អាំស្ទែដាំ៖ បុរសជាជនជាតិរុស្ស៉ី ២នាក់ និងអ៊ុយក្រែនម្នាក់ទៀត ត្រូវបានចៅក្រមក្នុងប្រទេសហូឡង់ ផ្តន្ទាទោសដាក់ពន្ធនាគារអស់មួយជីវិត ដោយកំបាំងមុខពីបទមនុស្សឃាត ពាក់ព័ន្ធនឹងការបាញ់ទម្លាក់យន្ដហោះដឹកអ្នកដំណើរ MH17 នៅលើដែនអាកាសអ៊ុយក្រែនកាលពីឆ្នាំ២០១៤ ដែលបានសម្លាប់ជីវិតមនុស្ស២៩៨នាក់។

ទន្ទឹមគ្នា អ៊ុយក្រែនបានស្វាគមន៍ចំពោះសេចក្តីសម្រេចនេះ ដែលនឹងមានផលប៉ះពាល់ដល់សំណុំរឿងតុលាការផ្សេងទៀត ដែលទីក្រុងកៀវបានប្តឹងរុស្សី ខណៈដែលទីក្រុងម៉ូស្គូបានហៅសេចក្តីសម្រេចនេះថា ជារឿងគួរដ៏អាម៉ាស់ ហើយបាននិយាយថា ខ្លួននឹងមិនធ្វើបត្យាប័នពលរដ្ឋរបស់ខ្លួនជាដាច់ខាត។

បុរសទាំង៣នាក់ខាងលើនេះ ត្រូវបានចៅក្រមហូឡង់រកឃើញថា បានជួយរៀបចំការដឹកជញ្ជូនប្រព័ន្ធមីស៊ីលរុស្ស៉ីប្រភេទ ប៊ូគ (BUK) ចូលក្នុងប្រទេសអ៊ុយក្រែន ហើយមីស៊ីលនេះត្រូវបានប្រើប្រាស់ដើម្បីបាញ់ទម្លាក់យន្ដហោះ MH17 បើទោះជាពួកគេមិនមែនជាអ្នកចុចបាញ់ដោយផ្ទាល់ក៏ដោយ។

សូមរម្លឹកថា យន្ដហោះ MH17 របស់ក្រុមហ៊ុនអាកាសចរណ៍ Malaysian Airlines បានចាកចេញពីទីក្រុងអាំស្ទែដាំ ប្រទេសហូឡង់ ឆ្ពោះទៅកាន់ទីក្រុង គូឡាឡាំពួរ ប្រទេសម៉ាឡេស៊ី ហើយយន្ដហោះនេះត្រូវបានបាញ់ទម្លាក់នៅលើដែនអាកាសក្នុងតំបន់ភាគខាងកើតប្រទេសអ៊ុយក្រែន កាលពីថ្ងៃទី១៧ ខែកក្កដា ឆ្នាំ២០១៤ ជាពេលដែលកងកម្លាំងអ៊ុយក្រែនកំពុងវាយប្រយុទ្ធជាមួយកងកម្លាំងផ្ដាច់ខ្លួនគាំទ្រដោយរុស្ស៉ី៕ ប្រភព៖ CNA ដោយ៖ ទីណា និងបុត្រា