កំពង់ធំ៖ សម្តេចអគ្គមហាសេនាបតីតេជោ ហ៊ុន សែន បានថ្លែងថា គណបក្សប្រជាជនកម្ពុជា រួមសុខរួមទុក្ខជាមួយប្រជាជនគ្រប់ពេលវេលា យើងមិនបានរួមតែសុខនោះទេ ប៉ុន្តែអ្វីដែលសំខាន់គឺយើងរួមទុក្ខ។

សម្តេចតេជោ នាយករដ្ឋមន្ត្រី បានថ្លែងដូចនេះ ក្នុងឱកាសអញ្ជើញជួបសំណេះសំណាល ចែកស្រូវពូជ និងស្បៀងជូនប្រជាពលរដ្ឋចំនួន ៦៨៤៤គ្រួសារ មកពី៩ក្រុង ស្រុក ៤៨ឃុំ សង្កាត់ និង ២៩៨ភូមិ ដែលរងគ្រោះដោយសារគ្រោះទឹកជំនន់ នៅខេត្តកំពង់ធំ នៅព្រឹកថ្ងៃទី២៩ ខែតុលា ឆ្នាំ២០២២ ។

សម្តេចតេជោ ហ៊ុន សែន បានបញ្ជាក់ថា នៅពេលដែលប្រជាជនមានបញ្ហា ពេលនោះគេឃើញមុខរបស់មន្រ្តីគណបក្សប្រជាជនកម្ពុជា និងឃើញមុខរបស់នាយករដ្ឋមន្រ្តី ហ៊ុន សែន ផងដែរ។

សម្តេចតេជោ ហ៊ុន សែន បានបន្ថែមថា យើងបានរួមដំណើរជាមួយគ្នា អស់រយៈពេលជាង៤៤ឆ្នាំ រួចមកហើយ នៅពេលដែលយើងចេញពីរបបប្រល័យពូជសាសន៍ ប៉ុល ពត ប្រជាជនយើងអាចមើលឃើញពីឥរិយាបថទទួលខុសត្រូវរបស់គណបក្សប្រជាជនកម្ពុជាដែលដឹកនាំរាជរដ្ឋាភិបាល៕ ស៊ូ វណ្ណលុក