងណា ពីព្រោះដោយសារតែយើងអត់ទាន់មានព័ត៌មានលំអិត» ។
រីឯលោក ហេង គីមហុង ប្រធានផ្នែកកម្មវិធី និងតស៊ូមតិ នៃសមាគមបណ្ដាញយុវជនកម្ពុជា(CYN)បានប្រាប់ថា វាជារឿងមួយល្អសម្រាប់បរិស្ថាន និងផ្ដល់ឱកាសការងារទៅដល់ប្រជាពលរដ្ឋ ដែលជួយឲ្យរីកចម្រើនសេដ្ឋកិច្ចជាតិ។ ជាពិសេសទៅទៀត វាក៏បង្កើតឲ្យវិស័យឧស្សាហកម្ម កម្ពុជាបោះជំហានទៅមុខផងដែរ។
លោក ហេង គីមហុងថា៖ «ជុំវិញករណីនេះខ្ញុំយល់ថាកម្ពុជាឈានទៅរកពេលវេលាថ្មី នៃការពង្រីកវិស័យឧស្សាហកម្មរបស់ប្រទេសខ្លួនក៏គួរតែជំរុញឱ្យកិច្ចការទាំងអស់ហ្នឹងឱ្យកាន់តែលឿនរហ័សគោរពទៅតាមបទដ្ឋានស្ដង់ដារអន្តជាតិ»។
លោកគីមហុងបន្ថែមថា ចំណែកឯតម្លៃផ្នែកសេដ្ឋកិច្ចវិញ គឺធ្វើឲ្យប្រទេសកម្ពុជាមានឱកាសប្រើប្រាស់ផលិតផលក្នុងស្រុកដែលមានតម្លៃទាប ហើយក៏ងាយស្រួលក្នុងការអាចមានឱកាសយករថយន្តមកប្រើប្រាស់ដែលមានតម្លៃប្រហាក់ប្រហែលប្រទេសជិតខាងជាដើម។
គិតត្រឹមឆ្នាំឆ្នាំ២០២១ ខេត្តកោះកុងមានឧស្សាហកម្មធុនធំចំនួន ៧រោងចក្រ សហគ្រាស មានចំនួនកម្មករនិយោជិតចំនួន ១០,៨៤៣នាក់ ដែលក្នុងនេះមានរោងចក្រដំឡើងរថយន្ត បង្គុំខ្សែភ្លើង គ្រឿងអេឡិចត្រូនិក វាយនភ័ណ្ឌរោងចក្រ សម្លៀកបំពាក់ និងសម្ភារកីឡា៕ ដោយ៖ ជា សុខនី – ហោ សុវិទ្យា
