អាមេរិកចង់ឱ្យសហភាពអឺរ៉ុប ចូលរួមជាមួយខ្លួនក្នុងការរឹតត្បឹតការនាំចេញបន្ទះឈីបទៅចិន
អាមេរិក៖សារព័ត៌មានផ្សេងៗបានរាយការណ៍ថា សហរដ្ឋអាមេរិកបានអំពាវនាវឱ្យសហភាពអឺរ៉ុបដាក់ការរឹតត្បឹតលើការចេញសេម៊ីកុងឌុចទ័រ (បន្ទះឈីប) ទៅប្រទេសចិន ប៉ុន្តែក៏បង្កជាសំណួរជុំវិញថាតើ សហរដ្ឋអាមេរិកអាចនឹងអូសទាញបណ្ដុំសម្ព័ន្ធមិត្តឱ្យធ្វើតាមខ្លួន ដោយសុខចិត្តបោះបង់ទីផ្សារដែលជាប្រភពមួយដ៏ធំនេះ ដែរឬយ៉ាងណា។
កាលពីចុងខែតុលា ពោលគឺប៉ុន្មានថ្ងៃកន្លងទៅនេះ ទីភ្នាក់ងារសារព័ត៌មាន Bloomberg បានរាយការណ៍ថា រដ្ឋបាលរបស់លោកប្រធានាធិបតីអាមេរិក ចូ បៃដិន កំពុងជំរុញឱ្យសហភាពអឺរ៉ុបចែករំលែកព័ត៌មាន និងសម្របសម្រួលការអនុវត្ត ដើម្បីពង្រឹងការរឹតបន្តឹងទ្វេភាគីរបស់សហរដ្ឋអាមេរិក លើការនាំចេញផ្សេងៗទៅកាន់ប្រទេសចិន ដែលស្រដៀងនឹងអ្វីដែលអាមេរិក និងប្លុក បានធ្វើចំពោះទីក្រុងម៉ូស្គូចាប់តាំងពីដើមឆ្នាំនេះ។
សេចក្ដីរាយការណ៍នេះ ធ្វើឡើងបន្ទាប់ពីអនុរដ្ឋលេខាធិការក្រសួងពាណិជ្ជកម្មសហរដ្ឋអាមេរិក ដែលទទួលបន្ទុកឧស្សាហកម្ម និងសន្តិសុខ លោក Alan Estevez បានអះអាងនៅថ្ងៃព្រហស្បតិ៍ទី ២៧ ថា សហរដ្ឋអាមេរិកនឹងចុះហត្ថលេខាលើកិច្ចព្រមព្រៀងមួយ ជាមួយសម្ព័ន្ធមិត្តរបស់ខ្លួនក្នុងពេលឆាប់ៗ ដើម្បីឱ្យត្រូវគ្នាជាមួយនឹងច្បាប់ថ្មី ដែលរឹតត្បឹតលើលទ្ធភាពប្រើប្រាស់ឧបករណ៍ផលិតបន្ទះឈីបទំនើប របស់ចិន។
ទោះជាយ៉ាងណាក៏ដោយ នាយករងនៃវិទ្យាស្ថានស្រាវជ្រាវទីផ្សារអន្តរជាតិ នៃវិទ្យាស្ថានស្រាវជ្រាវរបស់ក្រសួងពាណិជ្ជកម្មចិន លោក Bai Ming បានថ្លែងប្រាប់កាសែត Asia Times ថា វាមិនទំនងទេថា ការអំពាវនាវរបស់អាមេរិក នឹងបំផុលគំនិតសហភាពអឺរ៉ុប ដែលគិតយ៉ាងខ្លាំងចំពោះទីផ្សារសេម៊ីកុងឌុចទ័ររបស់ចិននោះទេ។
គួររំឭកថា ចាប់តាំងពីឆ្នាំ ២០២០ មក សហរដ្ឋអាមេរិកបានជំរុញហូឡង់ ដែលជារដ្ឋសមាជិកមួយរបស់សហភាពអឺរ៉ុប ពីការនាំចេញទៅប្រទេសចិន នូវឧបករណ៍ EUV ដែលគេប្រើក្នុងការផលិតបន្ទះឈីបទំនើប។ ដើម្បីបង្កើនភាពតានតឹងកាន់តែខ្លាំង ក្នុងខែកក្កដាឆ្នាំនេះ សហរដ្ឋអាមេរិកបានដាក់សម្ពាធបន្ថែមទៅលើក្រុមហ៊ុនផលិតសេម៊ីកុងឌុចទ័រហូឡង់ ASML Holding NV ឱ្យបញ្ឈប់ការលក់ DUV របស់ខ្លួន ដែលជាឧបករណ៍ស្រដៀងនឹង EUV ទៅឱ្យប្រទេសចិន។ ប្រសិនបើយុទ្ធសាស្រ្តនេះជោគជ័យ នោះចិននឹងមិនអាចផលិតសេម៊ីកុងឌុចទ័រជាច្រើនប្រភេទ។
