ទីផ្សារហិរញ្ញវត្ថុវៀតណាម កំពុងស្ថិតនៅក្នុងភាពស្រពិចស្រពិល ដោយសារធនាគាររងសម្ពាធផ្សេងៗ
វៀតណាម៖ទីផ្សារហិរញ្ញវត្ថុនៅវៀតណាម ដែលជាប្រទេសមានសេដ្ឋកិច្ចលូតលាស់លឿនជាងគេបំផុតនៅអាស៊ី កំពុងស្ថិតក្នុងស្ថានភាពមិនស្រួល ខណៈដែលការបង្រ្កាបលើការផ្តល់ប្រាក់កម្ចីលើអចលនទ្រព្យ រូបិយប័ណ្ណធ្លាក់ចុះ និងការកើនឡើងអត្រាការប្រាក់ បានបង្កជាសម្ពាធសម្រាប់ធនាគារ។
តាមការរាយការណ៍របស់ទីភ្នាក់ងារសារព័ត៌មានរ៉យទ័រ ប្រាក់ដុងរបស់វៀតណាម និងសន្ទស្សន៍ហ៊ុនគោល កំពុងឆ្ពោះទៅរកដំណើរការប្រចាំឆ្នាំដ៏អាក្រក់បំផុត ដែលមិនធ្លាប់មានចាប់តាំងពីវិបត្តិហិរញ្ញវត្ថុឆ្នាំ ២០០៨ ខណៈបច្ចុប្បន្នមានតែផ្សារហ៊ុនហុងកុង និងរុស្ស៊ី ប៉ុណ្ណោះដែលប្រឈមនឹងការខាតបង់កាន់តែខ្លាំងទូទាំងពិភពលោកនៅឆ្នាំនេះ។
ការលក់ ដែលស្ថិតក្នុងស្ថានភាពមិនអំណោយផល ចាប់តាំងភាគហ៊ុនអចលនទ្រព្យ និងមូលបត្របំណុល រហូតដល់ទីផ្សារទាំងមូល បានធ្វើឱ្យប៉ះពាល់ដល់អ្វីដែលអ្នកគ្រប់គ្រងមូលនិធិបរទេស ធ្លាប់លើកឡើងថានឹងក្លាយជាការទាក់ទាញឱ្យមានការវិនិយោគបន្ថែមក្រោយវិបត្តិកូវីដ។
ទន្ទឹមជាមួយគ្នា វិនិយោគិន នៅតែមានភាពច្របូកច្របល់អំពីសេដ្ឋកិច្ចរបស់វៀតណាម ដែលមូលនិធិរូបិយវត្ថុអន្តរជាតិបានព្យាករថា នឹងនៅតែស្ថិតក្នុងចំណោមកំណើនលឿនបំផុតនៅអាស៊ីនៅឆ្នាំក្រោយនេះ។
សេដ្ឋវិទូអាស៊ាននៅធនាគារ Bank of America Securities លោក Mohamed Faiz Nagutha បានលើកឡើងដោយសំដៅលើអត្រាប្តូរប្រាក់ និងសេដ្ឋកិច្ចរបស់ប្រទេសទាំងមូលថា៖ «វាមិនដួលចុះទេ ប៉ុន្តែវាកំពុងទទួលសម្ពាធយ៉ាងខ្លាំង»។
លោកបានបន្តថា៖ «វាអាចជារយៈពេល៦ខែដ៏លំបាក ដែលវៀតណាមត្រូវឆ្លងកាត់។ មានសម្ពាធកាន់តែច្រើនដែលយើងគិតថានឹងកើតឡើងក្នុងរយៈពេលដ៏ខ្លីខាងមុខនេះ ហើយសម្ពាធទាំងនោះប្រហែលជាកំណត់តម្លៃរូបិយប័ណ្ណ ឬដំឡើងអត្រាការប្រាក់សារជាថ្មី»។
