ហ្សាកាតា៖ យោងតាមស្ថិតិរបស់រដ្ឋាភិបាលឥណ្ឌូនេស៊ី បានឱ្យដឹងក្នុងថ្ងៃអង្គារទី០១ ខែវិច្ឆិកាថា ប្រទេសនេះបានកត់ត្រាចំនួនភ្ញៀវទេសចរបរទេសជិត ៥៤០,០០០នាក់នៅក្នុងខែកញ្ញា ឆ្នាំ២០២២នេះ ដែលជាការកើនឡើងដ៏ច្រើនសម្បើម បើប្រៀបធៀបទៅនឹងចំនួនភ្ញៀវទេសចរបរទេស ៥,០០០នាក់ ដែលបានចុះឈ្មោះក្នុងខែដូចគ្នាកាលពីឆ្នាំមុន។

នៅក្នុងសន្និសីទសារព័ត៌មានមួយ អនុប្រធានទីភ្នាក់ងារចែកចាយស្ថិតិ និងសេវាកម្មរបស់ឥណ្ឌូនេស៊ី បានគូសបញ្ជាក់ថា ចំនួននេះ គឺកើនឡើង ៥.៥០ភាគរយ បើប្រៀបធៀបទៅនឹងខែសីហាកន្លងទៅ។

សូមបញ្ជាក់ផងដែរថា ចំនួនភ្ញៀវបរទេសមកដល់ប្រទេសឥណ្ឌូនេស៊ី ចន្លោះពីខែមករា ដល់ខែកញ្ញា ឆ្នាំ២០២២នេះ បានកើនឡើងដល់ ២,២៧លាននាក់។ បើតាមការគ្រោងទុកនោះ ប្រទេសឥណ្ឌូនេស៊ីបាននិងកំពុងកំណត់គោលដៅស្រូបទាញភ្ញៀវទេសចរបរទេសរហូតដល់ ៣,៦លាននាក់ក្នុងឆ្នាំ២០២២នេះ៕ ប្រភព៖ ស៊ីនហួរ ដោយ៖ ទីណា និងបុត្រា