ការនាំចេញរបស់កូរ៉េខាងត្បូងក្នុងខែតុលា ធ្លាក់ចុះខ្លាំងបំផុតក្នុងរយៈពេល ២៦ខែ
សេអ៊ូល៖ការនាំចេញរបស់កូរ៉េខាងត្បូងកាលពីខែតុលានេះ បានធ្លាក់ចុះខ្លាំងបំផុតក្នុងរយៈពេល ២៦ ខែ ខណៈពេលដែលឱនភាពពាណិជ្ជកម្មនៅតែបន្ត៧ខែជាប់គ្នា ដែលជាការគូសបញ្ជាក់ថា សេដ្ឋកិច្ចរបស់ប្រទេសកំពុងធ្លាក់ចុះ ខណៈរូបិយប័ណ្ណជាតិក៏កំពុងធ្លាក់តម្លៃជិតកម្រិតទាបក្នុងរយៈពេលជាង១ទសវត្សរ៍។
ទិន្នន័យបឋមរបស់រដ្ឋាភិបាលចេញផ្សាយនៅថ្ងៃទី ០១ ខែវិច្ឆិកា បានបង្ហាញថា ការនាំចេញរបស់កូរ៉េខាងត្បូង បានធ្លាក់ចុះ ៥,៧ ភាគរយធៀបនឹងឆ្នាំមុន មកត្រឹម ៥២,៤៨ ប៊ីលានដុល្លារក្នុងខែតុលា ដែលជាភាគរយដ៏ធំបំផុតចាប់តាំងពីខែសីហាឆ្នាំ ២០២០ មក។
ទិន្នន័យបង្ហាញទៀតថា ការនាំចេញទៅកាន់ប្រទេសចិន ដែលជាទីផ្សារធំបំផុតរបស់កូរ៉េខាងត្បូង បានបានធ្លាក់ចុះ ១៥,៧ ភាគរយនៅក្នុងខែតុលា ធៀបនឹងឆ្នាំមុន ស្របពេលដែលសេដ្ឋកិច្ចចិនកំពុងធ្លាក់ចុះពីកត្តាជាច្រើនរួមគ្នា រួមទាំងការរឹតបន្តឹងយ៉ាងតឹងរ៉ឹងដើម្បីបញ្ឈប់ការរីករាលដាលនៃជំងឺកូវីដ-១៩។
ទោះជាយ៉ាងណាក៏ដោយ ទីផ្សារក្នុងស្រុកបានបង្ហាញពីប្រតិកម្មបែបស្ងៀមស្ងាត់ ចំពោះទិន្នន័យដែលធ្លាក់ចុះ ខណៈដែលវិនិយោគិនផ្តោតលើកិច្ចប្រជុំគោលនយោបាយរបស់ធនាគារកណ្តាលអាមេរិក នៅសប្តាហ៍នេះ។ ជាមួយគ្នានោះ ទស្សនវិស័យនៅតែងងឹត ខណៈសេដ្ឋកិច្ចពិភពលោកកំពុងបាត់បង់សន្ទុះដោយសាររលកនៃការរឹតបន្តឹងគោលនយោបាយសកល ដើម្បីទប់ស្កាត់អតិផរណា។
សេដ្ឋវិទូនៅក្រុមហ៊ុន Hana Securities បានថ្លែងប្រាប់ទីភ្នាក់ងារសារព័ត៌មានរ៉យទ័រថា៖ «មានក្តីសង្ឃឹមតិចតួចសម្រាប់ការត្រឡប់ទៅរកភាពប្រសើរឡើងវិញក្នុងពេលឆាប់ៗនេះ ដោយសារតម្រូវការរបស់ប្រទេសចិននឹងនៅតែខ្សោយ ហើយឧស្សាហកម្មសេម៊ីកុងឌុចទ័រសកល ក៏កំពុងជួបប្រទះនឹងការកើនឡើងនូវកម្រិតសារពើភ័ណ្ឌ»។
ការស្ទង់មតិរបស់ក្រុមហ៊ុនធានារ៉ាប់រង និងហិរញ្ញវត្ថុ S&P Global អំពីអត្រាអ្នកគ្រប់គ្រងការទិញពីក្រុមហ៊ុនផលិតកម្មរបស់កូរ៉េខាងត្បូងផ្សេងៗ ក៏បង្ហាញពីការធ្លាក់ចុះផងដែរនៃការបញ្ជាទិញសម្រាប់ការនាំចេញថ្មីនៅក្នុងខែតុលា ដែលជាការធ្លាក់ចុះក្នុងរយៈពេល ៨ ខែជាប់ៗគ្នា ដោយសារតែការធ្លាក់ចុះនៃសេដ្ឋកិច្ចពិភពលោក។
ផ្ទុយទៅវិញ ការនាំចូលរបស់កូរ៉េខាងត្បូងបានកើនឡើង ៩,៩ ភាគរយ ដល់ ៥៩,១៨ ប៊ីលានដុល្លារក្នុងខែតុលា។ ជាលទ្ធផល ឱនភាពពាណិជ្ជកម្មបានកើនឡើងដល់ចំនួន ៦,៧៩ ប៊ីលានដុល្លារ ពីត្រឹមចំនួន ៣,៧៨ ប៊ីលានដុល្លារក្នុងខែកញ្ញា ហើយវាជាខែទី៧ ដែលឱនភាពពាណិជ្ជកម្មរបស់កូរ៉េខាងត្បូងបន្តកើនឡើង។
អ្វីដែលជាបញ្ហាប្រឈមនោះគឺថា ឱនភាពនេះ នឹងដាក់សម្ពាធបន្ថែមទៀតដល់រូបិយប័ណ្ណវ៉ុនរបស់ប្រទេស ដែលស្ថិតក្នុងចំណោមរូបិយប័ណ្ណដែលប្រឈមមុខនឹងការធ្លាក់ថ្លៃបំផុតនៅអាស៊ីក្នុងឆ្នាំ ២០២២ នេះ។ គួរបញ្ជាក់ថា ប្រាក់វ៉ុនបានធ្លាក់តម្លៃប្រហែល ១៧ ភាគរយ បើធៀបនឹងប្រាក់ដុល្លារ រាប់ចាប់តាំងពីចុងឆ្នាំ ២០២១ មក ហើយវាក៏ធ្លាក់ចុះខ្លាំងបំផុតមិនធ្លាប់មានក្នុងរយៈពេល ១៣ ឆ្នាំ នៅចុងខែតុលា៕
ដោយ៖ ហួន ឌីណា