កាលពីខែដើមខែតុលានេះ ការិយាល័យឧស្សាហកម្ម និងសន្តិសុខ (BIS) នៃក្រសួងពាណិជ្ជកម្មសហរដ្ឋអាមេរិក បានបង្ហាញពីការទប់ស្កាត់ថ្មី ដែលហាមឃាត់ការលក់ដោយក្រុមហ៊ុនអាមេរិកនូវបន្ទះឈីប និងឧបករណ៍ផលិតបន្ទះឈីបទំនើបទៅកាន់ប្រទេសចិន។
ប៉ុន្តែរហូតមកដល់ពេលនេះ ខណៈពេលដែលការរឹតត្បឹតរបស់សហរដ្ឋអាមេរិកគ្របដណ្តប់លើការនាំចេញឧបករណ៍ EUV កម្រិតខ្ពស់ ទីក្រុងវ៉ាស៊ីនតោនមិនបានប្រកាសជាផ្លូវការអំពីការពង្រីកការហាមឃាត់ដើម្បីគ្របដណ្តប់លើឧបករណ៍ DUV នោះទេ។ តែគេសង្កេតឃើញថា ការបញ្ចុះបញ្ចូលគឺជាពាក្យដែលពេញនិយម ខណៈការពិភាក្សា លើការជំរុញរបស់អាមេរិកឱ្យក្រុមហ៊ុន ASML ហាមឃាត់ការនាំចេញ DUV ទៅកាន់ចិន នៅតែបន្ត។
ក្រុមហ៊ុនយក្ស ASML នៅតែប្រយ័ត្នលើជំហពាណិជ្ជកម្មរបស់ខ្លួន ដោយគូសបញ្ជាក់ក្នុងសេចក្ដីថ្លែងការណ៍មួយកាលពីថ្ងៃទី ១៩ ខែតុលាថា៖ «យើងកំពុងបន្តវាយតម្លៃ និងអនុវត្តតាមបទប្បញ្ញត្តិគ្រប់គ្រងការនាំចេញថ្មីរបស់សហរដ្ឋអាមេរិក។ ផ្អែកលើការវាយតម្លៃដំបូងរបស់យើង ការរឹតបន្តឹងថ្មីមិនផ្លាស់ប្ដូរច្បាប់គ្រប់គ្រងឧបករណ៍ផលិតបន្ទះឈីប ដែលក្រុមហ៊ុន ASML ដឹកចេញពីហូឡង់នោះទេ»។ ក្រុមហ៊ុនបានបន្ថែមថា ផលប៉ះពាល់ដោយផ្ទាល់នៃការរឹតត្បឹតលើការនាំចេញថ្មីរបស់សហរដ្ឋអាមេរិកលើផែនការដឹកជញ្ជូនទាំងមូលនៅឆ្នាំ ២០២៣ នឹងមានកម្រិត។
ជុំវិញបញ្ហានេះ មន្រ្តីក្រសួងពាណិជ្ជកម្មអាមេរិក លោក Estevez បានប្រាប់អ្នកយកព័ត៌មានទៀតថា ក្រុមការងាររបស់លោក កំពុងស្វែងរកការគាំទ្រពីសម្ព័ន្ធមិត្ត ដើម្បីដាក់បម្រាមការនាំចេញបន្ទះឈីបទៅចិន ហើយក្នុងពេលជាមួយគ្នានេះ ក៏កំពុងពិចារណាលើការរឹតបន្តឹងលើប្រភេទបច្ចេកវិទ្យាផ្សេងទៀតដូចជាគ្រឿងកុំព្យូទ័រកង់ទិច (Quantum Computing) ជីវបច្ចេកវិទ្យា និងបញ្ញាសិប្បនិម្មិត (AI)។
លោក Estevez បានលើកឡើងទៀតថា កិច្ចព្រមព្រៀងគ្របដណ្តប់លើបន្ទះឈីប និងឧបករណ៍សម្រាប់ផលិតបន្ទះឈីប នឹងត្រូវចុះហត្ថលេខារវាងសហរដ្ឋអាមេរិក និងសម្ព័ន្ធមិត្តរបស់ខ្លួន ក្នុងរយៈពេលដ៏ខ្លីខាងមុខនេះ។ ប៉ុន្តែ លោកមិនបានបញ្ជាក់បន្ថែមពីមូលហេតុផ្លូវច្បាប់ ថាតើកិច្ចព្រមព្រៀងនេះអាចផ្អែកលើអ្វីនោះទេ។