គួរគូសបញ្ជាក់ថា ក្តីបារម្ភទីផ្សារគឺការពោពេញទៅដោយភាពច្របូកច្របល់ទ្វេរដង កើតចេញការបង្រ្កាបការប្រឆាំងអំពើពុករលួយដែលកំពុងរីករាលដាលលើវិស័យអចលនទ្រព្យ ហើយធ្វើឱ្យអ្នកជំនួញ ឈ្មួញកណ្តាល និងអ្នកអភិវឌ្ឍន៍ល្បីៗត្រូវប្រឈមមុខ និងបង្កកទីផ្សារបំណុល។
នាពេលនេះ ធនាគាររដ្ឋនៃវៀតណាម (SBV) កំពុងតែតឹងតែងក្នុងការរក្សាស្ថិរភាពវិស័យធនាគារ និងគ្រប់គ្រងនៃការឡើងចុះនៃរូបិយប័ណ្ណដុង ដោយបង្កើនអត្រាការប្រាក់គោលរបស់ខ្លួនដល់ ២០០ ចំណុច ក្នុងរយៈពេលត្រឹមតែ១ខែបន្តិចបន្តួច ដើម្បីតាមឱ្យទាន់ការកើនឡើងអត្រាការប្រាក់សកល។ ជំហានបែបនេះ បានបន្ធូរបន្ថយការជាប់គាំងលើរូបិយប័ណ្ណដុង ដែលធ្លាក់ចុះភ្លាមៗ ៤ ភាគរយទល់នឹងប្រាក់ដុល្លារ ដល់កម្រិតទាបបំផុតកាលពីខែមុន ដែលជាការធ្លាក់ចុះប្រចាំខែដ៏ធ្ងន់បំផុតក្នុងរយៈពេលជាងមួយទសវត្សរ៍។
ការតម្លើងអត្រាការប្រាក់នេះ ក៏បានធ្វើឱ្យធនាគារផ្ដល់ប្រាក់កម្ចីពាណិជ្ជកម្មធំជាងគេទី៥របស់ប្រទេស គឺធនាគារ Saigon Joint Stock Commercial Bank (SCB) ស្ថិតនៅក្រោមការត្រួតពិនិត្យពិសេសរបស់ធនាការកណ្ដាលវៀតណាម បន្ទាប់ពីអតិថិជនបន្តដកប្រាក់បញ្ញើរបស់ខ្លួនពីធនាគារនេះ។
យ៉ាងណាក៏ដោយ ក្រុមមន្រ្តីបានស្ដីបន្ទោសលើឥណទានតឹងរ៉ឹង និងការធ្លាក់ចុះនៃរូបិយប័ណ្ណ សម្រាប់បញ្ហាក្នុងសប្តាហ៍នេះ រួមទាំងកង្វះការផ្គត់ផ្គង់ប្រេងឥន្ធនៈនៅតាមបណ្ដាទីក្រុងធំៗ រួមទាំងរដ្ឋធានីហាណូយ និងក្រុងហូជីមិញ។
ប៉ុន្តែអ្នកជំនាញក៏មើលឃើញផងដែរថា បញ្ហាធំសម្រាប់អ្នកវិនិយោគគឺវិស័យអចលនាទ្រព្យ និងចំណែកទីផ្សារមូលបត្របំណុលសាជីវកម្ម ដែលមានតម្លៃ ២៤ ប៊ីលានដុល្លារបានឡើងប៉ោង បន្ទាប់ពីវិបត្តិធនាគារមួយទសវត្សរ៍មុន បានបង្ហាញពីការពឹងផ្អែកខ្លាំងលើប្រាក់កម្ចី។
យោងតាមគណៈកម្មាធិការសេដ្ឋកិច្ចរបស់រដ្ឋសភាវៀតណាម សម្ពាធកំពុងកើនឡើង ដោយសារតែបំណុលអចលនទ្រព្យចំនួន ១៥ ប៊ីលានដុល្លារត្រូវកំណត់សងនៅឆ្នាំ ២០២៥ ប៉ុន្តែអាជ្ញាធរដាក់កម្រិតលើការផ្តល់ហិរញ្ញប្បទានឡើងវិញ៕
ដោយ៖ហួន ឌីណា