យ៉ាងណាមិញ Bloomberg បានរាយការណ៍ ដោយស្រង់ស្ដីប្រភពមិនបញ្ចេញឈ្មោះថា សហរដ្ឋអាមេរិកបានស្នើឱ្យសម្ព័ន្ធមិត្តអឺរ៉ុបរបស់ខ្លួន ដាក់ការត្រួតពិនិត្យការនាំចេញទៅចិនដូចអ្វីដែលអឺរ៉ុបបានដាក់ទណ្ឌកម្មរុស្ស៊ី ចំពោះការលុកលុយអ៊ុយក្រែន ដែលគេមើលឃើញថានឹងពង្រឹងអំណាច ក៏ដូចជាផ្ដល់ប្រយោជន៍ភូមិសាស្រ្តនយោបាយសម្រាប់អាមេរិក។
ទោះបីជាយ៉ាងនេះក៏ដោយ តាមការរាយការណ៍ដដែល សហភាពអឺរ៉ុបមិនមានទំនោរក្នុងការកាត់បន្ថយការនាំចេញទ្រង់ទ្រាយធំនោះទេ ប៉ុន្តែប្រភពម្នាក់បានអះអាងថា ប្លុកប្រហែលជាអាចបង្កើតការពិនិត្យមើលលើទំនិញ ដែលទីក្រុងប៉េកាំងអាចប្រើ ដើម្បីពង្រឹងសមត្ថភាពយោធារបស់ខ្លួន។
ប្រធានអ្នកវិភាគពីក្រុមហ៊ុនប្រឹក្សាយោបល់ ICWise ដែលមានមូលដ្ឋាននៅទីក្រុងសៀងហៃ លោក Gu Wenjun បានបង្ហាញទស្សនៈថា វិសាលភាពនៃការដាក់ទណ្ឌកម្មរបស់សហរដ្ឋអាមេរិក បានពង្រីកពីការផ្តោតទៅលើតែក្រុមហ៊ុនផលិតបន្ទះឈីបចិន ដល់ការកំណត់ប្រតិបត្តិការរបស់អ្នកផ្គត់ផ្គង់បន្ទះឈីបអន្តរជាតិ ឬឧបករណ៍ផលិតឈីប ដែលធ្វើប្រតិបត្តិការនៅចិនដីគោក។
លោក Gu បានបន្តថា ក្រុមហ៊ុនអន្តរជាតិមួយចំនួនចង់បង្កើនការវិនិយោគរបស់ពួកគេនៅក្នុងប្រទេសចិន ប៉ុន្តែពួកគេកំពុងរង់ចាំមើលវិធានការប្រឆាំងរបស់ចិន ជំទាស់នឹងការដាក់ទណ្ឌកម្មរបស់សហរដ្ឋអាមេរិក។ លោកបានបន្ថែមទៀតថា ចិនគួរតែលើកទឹកចិត្តឱ្យក្រុមហ៊ុនសេម៊ីកុងឌុចទ័រមកពីប្រទេសហូឡង់ ជប៉ុន និងកូរ៉េខាងត្បូង ចូលទៅក្នុងទីផ្សារបន្ទះឈីបរបស់ខ្លួន ដោយសារតែក្រុមហ៊ុនអឺរ៉ុបមួយចំនួនបានចាប់ផ្តើមចរចាជាមួយសហរដ្ឋអាមេរិកលើបញ្ហានេះ។
ឆ្លើយតបនឹងបញ្ហានេះដូចគ្នា លោក Bai ពីក្រសួងពាណិជ្ជកម្មចិន បានប្រាប់ប្រព័ន្ធផ្សព្វផ្សាយចិននៅចុងខែតុលានេះថា សហភាពអឺរ៉ុបប្រហែលជានឹងមិនធ្វើតាមការអំពាវនាវរបស់សហរដ្ឋអាមេរិក ក្នុងការរឹតបន្តឹងលើការនាំចេញបន្ទះឈីបទៅចិននោះទេ ដោយសារតែបច្ចុប្បន្ននេះ ចិនគឺជាទីផ្សារសេម៊ីកុងឌុចទ័រដ៏ធំបំផុតរបស់ពិភពលោក និងមានតួនាទីសំខាន់ក្នុងខ្សែចង្វាក់ផ្គត់ផ្គង់បន្ទះឈីបសកល។ លោក Bai បន្តថា សហរដ្ឋអាមេរិក ក៏ដូចជាសេដ្ឋកិច្ចពិភពលោកនឹងរងភាពឈឺចាប់ ប្រសិនបើក្រុមហ៊ុនផលិតបន្ទះឈីបរបស់ចិន ដកចេញពីខ្សែចង្វាក់ផ្គត់ផ្គង់ពិភពលោក៕
ដោយ៖ហួន ឌីណា
